Izraeli, Shtetet e Bashkuara dhe Hamasi kanë rënë dakord për një marrëveshje paraprake për lirimin e dhjetëra grave dhe fëmijëve të mbajtur peng në Gaza, në këmbim të një pauze pesë-ditore.

Lirimi i pengjeve, i cili mund të fillojë brenda disa ditëve të ardhshme mund të çojë në pauzën e parë humanitare që nga fillimi i konfliktit në Gaza.

Sipas kushteve të një marrëveshjeje të detajuar prej gjashtë faqesh, të gjitha palët në konflikt do të pezullojnë operacionet luftarake për të paktën pesë ditë, ndërsa 50 ose më shumë pengje do të lirohen çdo 24 orë

Nuk ishte e qartë se sa nga 239 personat që besohej se po mbaheshin peng në Gaza do të liroheshin sipas marrëveshjes.

Ndalimi i luftimeve synon gjithashtu të lejojë kalimin e më shumë ndihmave humanitare, përfshirë karburantin, për të hyrë në enklavën e rrethuar nga Egjipti.

Sipas diplomatëve arabë dhe të tjerë, marrëveshja u përpilua gjatë bisedimeve disa javore në Doha, Katar midis Izraelit, Shteteve të Bashkuara dhe Hamasit, të përfaqësuar indirekt nga ndërmjetësuesit e Katarit.

Palestina është një prej shteteve të Lindjes së Mesme që vazhdon të mos e njohë pavarësinë e Republikës së Kosovës. Diplomatët që përfaqësojnë Palestinën në Serbi në vazhdimësi në takimet që kanë me zyrtarë të shtetit serb ripërsërisin qëndrimin e tyre në “respektim të integritetit territorial të Serbisë”. Përveç kësaj ata s’ngurrojnë as që të takojnë edhe politikanë si Vojsillav Sheshel i cili është edhe i dënuar edhe për krime lufte.

Përqafimi me Sheshelin- Ambasadori i ri i Palestinës e vazhdon traditën në Beograd

Historia tragjike e rajonit i sheh të pandara figurat e Sllobodan Millosheviqit dhe Vojisllav Sheshelit. Megjithatë kjo s’ka paraqitur problem ndër vite për ambasadorët palestinezë në Beograd, të cilët e kanë shndërruar në traditë takimin me politikanin radikal serb, Vojisllav Sheshel.

Ish-ambasadori i Palestinës në Beograd, Muhamed Nabhan, që ka përfunduar mandatin e tij gjatë këtij viti, në 2020-ën edhe përkundër pandemisë së shkaktuar nga COVID-19 i kishte shkuar Sheshelit në zyrë të partisë për ta takuar.

Nabhan edhe pse fillimisht ishte përshëndetur me grusht nga Sheshel shkaku i pandemisë, kishte zgjatur vetë dorën për t’i shtrënguar më pas me radikalin serb.

Këta të fundit në një komunikatë që kishin lëshuar atë kohë e kishin konsideruar si një takim “të përzemërt” e “miqësor” në të cilin ambasadori palestinez kishte thënë se “miqësia ndërmjet Serbisë dhe Palestinës është e pathyeshme dhe se Partia Radikale Serbe, si parti politike tradicionale dhe antiglobaliste, është një faktor i rëndësishëm në ruajtjen e marrëdhënieve të mira mes popullit serb dhe palestinez”.

Ndërkohë Sheshel në këtë takim e kishte falënderuar ambasadorin palestinez për qëndrimin ndaj Republikës së Kosovës.

Traditën e takimeve me Sheshelin e ka vazhduar edhe pasardhësi i Nabhan, Muhamed Al Namur. Video e përqafimit të tij me politikanin famëkeq serb ka bërë gjiron nëpër rrjete sociale.

Sheshel nuk kishte ngurruar që në këtë takim ta hidhte rreth qafës së tij shallin karakteristik palestinez. Ky takim dhe përfqafim me Sheshelin është komentuar jashtëzakonisht shumë në rrejte sociale.

