Ministria e Punëve të Brendshme e Maqedonisë (MPB) ofron helikopterët e saj me qira edhe për ahengje dhe dasma familjare. Helikopterët e policisë për një orë për shfrytëzim mund të merren me qira prej 500 euro deri në 1500 euro.

Në tre dasma në rajonin e Tetovës, çifti bashkëshortor kishte arritur të shijojë shëtitjen me helikopter, pas shërbimit të paguar në konton e MPB-së. Ky dikaster jep me qira helikopterët, për shkak se në Maqedoni akoma asnjë agjenci apo kompani private nuk ofron shërbime të tilla.

“Për shkak se nuk ka helikopterë privat, shumë qytetarë drejtohen tek ne për të shfrytëzuar shërbimet për nevojat e tyre festive. Në shumë raste helikopterët tanë shfrytëzohen edhe nga shtëpi produksioni dhe filmike”, ka theksuar zëdhënësi i MPB-së, Ivo Kotevski.

Ish shefi i Shtabit të Përgjithshëm të Ushtrisë Çlirimtare të Kosovës, Agim Çeku, ka deklaruar se institucionet e Kosovës duhet të mendojnë edhe për ngritjen e kapaciteteve për mbrojtjen e vendit. Ai ka theksuar se deri më tani faktori ndërkombëtar na ka imponuar të bisedojmë vetëm për sigurinë, të kemi vetëm forca të sigurisë, të kemi vetëm polici e assesi të mos bisedojmë, të planifikojmë apo të ndërtojmë kapacitetet për mbrojtjen e Kosovës. Në çdo vend tjetër, në çdo vend normal flitet për mbrojtje dhe siguri. Sot, mbrojtja e integritetit dhe sovranitetit territorial të Kosovës është plotësisht e varur nga faktori ndërkombëtar, nga KFOR-i apo nga NATO-ja. Institucionet e Kosovës duhet të nisin të mendojnë për hartimin e planeve dhe të mekanizmave mbrojtës të vendit, ka porositur ish shefi i Shtabit të Përgjithshëm të Ushtrisë Çlirimtare të Kosovës, kryetari aktual i PSD-së, Agim Çeku

 Asambleja e Përgjithshme

Asambleja e Përgjithshme e OKB-së do të diskutojë më 9 shtator propozim-rezolutën serbe për Kosovën. Kërkesa, sipas Beogradit, është pranuar nga drejtuesi libian i sesionit.

Këto të fundit pohojnë se Abdulasalam Treki, ministri libian që është zgjedhur në krye të sesionit të 64-ët të Asamblesë së Përgjithshme, ka pranuar kërkesën e Serbisë që debati për propozim-rezolutën rreth Kosovës të mbahet në 9 shtator.

 Në fillim të shtatorit pritet vala e njohjeve të shteteve që do ta njohin Kosovën pas vendimit pozitiv të Gjykatës Ndërkombëtare të Drejtësisë. Kësaj here lajmin e kanë furnizuar jo burime nga Kosova, por nga Beogradi. Edhe pse parashikimet e shefit të diplomacisë kosovare, Skënder Hyseni, se gjatë verës 35 shtete do ta njohin Kosovën nuk dolën të sakta, vala e njohjeve po përgatitet për vjeshtë.

Hyseni është korrigjuar me deklaratën se Kosovën në shtator do ta njohin 10 vende, ndërsa Dushan Janjiç, drejtori i forumit për marrëdhënie ndëretnike vlerëson se kjo është reale, shkruan gazeta serbe “Alo!”.

Simbolet shqiptare surprizojnë Miss Universe. Pas Anxhela Martinit, e cila u shfaq të hënën me veshjen e Victoria’s Secret, ku në vend të krahëve të engjëjve ishin stiluar krahët e shqiponjës, edhe Kosova ka befasuar me elementët kombëtarë.

Bukuroshja Kështjalla Pepshi, e shpallur si Miss Kosova, ka pozuar në kategorinë e veshjeve kombëtare në Mandalay Bay Resort and Casino në Las Vegas, me përkrenaren e Skënderbeut dhe skeptër. Elementët e forta kombëtare kanë qenë jo vetëm pjesë e rregullave, për të gjitha vajzat konkurruese, pasi për Miss Kosova, veshja ishte një mënyrë ideale për të promovuar vlerat dhe historinë e Kosovës.

Ndërkaq, vajza shqiptare, Anxhela Martini, është shfaqur me një veshje të Victoria’s Secret me shqiponjën dykrenare. Por nuk ka mjaftuar kaq, pasi dy ditë më pas vajza shqiptare dhe një tjetër nga Irlanda janë bërë shkak për polemika. Kanë qenë fotot e tyre që janë bërë objekt debati, pasi të dyja vajzat shfaqen topless dhe të mbuluara vetëm me bojë. Kritikat kanë goditur direkt fotografin Fadil Berisha, i cili, sipas ABC-së, ka sjellë elemente nudizmi, duke anashkaluar bukurinë dhe zgjuarsinë e vajzave.