Rafis Haliti ka hedhur poshtë deklaratat e liderit të PPD-së Sefedin Haruni se edhe në Bashkimin Demokratik për Integrim ka struktura të shërbimeve sekrete. Kryetari i PPD-së mbrëmë në emisionin ‘Studio e Hapur’, tha se në të gjitha partitë politike shqiptare ka struktura të Drejtorisë së Pestë të Shërbimit sekret të Maqedonisë, por nuk dha asnjë emër konkret. 
“Për të  pas informata se kush për cilin shërbim sekret ka punuar, me siguri se duhet të jesh pjesë e atyre shërbimeve që edhe ti posedosh ato informata. Unë personalisht e them nuk posedoj informata të tilla, as për BDI-në por as për subjektet tjera politike. Unë thashë se ata që kanë informata për individë të caktuar, qofshin edhe në radhët e cilit do subjekt politik, nëse akuzohet BDI-ja  e them me sinqeritet në interes të një fryme më të shëndoshë politike në mesin e shqiptarëve do të ishte mirë të dalin me emra dhe mbiemra”, vlerësoi Rafiz Haliti, nënkryetar i Kuvendit dhe deputet i BDI-së.
Ndërkohë deputeti i DR-së Abedin Zymberi shkon edhe më tej, duke kërcënuar se po qe se konstatohet se në partinë e tij ka struktura të shërbimeve sekrete, edhe fizikisht do t’i lajë hesapet me ta.

Heshtja e “rebelëve” të BDI-së në kohë të fundit nga analistët komentohet në mënyra të ndryshme. Deklarata e Teuta Arifit se partia e saj duhet të vendosë afat që të zgjedhë mes Gruevskit ose popullit dhe ajo e Fazli Veliut që të jepen të drejtat e shqiptarëve përndryshe do të dalë nga parlamenti, konsiderohen si papërgjegjësi ose frikë. “Ndoshta ata që bërtisnin e kuptuan se kur partinë nuk mund ta çojë ta ndryshojë kursin britma e gjithë popullit, atëherë ;farë mund të bëjnë 2-3 veta. Absolutisht ata e kuptuan se partia e tyre në të vërtetë nuk është parti. Ajo është një grup njerëzish që mbron interesat e caktuara dhe në rrethana të atilla i ke dy zgjidhje, ose t’i bashkëngjitesh atij grupi, ose të dalësh e të vdesësh jashtë”, sqaron situatën analisti Kim Mehmeti. Sipas tij llogaritë e bëra u kanë thënë këtyre personave “më mirë rri aty ku je e mundë të të sjell fati ndonjë ndryshim brenda BDI-së”.

Agim JAKUPI

Nga mëvetësimi i Maqedonisë deri më sot, të gjitha të këqijat iu bënë popullit të pranueshme duke e bindur atë se ka edhe me keq! Për më tepër, populli po nxitet të duartrokas për të “keqen e mirë”!
Edhe sot jemi dëshmitarë të politikës fashiste që për fat të keq ndihmohet nga vetë shqiptarët. Këtë vit, maji u përgjak. Lulet u shkelën. Aromën e trëndafilave nuk e nuhatim, por nuhatim barutin që përdoret vetëm në komunat shqiptare, pra kundër shqiptarëve.
Shqipfolësit e qeverisë thirren në institucionet e shtetit! Kjo i ngjanë periudhës së Luftës së Dytë Botërore, kur çetnikët vrisnin, masakronin shqiptarë, Fadil Hoxha dilte në skenë. Atë botë ai dilte me konstatimin, përkatësisht me sloganet serbe për ta emituar sa herë që u duhej padronëve se : “Kosova – Metohia nuk asht as e shqiptarëve, as e serbëve as e malazezve, Kosova – Metohia asht e shqiptarëve e serbëve dhe malazezëve, asht e popujve të Kosovës – Metohisë”.