Ambasadori i ri palestinez në fillim të misionit të tij në Beograd ishte takuar edhe me kryeministren serbe, Ana Bërnabiq, të cilës i kishte shprehur respektin dhe mbështetjen për “sovranitetin dhe integritetin territorial”./GazetaExpress/

Të enjten në mëngjes, 500 policë gjermanë filluan një bastisje të madhe në të gjithë vendin.

Sipas gazetës gjermane Bild, policia ka bastisur 58 ndërtesa të lidhura me komunitetin islamik.

Ndër të tjera në Hamburg, ku 200 oficerë bastisën 32 ndërtesa, duke përfshirë Akademinë Islamike të Gjermanisë dhe Shoqatën e Mbështetësve të një Xhamie slamike në Hamburg.

E njëjta gjë ka ndodhur edhe në Qendrën Islamike në Berlin.

Sipas agjencisë së lajmeve AFP, bastisja ka për qëllim identifikimin e grupeve që mbështesin grupin terrorist Hezbollah.

Autoritetet në Gjermani kanë kontrolluar më shumë se 50 ndërtesa. Tani duhet të sqarohet nëse këto Qendra islamike bashkëpunojnë me lëvizjen Hezbollah.

Autoritetet dhe politikanët gjermanë kanë dyshuar prej kohësh në xhaminë Imam Ali në Hamburg dhe sponsorin kryesor të Qendrën Islamike për lidhjet me regjimin e Iranit.

Kjo ka ndodhur me kërkesë të disa politikanëve gjerman të cilët kanë kërkuar ndalimin e Qendrës Islamike, veçanërisht pas sulmit të Hamasit në Izrael më 7 tetor. Kështu bëjnë të ditur disa media gjermane.

Qëllimi i kërkimeve, sipas agjencisë së lajmeve DPA, është të hetojë nëse qendra bashkëpunon me lëvizjen Hezbollah në Liban të mbështetur nga Irani, e cila është e ndaluar në Gjermani.

“Sidomos tani, kur shumë hebrenj ndihen veçanërisht të kërcënuar, nuk tolerojmë propagandën islamike apo qëndrimet antisemite dhe anti-izraelite,” thotë Ministrja e Brendshme e Gjermanisë, Nancy Faeser, nga partia SPD.

Gjatë kontrolleve, policia ka grumbulluar kompjuterë, celularë dhe dokumente, të cilat tashmë duhet të kontrollohen.

Vetë Qendra Islamike në disa raste ka hedhur poshtë pretendimet se kishte një lidhje me regjimin iranian dhe Hezbollahun. Sipas Der Spiegel, organizata ka deklaruar se “dënon të gjitha format e dhunës dhe ekstremizmit dhe gjithmonë ka mbrojtur paqen, tolerancën dhe dialogun ndërfetar”.

Megjithatë, tashmë ka prova që nuk mban ujë, thuhet në kundërpërgjigjen e autoriteteve, të cilët i referohen një libri me titull “Shteti Islamik”, botuar në gjermanisht nga Qendra Islamike. Autori është ish-udhëheqësi fetar në Iran, Khomeini, dhe në libër bën thirrje, ndër të tjera, për gjuajtje me gurë për tradhti bashkëshortore dhe varje të homoseksualëve.

Që në vitin 2022, autoritetet në Hamburg dëbuan një figurë udhëheqëse të Qendrës Islamike nga Gjermania me arsyetimin se ai kishte lidhje me Hezbollahun.

Këtu në Danimarkë, një xhami mban të njëjtin emër me xhaminë e cila ishte objekt kontrollimi në Gjermani, domethënë Xhamia Imam Ali në Kopenhagë.

Shtetet e Bashkuara të Amerikës të enjten kanë futur në listën e zezë 10 individë, teksa kanë shpallur rundin e radhës të sanksioneve ekonomike në Ballkan.

Sipas ueb-faqes zyrtare të Thesarit amerikan, individët e sanksionuar janë nga Bosnja dhe Hercegovina, Mali i Zi, Maqedonia e Veriut dhe Serbia.

