Zyrtarë të afërt me Bujar Bukoshin ka bërë të ditur ekskluzivisht për Gazetën kombëtare “Bota sot” se ish-ministri i Shëndetësisë, Bujar Bukoshi nuk do të tërhiqet nga LDK-ja por për shkak të ndërprerjes së procesit zgjedhor brenda LDK-së nga Fatmir Sejdiu dhe përpjekjeve të tij për t’i manipuluar këto zgjedhje të brendshme partiake, Bukoshi dhe Ukë Rugova, djali i dytë i presidentit historik Ibrahim Rugova do të legalizojnë një fraksion brenda LDK-së duke hartuar një listë për konkurrim në zgjedhjet e ardhshme nacionale.

Listës do t’i prijë Ukë Rugova dhe do të pasohet nga Bujar Bukoshi e të tjerë. Ky zyrtar i afërt me Bukoshin tha për “Bota sot” se me këtë veprim do të tentohet të ruhet fryma e Ibrahim Rugovës në LDK dhe të garohet për zgjedhjet nacionale qoftë edhe si lëvizje qytetare. Ai tha se ata mbeten në LDK dhe se kërkojnë votën e simpatizantëve të LDK-së e të frymës rugoviane.

Partia Demokratike e Kosovës është e gatshme për çdo variant për daljen nga kriza politike që ka kapluar vendin pas largimit të Lidhjes Demokratike të Kosovës nga koalicioni me PDK-në. Nënkryetari i PDK-së, Bajram Rexhepi ka thënë se PDK-ja do të shikojë se si do të jenë zhvillimet edhe në Kuvendin e Kosovës, përderisa ka përjashtuar mundësinë e krijimit të një qeverie teknike.

Ai ka thënë se PDK-ja ende nuk ka vendosur për qëndrimin e saj sa i përket zgjedhjeve, por thekson se këtë e vendos ushtruesi i detyrës së presidentit, Jakup Krasniqi.

Në zyrën qendrore të LDK-së sot paradite ka qenë tepër “nxehtë”. Të mbledhur si zakonisht në selinë qendrore, disa anëtar të kryesisë dhe aktivistë kanë dalë një nga një nga selia e LDK-së por asnjë nuk ka dashur të prononcohet para medieve.

Por ka qenë një deklaratë e Isa Mustafës që ka nxjerrë në sipërfaqe atmosferën “e nxehtë” në selinë e LDK-së. Ai duke u larguar nga selia e LDK-së, i pyetur nga gazetarët se a të është “plotësuar dëshira me prishjen e koalicionit me PDK-në: Mustafa ka thënë se nuk pajtohet me këtë vendim të tashëm për tërheqje nga koalicioni dhe se ky veprim ka qenë dashtë të merret më herët e jo në këtë kohë.

Ministri i Shëndetësisë së Kosovës, Bujar Bukoshi, njëherësh kandidat për Kryetar të Lidhjes Demokratike të Kosovës (LDK) e ka vlerësuar si tejet të pamenduar veprimin e kryetarit të LDK-së Fatmir Sejdiu për të dalë nga koalicioni qeverisës. Bukoshi i ka bërë ftesë Sejdiut që të japë dorëheqje nga detyra e kryetarit të LDK-së. Bukoshi tha se LDK-ja, ka humbur dy palë zgjedhje gjatë kohës sa drejtohet nga Fatmir Sejdiu.