Kosova nuk duhet të shihet në asnjë mënyrë si vend që gjeneron krizë dhe strehon kriminelët. Kështu tha ministri i brendshëm i Kosovës Bajram Rexhepi i cili me ftesë të homoleges Gordana Jankullovska qëndroi në Shkup.

Vizita e Rexhepit vjen pas incidentit që ndodhi në Radush, ku policia maqedonase vrau katër shqiptarë dhe gjeti një sasi armatimi për të cilin pretendon se vinte nga Kosova.

 Deputetë të Kuvendit të Kosovës dhe ekspertë të sigurisë fajësojnë faktorin politik shqiptar në Maqedoni për shfaqjen e grupeve të armatosura shqiptare.

“Problemi i shqiptarëve të Maqedonisë nuk zgjidhet në ato mënyra. Faktorit politik shqiptar nuk i merret vesh, sepse komuniteti shqiptar atje nuk ka parti në opozitë”, ka deklaruar deputeti i AAK, Naim Maloku.

Ndërsa Rustem Mustafa, anëtar i komisionit parlamentar të sigurisë, shprehet se faktori politik shqiptar, por edhe ai maqedonas, fle gjum përsa i përket cështjeve shqiptare.

“Është shumë e kuptueshme që ky vend fle. Familjet kosovare, ato nga Shqipëria dhe ato shqiptare nga Maqedonia janë të kombinuara, kanë emocione dhe reagojnë bashkarisht”, ka pohuar Mustafa.

59 vjeçari Demir Miftari i fshatit Novo Sellë të komunës së Zhelinës së bashku me tre djemtë e tij është arrestuar mbrëmë gjatë aksionit të forcave të policisë për konfiskimin e armëve ilegale. Nga MPB thonë se në njërën nga shtëpitë e Demir Miftarit është konfiskuar një numër i konsiderueshëm armësh të kalibrave të ndryshëm. Zëdhënësi i policisë, Ivo Kotevski thotë se aksioni në Novo Sellë është marrë pas të dhënave paraprake operative dhe pas dyshimeve të MPB-së për mundësinë e lidhjes së të arrestuarve me grupin e vrarë në Sfillarë.

Partia Demokratike Shqiptare, ka kërkuar sot nga faktori ndërkombëtar që të bëj hetim të pavarur, lidhur me vrasjen e katër shqiptarëve në fshatin Radushë. Deputeti i kësaj partie Imer Aliu, vrasjen e katër shqiptarëve e ka cilësuar si ekzekutim klasik, ndërsa sqarimet e dhëna nga qeveria të palogjikshme dhe joprofesionale. Aliu më tej ka kërkuar ndërprerjen e menjëhershme të aksioneve policore nëpër vendbanimet shqiptare.
“Ky rast me pasoja tragjike edhe një herë nxori në sipërfaqe dyftyrësinë dhe amoralitetin e BDI-së që pa fije turpi duke qenë pjesë e qeverisë që natën ekzekuton shqiptarë dhe ditën i vajtojnë bëhen pjesëmarrës të ceremonive mortore të shqiptarëve të vrarë. Kërkojmë që urgjentisht të ndërpriten të gjitha akcionet policore , bastisjet burgosjet dhe maltretimet e shqiptarëve. Ju bëjmë apel përfaqësuesve ndërkombëtarë në Maqedoni të veprojnë në mënyrë diplomatike dhe preventive për të penguar përkeqësimin e mëtutjeshëm të marrëdhënieve ndëretnike që po bën tash më dy vjet kjo qeveri”, deklaroi Imer Aliu – deputet i PDSH-së

Në varrezat e fshatit Hasanbeg, mijëra vetë, i dhanë lamtumirën e fundit Harun Aliut, të cilin policia e vrau dje në orët e para të mëngjesit në afërsi të fshatit Radushë. Në varrimin e tij morën pjesë bashkëfshatarët e tij, bashkëluftëtarët dhe miqtë nga trojet e banuara me shqiptarë. Në varrimin e Aliut morën pjesë edhe kryetari i BDK-së Hysni Shaqiri, deputetët Safet Neziri, Femi Arifi, Abedin Zymberi kryetari i Shoqatës së Veteranëve të Luftës të UÇK-së Fazli Veliu. Gjatë ditës janë varrosur edhe personat e tjerë të vrarë në po të njëjtin aksion të policisë. Në fshatin Merovë është varrosur Shaban Zenuni ndërsa në varrezat e fshatit Gërçec të Shkupit është varrosur Qemal Mustafa 

Dhimbje dhe lotë në Hasanbeg e Merovë

 LAJMI I FUNDIT – Mijëra veta morën pjesë sot pasdite në varrimin e Harun Aliut, veprimtarit të shquar të çështjes kombëtare dhe njërit nga themeluesve të UÇK-së në Maqedoni. Në ceremoninë e varrimit në varrezat e Hasanbegut të Shkupit, familjarë, mijëra miq e shokë nga Maqedonia, Kosova e trojet e tjera i dhanë lamtumirën e fundit Aliut. Amaneti i ish-komandantit të UÇK-së ishte që të varroset në varrezat e vendlindjes së tij pranë familjes.