BDI ka vendosur që të mos braktisë Qeverinë edhe pas dështimit të vendit në Samitin e NATO-s në Lisbonë për mosmarrjen e ftesës për anëtarësim, njofton INA.

Situata pas Samitit të NATO-s ka qenë edhe njëra ndër temat kryesore që janë diskutuar mbrëmë në mbledhjen e kryesisë së partisë shqiptare në pushtet.

“BDI po ndjek me vëmendje zhvillimet aktuale politike në vend. Me këtë rast, Bashkimi Demokratik për Integrim riafirmon edhe një herë fuqimisht orientimin dhe përcaktimin euro-atlantik si alternativë e vetme për të ardhmen e vendit. Duke qenë plotësisht të vetëdijshëm dhe të përgjegjshëm për sfidat aktuale, ne do të vazhdojmë të angazhohemi dhe të kontribuojmë që integrimi i Maqedonisë në NATO dhe UE të bëhet realitet sa më shpejtë”, theksohet në komunikatën zyrtare të kësaj partie.

Votimi dhe miratimi i ligjit për regjistrimin e popullsisë në parlamentin e Maqedonisë është procesi i radhës me të cilën politika diktatoriale e Gruevskit tenton që të shndërrojë popullin shqiptar në popull apatrid. Si bashkë-pjesëmarrës në këtë proces, për fat të keq, sot kemi edhe një parti shqiptare e cila pa fijen e turpit dhe pa mos analizuar kushtet dhe rrethanat të cilët i imponon situata ekonomike në vend për numrin e madh të shqiptarëve të cilët gjenden jashtë vendit për të siguruar ekzistencën e familjes së tyre, e votoi ligjin edhe përkundër zërave të shumtë për pasojat katastrofale që do të ketë vetë implementimi i ligjit, respektivisht regjistrimi i popullatës në prill të vitit 2011.

Bashkimi Demokratik Shqiptar, vazhdimisht është përpjekur të sensibilizojë institucionet ndërkombëtare dhe opinionin demokratik se politika dominante e Shkupit tenton që të mposhtë, diskreditojë, diskriminojë, mohojë të drejtat dhe torturoj popullatën shqiptare e cila jeton në Maqedoni.

Lideri i Demokracisë së Re, Imer Selmani tha se, Qeveria e VMRO-së dhe BDI-së vazhdon të sjell një pas një vendime të demshme politike që diskriminojnë shqiptarët në çdo aspekt, politika që izolojnë vendin çdo ditë e më shumë dhe shkatërrojnë ekonominë e vendit.

“Miratimi i djeshëm i Ligjit për regjistrim, ose thënë më drejtë, kontrabandimi i ligjit duke i ikur debatit edhe përkundër apeleve të DR-së dhe para së gjithash popullit shqiptar edhe nëpërmjet protestave nuk preku në veshin dhe mendjen e BDI-së dhe ata votuan ligjin pa pranuar asnjë amandament të DR-së, por edhe duke tërhequr amandamentet e tyre. Kjo që dje bëri BDI-ja është tradhëti ndaj interesave kombëtare shqiptare”, deklaroi Selmani.

Partia Demokratike Shqiptare përmes një konference për shtyp reagoi ashpër lidhur me votimin e Ligjit nga maxhoranca për regjistrimin e popullsisë në Maqedoni.

“Dje më 30 nëntor 2010 në këtë godinë që disa e quajnë parlament, kurse për shqiptarët në Maqedoni nuk paraqet asgjë tjetër por një laborator ku prodhohen e dalin ligje anti shqiptare që në ekstrem ngushtojnë të drejtat e tyre njerëzore e kolektive”, deklaroi deputeti i PDSH-së, Imer Aliu.

Parlamenti i Maqedonisë mbrëmë miratoi Ligjin për regjistrimin e popullsisë, me ç`rast në përfundim të debatit pasoi një atmosferë tensionuese midis deputetëve shqiptarë të BDI-së dhe DR.

Burime për agjencinë e lajmeve INA kanë bërë të ditur se tensionet kanë shpërthyer në momentin kur deputetët e Demokracisë së Re po braktisin seancën parlamentare, ata ishin provokuar nga deputetët e BDI-së.