Në mesin e tyre janë Savo Cvijetinoviq, Petar Gjokiq, Dushko Peroviq dhe Nenad Popoviq nga Bosnja e Hercegovina; Miodrag Davidoviq dhe Branisllav Miqunoviq nga Mali i Zi; Ratka Kunoska Kamceva, Irina Samsonenko dhe Sergey Samsonenko nga Maqedonia e Veriut; dhe Misha Vaçiq nga Serbia./REL

Presidenti i Ukrainës, Vlodymyr Zelensky, ka bërë thirrje që t’i kushtohet vëmendje më e madhe rajonit të Ballkanit, ku bën pjesë edhe Kosova, pasi sipas tij, ka informacione se Rusia po planifikon të nisë një luftë për ta larguar vëmendjen nga Ukraina.

Rusia mund të krijojë kriza të reja në Ballkan dhe Moldavi në mënyrë që të largojë vëmendjen e botës nga lufta në Ukrainë, ka thënë presidenti ukrainas të enjten gjatë një bashkëbisedimi me gazetarët nga Afrika, shkruan “Novinite”.

“Sot, të gjithë po diskutojnë krizën në Lindjen e Mesme. Por, siç thashë më parë, sinqerisht, nuk është problem i djeshëm. Të gjithë e dinë për këtë konflikt të vazhdueshëm dhe luftë të vazhdueshme, por askush nuk dëshiron t’i japë fund sepse është i përshtatshëm. Pas shpërthimit në Lindjen e Mesme qëndron Rusia, ne jemi të sigurt, me aleatin e saj Iranin”, ka thënë ai.

“Kini kujdes Ballkanin. Më besoni, po marrim informacione: Rusia ka një plan të gjatë. Lindja e Mesme, pastaj të paktën do të jetë Ballkani, nëse vendet e botës nuk bëjnë asgjë tani. Do të ketë një tjetër shpërthim të tillë”, ka thënë Zelensky.

Sipas tij, Rusia është e interesuar që ndihma e vendeve perëndimore të shkojë në shumë drejtime.

“Kur doni të ndihmoni një vend ose filloni ta ndani atë ndihmë dhe vëmendje për shumë vende, pastaj ka shumë sfida, shumë sfida humanitare. Tani ata kanë filluar të minojnë situatën në Moldavi për të treguar se ka diçka që nuk shkon atje gjatë zgjedhjeve. Të shpallen zgjedhjet jokushtetuese. Të rrëzohet sërish qeveria aktuale. Të rrëzohet qeveria pro-evropiane”, ka thënë Zelensky.

Fjalët e Zelenskyt mund të jenë të vërteta. Vetë presidenti i etnitetit serb në Bosnjë-Hercegovinë, Milorad Dodik, prej kohësh synon dhe i ka deklaruar planet shkëputëse që do të çonin në destabilizim të Bosnjës dhe gjithë rajonit. Udhëtimet e tij gjithnjë e më të shpeshta në Moskë tregojnë se ka mbështetje për politikat e tij. Përveç lojës me integritetin territorial dhe sovranitetin e Bosnjës, Dodiku së fundmi përmendi edhe Malin e Zi.

“Serbët në këtë shekull duhet të formojnë një shtet të vetëm të përbërë nga Serbia, Republika Srpska dhe Mali i Zi”, ka thënë Dodik.

Në fund të shtatorit pati një sulm të armatosur në Banjskë të Zveçanit, në pjesën veriore të Kosovës, ku u vra polici Afrim Bunjaku. Autoritetet e Kosovës parandaluan sulmin dhe konfiskuan një arsenal të tërë armësh. Zyrtarët qeveritarë kanë thënë se pjesëtarët e grupit paraushtarak serb që sulmuan në Banjskë kishin për qëllim aneksimin e veriut.

Abbas i gatshëm të marrë qeverinë në Gaza pas përfundimit të luftës

Shefi i Autoritetit Palestinez Mahmoud Abbas deklaroi se pasi të përfundojë lufta midis Hamasit dhe Izraelit, autoriteti i tij do të ishte i gatshëm të rimarrë kontrollin mbi Gazën si pjesë e një zgjidhjeje me dy shtete, njoftoi agjencia e lajmeve.

