Franz Beckenbauer ka vdekur në moshën 78-vjeçare dhe këtë lajm të hidhur e ka bërë të ditur familja e tij.

Legjenda e futbollit gjerman ka vuajtur për një kohë të gjatë nga një sëmundje e pashërueshme, dhe ishte ajo që e mori nga kjo botë legjendën e këtij sporti.

Fituesi i Kupës së Botës vdiq ditën e diele, teksa tashmë kanë vërshuar edhe homazhet nga bota e futbollit, duke shprehur ngushëllimet.

Beckenbauer, i mbiquajtur “Der Kaiser”, konsiderohet si një nga lojtarët më të mëdhenj të futbollit. Beckenbauer ka luajtur në total 621 ndeshje, ku ka shënuar 74 gola dhe ka asistuar 75 herë. Legjenda gjermane nuk është ndëshkuar asnjëherë me kartonin e kuq.

Ndërsa me kombëtaren e Gjermanisë, ai ka luajtur 103 ndeshje, ku ka shënuar 14 gola dhe ka asistuar 10 herë.

“Tifozat Kuq e Zi”: Ëndërruam, sakrifikuam dhe në fund u kualifikuam, Gjermani po vijmë

Kombëtarja e Shqipërisë siguroi sonte edhe matematikisht kualifikimin për në Kampionatin Evropian “Euro 2024”.

Kombëtares shqiptare i mjaftoi një barazim 1:1 me Moldavinë, për të siguruar vendin në mesin e 24 kombëtareve më të mira në Evropianin që do të mbahet vitin e ardhshëm në Gjermani, shkruan Gazeta Express.

Rreth kësaj kanë shkruar edhe tifozët më besnikë të Shqipërisë, “Tifozat Kuq e Zi”.

“Ëndërruam, sakrifikuam, dhe në fund u kualifikuam. Më të bashkuar se çdo herë tjetër, “TKZ po vijnë” për të pushtuar tokën gjermane, për të stolisur Euro 2024 me ngjyrat Kuq e Zi. Ne ja dolëm, por ky është vetëm fillimi…”, thuhet në postimin e “TKZ”.

Lionel Messi e ka shkruar për herë të tetë emrin e tij në listën e fituesve të “Topit të Artë”, si askush tjetër.

Ylli argjentinas u shpall fitues i trofeut më prestigjioz individual për vitin 2023.

Kësisoj, Messi shkroi një tjetër rekord historik dhe thuajse të paarritshëm për të tjerët – duke vendosur edhe “Topin e Artë” të tetë në mesin e shumë trofeve të tjerë, transmeton gazeta “Kosova Sot Online”.

Asnjë futbollist tjetër në histori nuk ka fituar kaq trofe të tillë. Messi, këtë vit mposhti konkurrencën e fortë veçanërisht të Erling Haaland, si dhe të Kylian Mbappe e Kevin De Bruyne, me të cilët mbyllet lista e top-katër futbollistëve më të mirë në botë.

Në sezonin e fundit, 36-vjeçari shënoi 42 gola dhe shtoi 26 asistime në 56 paraqitje në total.

Përveç titullit të kampionit të fituar në Ligue 1, si dhe të Superkupës së Spanjës, argjentinasi udhëhoqi kombëtaren e tij drejt triumfit në Kupën e Botës “Katar 2022”, të parën në karrierën e tij si futbollist. Ai u zgjodh edhe si futbollisti më i mirë i turneut.

Trofeu i “Topit të Artë” u nda nga ish-futbollisti anglez, David Beckham.

Pas lajmit të shpërndarë nga mediat spanjolle, ku thuhej se Kylian Mbappe do të prezantohej më 23 korrik te “galaktikët” e Real Madrid, tashmë janë tifozët e PSG, që e bëjnë “fakt të kryer” transferim e “yllit” të tyre te gjigandët spanjoll.

Sipas një prej profileve të grupit të tifozerisë “pariziene”, “PSG Community”, “mbretërit” e Madridit kanë arritur një marrëveshje me klubin francez për transferimin e Mbappe për shifrën e 250 milionë eurove, përcjell abcnews.

Në bazë të fjalëve të tifozëve ishte vetë pronari i PSG, emiri Tamim bin Hamad Al-Thani, i cili pas negociatave me Presidentin, Florentino Perez ra dakord për shitjen e lojtarit për shifrën stratosferike.

