Presidenti i Republikës, Bamir Topi priti sot në zyrën e tij dy ish-krerët e shtetit Rexhep Mejdani dhe Alfred Moisiu

Presidenti i Republikës, Bamir Topi priti sot në zyrën e tij dy ish-krerët e shtetit Rexhep Mejdani dhe Alfred Moisiu.

Ata dënuan dhunën e ngjarjeve të 21 janarit dhe sulmet verbale kundër institucioneve, rendit publik dhe vetë jetës së qytetarëve.

Në takim, u theksua nevoja jetike e shtyrjes apo anulimit të çfarëdolloj tubimi masiv publik që mund të shkaktojë ngjarje të padëshiruara, e ruajtjes së gjakftohtësisë dhe komunikimeve me tone të qeta, të maturuara dhe mendimet vizionare në frymën e Kushtetutës së Shqipërisë.

Tiranë, 28 janar, NOA – “Do të mbetem në këtë zyrë për të evituar një rrezik të ngjashëm. Edi Rama, kreu i opozitës, të premten e kaluar për pesë orë rresht ka drejtuar sulmin dhe jo në mes të natës, por në mes të ditës. Kemi shkatërruar një grusht shteti që parashikonte pushtimin e godinës qeveritare, parlamentit dhe televizionit shtetëror. Policia ka bërë një punë heroike, të jashtëzakonshme. Ka evituar një masakër”.

Kjo ka qenë vetëm njëra nga deklaratat e bëra prej kryeministrit Berisha për të përditshmen italiane “La Repubblica”, gjatë një interviste të posaçme mbi situatën e krijuar gjatë dhe pas 21 Janarit në Shqipëri.

Tiranë, 28 janar 2011, NOA/ Irmas Toptani – Ndërkohë që qytetarët që i janë bashkuar thirrjes së opozitës për një demonstratë homazh për të nderuar tre viktimat e 21 janarit, kortezhi i homazheve i kryesuar nga shefi i opozitës, është ndalur në sheshin para galerisë Kombëtare të Arteve, dhe tashmë po marshon paqësisht në bulevardin “Dëshmorët e Kombit” për t’iu afruar vendit ku u dergjën pa jetë tre demonstruesit. Kortezhi është duke iu afruar urës së madhe të Lanës në bulevard, dhe po i afrohet vendit të homazheve.

Mund të thuhet se janë me qindra mijë qytetarët që duket t’i jenë bashkuar demonstratës homazh e cila parakalon nën marshe funebër për të përkujtuar tre njerëz të pafajshëm të vrarë gjatë demonstratës së 21 janarit.

Turma të tëra qytetarësh që ndjekin kortezhin janë ende duke iu afruar bulevardit “Dëshmorët e Kombit”.

 Shinasi Rama

Kryeministri Berisha ka sulmuar sërish sot prokuroren e Përgjithshme, Ina Rama. Duke e quajtur atë mashtruese dhe gënjeshtare, ai i është drejtuar Ramës se kishte përgjegjësi kushtetuese të tregonte se kush e kishte detyruar të gënjente. Duke shmangur hetimin e gardistëve të cilët qëlluan mbi demonstruesit, Berisha i ka kujtuar kryeprokurores se kishte një urdhër nga policia që të hetonte opozitën.
Gjithashtu kreu i qeverisë ka mbledhur familjarë të policëve që ishin në punë ditën e demonstratës së 21 janarit. Në takimin me ta të zhvilluar në ambientet e Kryeminsitrisë, Berisha i ka ngushëlluar familjarët për dhunën e ushtruar ndaj tyre nga demonstruesit, duke vlerësuar edhe punën e policisë ditën e premte.
Po sot është zhvilluar në ambientet e kuvendit seanca e radhës e komisionit hetimor të ngritur nga parlamenti për demonstratën e 21 janarit. Pasi u deklarua nga ana e përfaqësuesve të mazhorancës se ata do të hetonin mbi drejtorin e SHISH-it, prokurorinë, si dhe do të mblidhnin deklaratat e opozitës në media, për të vërtetuar paramendimin e dhunës, mediat u nxorën jashtë dhe mbledhja vijoi pa praninë e tyre. Në këtë komision të ngritur me kërkesë të mazhorancës nuk ka pasur përfaqësues të opozitës

Komisioneri për Zgjerimin në Bashkimin Evropian i është drejtuar me një letër kryeministrit Sali Berisha përpara 21 janarit, ku i kërkonte rifillimin e dialogut politik. Lajmi është konfirmuar nga vetë zëdhënësja e komisionerit Fyle, Natasha Butler. Letra i është dërguar kryeministrit Berisha në datën 18 janar, pak ditë para mbajtjes së demonstratës ku humbën jetën 3 persona dhe shumë të tjerë u plagosën. Mësohet se nëpërmjet kësaj letre Fyle i ka kërkuar kryeministrit Berisha rifillimin e dialogut mes partive politike, si nevojë e menjëhershme për funksionimin e institucioneve në mënyrë demokratike.

***

Duke ndjekur ultimatumin e Berishës për dorëheqjen e Nanos, rreth dy mijë nga ithtarët e tij marshuan drejt selisë së kryeministrisë dhe, duke thirrur “Vdekje Fatos Nanos!”, shtinin në ajër me armë dhe qëllonin pareshtur me gurë godinën qeveritare. Turma hyri me forcë në ndërtesë, ku Fatos Nanoja dhe kabineti i tij ishin duke mbajtur një takim me ngut, dhe, pasi shkëmbeu ca të shtëna me rojet, i vuri flakën katit të parë.

Ministrat ikën në panik nga një dalje anësore midis shpërthimeve të serbatorëve të veturave, që protestuesit u kishin vënë flakën. Njerëz të armatosur mandej plaçkitën zyrën e kryeministrit dhe zyra të tjera, ndërkohë që mbështetës të opozitës të hipur në vetura dhe të armatosur rëndë valëvisnin flamujt kombëtarë duke rendur me shpejtësi rrugëve të kryeqytetit.

Ambasadori i OSBE-së, Daan Everts, ambasadorja e Shteteve të Bashkuara, Mariza Lino, si dhe ambasadori italian Spatafora ishin ndërkohë në takim me Fatos Nanon dhe zyrtarë të tjerë të lartë për të diskutuar mbi krizën.

Ditën tjetër u pa një dhunë edhe më e egër kur u mbajt funerali i Azem Hajdarit, truprojës së tij dhe një protestuesi që ishte vrarë në përleshjet e së dielës.

Policia e Tiranës me anë të një deklarate ka pohuar se tubimi i Partisë Socialiste i paralajmëruar për të premten më 28 janar, përbën rrezik për sigurinë kombëtare të vendit.

Në një deklaratë për shtyp drejtoria e policisë së Tiranës theksoi se tubimi i opozitës është një rrezik për sigurinë kombëtare. Policia e Tiranës thekson se nuk mund të garantojë mbarëvajtjen e tubimit duke marrë parasysh edhe ngjarjet në demonstratën e 21 janarit.