“Ne do të marrim të gjithë përgjegjësinë si pjesë e një zgjidhjeje politike gjithëpërfshirëse”, tha Abbas, duke iu referuar formimit të një shteti të pavarur palestinez, i cili do të përfshijë Bregun Perëndimor, Jerusalemin Lindor, si dhe Rripin e Gazës.

Qeveria aktuale fetare e krahut të djathtë të Izraelit dhe shumica e anëtarëve të saj, megjithatë, e kundërshtojnë këtë zgjidhje për konfliktin izraelito-palestinez.

Disa ministra izraelitë të ekstremit të djathtë mbështesin aneksimin e Bregut Perëndimor dhe madje edhe të Rripit të Gazës.

Hamasi mori kontrollin e Rripit të Gazës në vitin 2007, duke detyruar lëvizjen Fatah të Abbasit, e cila ruan kontrollin mbi zonat palestineze në Bregun Perëndimor.

Pas masakrave të Hamasit të 7 tetorit, Izraeli dëshiron të shkatërrojë kapacitetet qeveritare dhe ushtarake të Hamasit.

Shtetet e Bashkuara këmbëngulin që Autoriteti Palestinez të përfshihet në diskutimet për të ardhmen e Rripit të Gazës pas luftës.

Forcat Ajrore të Shteteve të Bashkuara të Amerikës kanë ngritur në ajër bombarduesin e tyre më të ri, B-21 Raider. Ai ka zhvilluar testet mbi Kaliforni ditën e premte, ku është fotografuar edhe nga qytetarë të thjeshtë. Më pas, këto testime janë konfirmuar edhe nga zyrtarët e Forcave Ajrore.

Vitin e ardhshëm, SHBA ka parashikuar që të shtojë në flotën e saj minimumi 100 avion B-21 Raider, të cilët sipas kompanisë që i prodhon, Northrop Grumman, secili prej tyre do të kushtojë rreth 750 milionë dollarë.

Fotot e video e fundit shfaqin avionin e ri luftarak me një pamje unike. “Siç është konfirmuar edhe nga Forcat Ajrore të SHBA-së, B-21 Raider po kryen testet e fluturimit. Këto teste të kombinuara mes ekspertëve të Northrop Grumman dhe personelit të Forcave Ajrore, do ta na çojnë në një hap tjetër drejt rritjes së aftësive operacionale”, tha Northrop Grumman.

Bombarduesi B-21 Raider u prezantua për publikun në një ceremoni të mbajtur në Kaliforni në dhjetorin e vitit të kaluar. Avioni i ri është pjesë e përpjekjeve të Pentagonit për të modernizuar armatimin bërthamor që përfshin raketa balistike bërthamore dhe mbushjet bërthamore të lëshuara nga nëndetëset. Me këtë Pentagoni po zhvendoset nga fushatat kundër terrorizmit të dekadave të fundit për t’u përballur me modernizimin e shpejtë ushtarak të Kinës.

Në to do vendosen armë bërthamore ose bomba konvencionale dhe mund të përdoren me ose pa ekuipazh njerëzor. Avioni i ri u prodhua brenda shtatë vjetësh nga dhënia e kontratës ndërsa prodhime të tjera luftarake përfshirë anijet kanë marrë dekada. B-21 Raider e ka marrë emrin nga sulmet ajrore mbi kryeqytetin japonez, Tokio në vitin 1942 të njohur si “Doolittle Raid”. Ai është pak më i vogël se ‘B-2’ për të rritur rrezen e tij.

Në tetor të vitit 2001, pilotët e avionit të vjetër bombardues ‘B-2’ vendosën një rekord të ri kur fluturuan 44 orë rresht për të hedhur bombat e para mbi Afganistan, pas sulmeve të 11 shtatorit.

Autobusët, kamionët dhe qendrat e paraburgimit janë gati ndërsa policia pakistaneze arreston afganët dhe shkatërron shtëpitë e tyre.

Me dhunë policore, afganët janë larguar me shumicë nga shtëpitë e tyre në Pakistan ditët e fundit.

Ata janë dërguar drejt kufirit me Afganistanin, sepse 1.7 milionë afganë pa vendqëndrim të ligjshëm, më 3 tetor iu dha 28 ditë kohë për t’u larguar nga Pakistani.