Ndërkaq, përveç shifrës është mësuar dhe mënyra e pagesës, që Real Madrid do i bëjë “parizienëve” për Mbappe.

Kështu nga 250 milionë euro, 200 milionë do të paguhen menjëherë, ndërsa 50 të tjera në formë bonusi për ndeshjet e luajtura nga francezi dhe fitimin e “Topit të Artë”.

Që nga viti 2012, kur u mor nga Katari, PSG ka shpenzuar mbi një miliardë e gjysmë euro për blerjen e lojtarëve.

Në atë periudhë ata fituan tetë kampionate franceze dhe 12 kupa vendase, por një trofe është i paarritshëm për ta, ai që ishte synimi kryesor kur blenë klubin dhe ai është trofeu i Champions League.

Ata u afruan më shumë dy vjet më parë, por u mundën nga Bayern.

Pasi i njëjti klub i largoi sërish nga Champions League edhe këtë sezon, tashmë në 1/16, duket qartë se një epokë po i vjen fundi. 

Një dyshe prej 402 milionë eurosh

Në verën e vitit 2017, PSG solli Kylian Mbappe dhe Neymar për 402 milionë euro. Ata mbajnë ende rekordin e dy transfertave më të shtrenjta edhe sot.

Në Brazil ka nisur proçesi gjyqsor ndaj Robinho-s, ish-futbollistit i cili është dënuar për përdhunim në grup ndaj një shqiptareje.

Ngjarja ka ndodhur në 2013 në Milano teksa Robinho, në atë kohë pjesë e Milanit, përdhunoi së bashku me shokët një vajzë e cila ishte nga Shqipëria. Për rrjedhojë gjykata e Milanos e dënoi me 9 vite burg, por Robinho nuk e kreu pasi ndodhej në Brazil dhe nuk është në funksion ligji i ekstradimit.

Mirëpo tani ish-ylli i futbollit, pjesë edhe e Real Madrid e kombëtares braziliane, pritet të përfundojë pas hekurave. Robinho ndodhet në Santos, vendin e lindjes së tij.

Lajmi për kurdisje të ndeshjeve të futbollit në kampionatin e Kosovës tashmë është përhapur në shumë media të francës, përfshirë edhe ato ndër më të mëdhatë, shkruan Gazeta Express.

Ato po raportojnë për një skandal kurdisjesh  në futbollin kosovar, në favor të bastoreve.

Për ndeshjet e kurdisura janë vënë baste si në Kosovë ashtu edhe në Francë, ka njoftuar institucioni hetues francez, Juridiksioni i Specializuar Ndër-rajonal i Nancyt.

Ky institucion ka lëshuar edhe deklaratë. Raportohet se 9 persona janë arrestuar nga aitoritetet franceze ndërsa për 4 nga ta tashmë janë ngritur edhe aktakuza.

Kjo vlerësohet goditje e madhe për futbollin kosovar, ku qe shumë vjet ka pasur dyshime të shumta e të forta për kurdisje, por qe nuk janë dënur thuajse fare.

Autoritetet franceze kanë hetuar për gati një vit, ndërsa kurdisjet janë të lidhura me një klub të Superligës së Kosovës. Madje francezët pretendojnë se kurdisjet janë të konfirmuara, bazuar në analizën e koeficientëve dhe video-incizimeve të disa ndeshjeve.

Ka të përfshirë nga Franca dhe Kosova në kqtë skndal, ndërsa shuma e fituar është 360 mijë euro. Thuhet se një klub është autor i katër ndeshjeve te teukuara me katër kundërshtarë të ndryshëm./GazetaExpress/

Federata Evropiane e Futbollit (UEFA) është e informuar me hetimet për kurdisje në futbollin kosovar, të cilat u publikuan mbrëmë nga mediat franceze.

“Figaro”, “AFP” dhe “Le Parisien” njoftuan për 9 të arrestuar në Francë, prej tyre katër nga Kosova, të cilët akuzohen për përfshirje në kurdisje të ndeshjeve të ndodhura në futbollin kosovar përmes kompanive të basteve, ku kuotat kanë lëvizur në mënyrë të dyshimtë, në hetimet që janë bërë në 12 muajt e fundit, shkruan “Gazeta Express”.

“Le Parisien” e përmendi emrin e klubit të futbollit Llapi, si protagonist i kurdisjeve në katër ndeshje të supozuara, duke i akuzuar si të përfshirë kryesinë e klubit, shtabin teknik dhe disa lojtarë, me ç’rast thuhet se edhe llapjanët përfituan financiarisht nga këto kurdisje.

Shtëpia e futbollit evropian është e informuar për këtë rast, por që, për shkak të ndjeshmërisë së rastit dhe për të mos i penguar hetimet, nuk ka dashur të ndërhyjë për momentin.

“Në përputhje me praktikën e saj të gjatë, UEFA përmbahet nga komentimi i hetimeve apo nga ekzistenca e hetimeve potenciale për kurdisje të ndeshjeve të supozuara, në mënyrë që të mos i komprometojë proceset e hetimit. UEFA komunikon vetëm në raste /ndeshje specifike pasi të jenë hapur procedurat disiplinore dhe/ose të jenë marrë vendimet”, është përgjigjur UEFA për “Gazetën Express”.

Institucioni më i lartë i futbollit evropian ndër të tjera ka sqaruar se në lidhje me aktivitetet kundër trukimit të ndeshjeve në nivel kombëtar, e ofron një gamë të gjerë ekspertize për Federatat që janë nën ombrellë të saj, me ç’rast e ka edhe rrjetin e saj të oficerëve të integritetit, të emëruar në çdo Federatë.

Llapi është deklaruar i pafajshëm përmes një komunikate për shtyp mbrëmë vonë, njëjtë si trajneri Tahir Batatina, i cili mbrëmë foli për “Express”, duke insistuar se llapjanët janë të pastër si loti.

Përgatituni për një zhgënjim.

Ylli i shahut Magnus Carlsen pesë herë kampioni i botës, ka deklaruar, por jo mjaft qartë, se nuk do të marë pjesë në mbrojtjen e titullit të kampionit të botës në kampionatin e ardhëshëm botëror.

Pas fitores së tij të fundit në Kupën e Botës në vitin 2021, ai shprehu dyshimet e tij për mbrojtjen e titullit në vitin 2022, ai është penduar që nuk ka qenë mjaftë i qartë para sfidës së vitit 2021.

– Pse nuk pranova të dorëzohem dhe të thoja se kam mbaruar? Pyet vetveten Magnus Carlsen në një intervistë për VG norvegjeze.

Magnus Carlsen thekson se nuk ka mbaruar me shahun – e ka të vështirë të motivojë veten për një Botëror tjetër.

Trajneri i tij danez për një kohë të gjatë, Peter Heine Nielsen, është i bindur se Magnus Carlsen nuk do ta mbrojë titullin e tij në Kupën e Botës. Megjithatë, ai e kupton edhe pse zgjedhja nuk është bërë ende definitive.

– Është shumë historike të heqësh dorë nga titulli i Kupës së Botës. Jo vetëm në shah, por në sport në përgjithësi. Shumë pak kanë hequr dorë vullnetarisht nga titulli, në shah ka ndodhur vetëm në vitin 1975 me Bobby Fischer (ish-kampion bote amerikan, red.).

– Është një vendim serioz për Magnusin. Ai duhet të jetojë me zgjedhjet për pjesën tjetër të jetës së tij. Ai duhet të pushojë në atë që arrin, thotë Peter Heine Nielsen.

Përktheu dhe përshtati

Adnan Aliti

rtvzeri.com

Ish-futbollisti Edson Arantes do Nascimento “Pelé” u shtrua në spital të hënën, por ai është në gjendje të stabilizuar dhe do të dalë nga spitali në ditët në vijim.

Përmes një deklarate, spitali “Israelita Albert Einstein” bëri të ditur se pranimi i “O’Rei” do të vazhdonte me trajtimin e një tumori të zorrës së trashë.

“Edson Arantes do Nascimento u shtrua në spitalin Israelita Albert Einstein për të vazhduar trajtimin për një tumor të zorrës së trashë, të identifikuar në shtator 2021”, thuhet në deklaratë.

Pelé, i konsideruar si një nga lojtarët më të mëdhenj të futbollit në histori, është në gjendje të mirë dhe së shpejti do të lirohet nga sanatoriumi, shton dokumenti.

Gjendja e tij klinike është e mirë dhe stabile, dhe daljen nga spitali duhet të ndodhë në ditët në vijim”, përfundon deklarata e shkurtër.

Kampioni i botës tre herë me Brazilin iu hoq tumori i zorrës së trashë në shtator të vitit të kaluar dhe që nga ajo kohë ai ka bërë vizita të rregullta në spital për të vazhduar trajtimin.