-Atyre u erdhi papritur ideja të na përzënë. Unë jetoj në Pakistan për 22 vjet. Unë kam lindur këtu, thotë Wusutullah, një shtetas afgan në Karaçi, për agjencinë e lajmeve AP.

Në total, ka më shumë se katër milionë refugjatë afganë në Pakistan.

Pas një rritje të mprehtë si në numrin ashtu edhe në shkallën e vdekjeve të sulmeve terroriste në Pakistan, për të cilat qeveria e vendit fajëson grupet afgane, civilëve afganë pa dokumente u është dhënë afat deri sonte që të largohen vullnetarisht ose të largohen me dhunë.

Por edhe para afatit, autoritetet po bënin arrestime masive, duke i transferuar në qendrat e dëbimit dhe duke shkatërruar shtëpitë e afganëve për t’i penguar ata të ktheheshin.

Nuk kam qenë kurrë në Afganistan
Shumë prej të prekurve nuk kanë qenë kurrë në Afganistan sepse kanë lindur nga refugjatë që erdhën në Pakistan gjatë luftës së Bashkimit Sovjetik në vitet 1980 ose gjatë sundimit të parë taleban në vitet 1990.

-Nuk kemi qenë kurrë në Afganistan, thotë 25-vjeçari Rizwan Khan për Reuters.

-Ne do të bëhemi të huaj për popullatën, dhe ata janë të panjohur për ne. Nuk kemi shtëpi në fshatin tonë stërgjyshëror, thotë ai.

Tre breza të familjes së Abdullahut, gjithsej 22 persona, kanë marrë me qira një kamion për t’i përzënë ata nga shtëpia që ata ndërtuan vetë në provincën Punjab në Afganistan.

• Erdha këtu kur filloi lufta ruse dhe fillova të punoj në një furrë tullash, thotë Abdullah për BBC.

Ai thotë se familja në fakt ka karta identiteti që tregojnë se lejohen të jenë në Pakistan, por pavarësisht kësaj policia kontrolloi shtëpinë e tij dhe arrestoi djemtë e tij.

Kështu që tani ata po lëvizin përgjatë rrugëve të mbipopulluara drejt kufirit midis autobusëve të mbushur plot dhe kamionëve të tjerë me të gjitha gjërat e tyre të grumbulluara së bashku nën një pëlhurë gomuar në shtrat.

-Nuk kemi asgjë, thotë gruaja e Abdullahut me lot.

-Nuk kemi bërë asgjë të keqe. Dikur punonim dhe ushqenim familjen.

“Dëbimi më i madh i paligjshëm masiv”
Që nga urdhri i daljes nga Pakistani, numri i kalimeve kufitare ditore është rritur nga 300 në ditë në 10,000, thotë menaxherja e programit të Këshillit Danez për Refugjatët në Afganistan, Giulia Canali.

-Ata u larguan nga frika dhe erdhën në Afganistan nga frika e dëbimit. Ata flasin për arrestime, ngacmime dhe poshtërime në Pakistan dhe në udhëtimin për në Afganistan, thotë Giulia Canali nga Kabuli.

Një valë pakistaneze e dëbimeve në vitin 2016 ishte, sipas organizatës së të drejtave të njeriut Human Rights Watch, “deportimi më i madh i paligjshëm masiv i refugjatëve” në historinë e fundit dhe çoi në largimin e 600,000 njerëzve.

Shtatzënia e rëndë në zonën e rrezikut
Disa nga afganët që tani kërcënohen me deportim ndodhen vetëm në Pakistan sepse presin të evakuohen në Evropë.

Marzia mësoi anglisht në Këshillin Britanik në Afganistan dhe për këtë arsye ka frikë për jetën e saj nën sundimin taleban.

Për tetë muaj ajo ka pritur për një vizë për në Britani, e cila ka premtuar se do t’u japë azil afganëve që kanë punuar për organizatat britanike.

Tani ajo është shtatzënë dhe viza e saj pakistaneze ka skaduar, thotë ajo për BBC.

Prandaj ajo është në rrezik dëbimi dhe i është thënë të mos e lërë adresën e saj për shkak të rrezikut për t’u zbuluar dhe arrestuar.

-Është e pamundur që unë të lind një fëmijë në dhomën time të hotelit. Nuk ka ndihma dhe askush që të më ndihmojë, thotë ajo.

-Ne kemi punuar për ta, tani është koha që ata të na ndihmojnë, thotë ajo për shtetin britanik.

Sipas Ministrisë së Brendshme pakistaneze, më shumë se 140,000 afganë janë larguar nga Pakistani për në Afganistan gjatë ditëve të fundit. Kjo ka ndodhur pavarësisht protestave të regjimit taleban në Afganistan, i cili ka kërkuar më shumë kohë për të përgatitur pritjen.

https://nyheder.tv2.dk/udland/2023-11-02-afghanske-flygtninge-beskyldes-for-at-staa-bag-terror-nu-jages-17-millioner-mennesker-tilbage-i-talibans-favn

Një grup i përbërë nga 16 senatorë francezë, shumica e tyre të lidhur me partinë politike Republikanët (LR), prezantoi një projekt-ligj, të udhëhequr nga senatori Stéphane Le Rudulier, që synonte ta bënte anti-zionizmin një vepër penale. Senatori Le Rudulier argumenton se rritja e antisemitizmit është e lidhur me urrejtjen ndaj Izraelit.

Projektligji i propozuar, i cili u dorëzua për lexim të parë në Senat, përfshin dënime për vepra të ndryshme që lidhen me anti-zionizmin. Ai kërkon të ndëshkojë ata që mohojnë ekzistencën e shtetit të Izraelit me një vit burgim dhe 45 mijë euro gjobë.

Ata që fyejnë shtetin e Izraelit do të përballen me dy vjet burgim dhe një gjobë prej 75 mijë eurosh, ndërsa ata që provokojnë drejtpërdrejt urrejtje ose dhunë ndaj Shtetit të Izraelit me pesë vjet burgim dhe 100 mijë euro gjobë.

“Me 16 senatorë kërkojmë kriminalizimin e anti-sionizmit. Shpërthimi i antisemitizmit ushqehet nga urrejtja ndaj Izraelit, hunda e rreme e urrejtjes së hebrenjve Anti-sionizmi mund t’i ekspozojë autorët e tij deri në 5 vjet burg dhe një gjobë prej 75,000 euro”, tha Le Rudulier në X.

Senatori Le Rudulier ka bërë thirrje gjithashtu për shpërbërjen e La France Insoumise, si dhe partitë që kanë mbrojtur terrorizmin dhe Hamasin, për të cilat ai thotë se bëjnë thirrje për shkatërrimin e Izraelit dhe shfarosjen e hebrenjve.

Në një letër drejtuar Élisabeth Borne, senatori denoncon praninë e asaj që ai e quan “kolona e pestë e terrorizmit palestinez në Francë” dhe bën thirrje për shpërbërjen e disa grupeve politike të akuzuara për mbrojtjen e terrorizmit.

Disa komentues politikë kanë thënë se ka pasur një rritje të ngatërrimit të anti-zionizmit dhe antisemitizmit. Richard Wagman, presidenti i nderit i Unionit Hebre Francez për Paqe (UJFP), ka kritikuar ngatërresën, duke theksuar se antisemitizmi është një formë e diskriminimit dhe urrejtjes racore, ndërsa sionizmi dhe anti-sionizmi janë ide politike.

Sipas Reuters, Ministrja e Brendshme e Gjermanisë, Nancy Faeser, deklaron se të gjitha aktivitetet e Hamasit në vend do të ndalohen në të ardhmen.

Ndalimi vlen edhe për grupin pro-palestinez Samidoun, krahu gjerman i të cilit do të shpërbëhet.

Lidhur me Hamasin, sot kam ndaluar plotësisht të gjitha aktivitetet e një grupi terrorist qëllimi i të cilit është shkatërrimi i shtetit të Izraelit, thotë në një deklaratë ministrja e Brendshme Nancy Faeser.