Një pjesë e madhe e dosjeve për bashkëpunëtorët e sigurimit shtetëror në të kaluarën mbahen në arkivat e shërbimit sekret dhe arkivat serbe. Komisioni për Hapjen e Dosjeve në Maqedoni vlerëson se nuk është e mundshme që të tërhiqen dosjet nga Beogradi që kanë të bëjnë me Maqedoninë. “Me institucionet përgjegjëse serbe nuk kemi vendosur asnjë komunikim, për shkak se ato dosje ruhen nga shërbimet e tyre sekrete dhe asnjëherë nuk do të arrijmë t`i marrim. Ndoshta kjo do të ndodhë në kohëra më të mira, sepse tani s`ka gjasa”, deklaroi anëtari i Komisionit për dosjet, Gjorgji Mallkovski.

Komisioni për Hapjen e Dosjeve deri tani nuk ka bërë asnjë kërkesë në adresë të institucioneve të Serbisë për të kërkuar dosjet që kanë të bëjnë me Maqedoninë. Publikimi i dosjeve ka nxitur debate edhe në qarqet politike, pas publikimit të disa dokumenteve nga javorja maqedonase “Fokus”, të cilat bëjnë të ditur se dy bashkëpunëtor të ngushtë të kreut të BDI-së, Ali Ahmeti kanë qenë bashkëpunëtor të sigurimit shtetëror ish-jugosllav.

Partia Demokratike Shqiptare reagoi lidhur me komunikatën e një dite më parë të BDI lidhur me procesin e lustrimit.

Zëdhënësi i PDSH-së, Adriatik Imeir tha se, Komisioni për lustrim është shndërruar në një instrument në duart e shumicës aktuale VMRO-BDI ,duke u shfrytëzuar atë për pazare të ulëta në dëm të interesave të shqiptarëve në Maqedoni.
“Në BDI për një moment na humbën “çlirimtarët” e “komandantët”, zonjushat e zonjat, sekretareshat e sekretaret e Fërckovskit që para gazetarëve dhe opinionit demonstronin arrogancën qeveritare.
BDI lëshon komunikatë me numër 000.00 si me qenë në Prizren e Shipkovicë, Cyrih e Beograd”, shtoi Imeri.

“I apelojmë BDI-së që të reflektojë pozitivisht ndaj kërkesave të DR-së sepse këto kërkesa janë mbipartiake dhe nuk kanë qëllime të politikës ditore, janë kërkesa që burojnë nga vet qytetarët shqiptarë në vend dhe nga diaspora shqiptare, janë kërkesa të cilat garantojnë realitetin e regjistrimit të popullatës”, deklaroi zëdhënësi i DR-së, Arjanit Hoxha. Ai tha se, subjekti të cilit i takon ai kërkon shtyerjen e tajmingut të regjistrimit.

“Në rast se BDI-ja nuk e kupton esencën e kërkesave tona, atëherë në mënyrë pak më ilustrative do t’ia përshkruajmë vetëm aspektin e nevojës për shtyrje të tajmingut të regjistrimit: në muajin prill, ashtu siç propozon BDI-ja, rreth 30% e shtëpive në rajonin e Strugës janë të mbyllura për shkak se qytetarët shqiptarë përkohësisht punojnë jashtë vendit për të siguruar ekzistencën e familjeve të tyre, rreth 50% e shqiptarëve të rajonit të Pollogut poashtu përkohësisht qëndrojnë jashtë me të njëjtin qëllim, ndërsa po këtë fat e ndajnë edhe rreth 2/3 e popullatës të rajonit të Prespës dhe Manastirit, por edhe të Shkupit dhe Kumanovës”, deklaroi Hoxha.

Ministria e Financave ka filluar përpilimin e buxhetit për vitin 2011. Por a do të përsëriten edhe këtë vit, ashtu si vitet e kaluara, lëshimet dhe diskriminimi etnik në shpërndarjen e mjeteve, mbetet enigmë që as ekspertët ekonomik, por edhe resorët përkatës nuk kanë një përgjigje të prerë. Askush nuk mund të thotë me saktësi nëse shqiptarët kësaj radhe do të fitojnë hisen e 25 përqindëshit të kulaçit buxhetor, aq sa përbëjnë në strukturën e popullsisë së Maqedonisë.

Ndërhyrje brutale e organeve të shtetit të shoqëruar nga forcat policore hynë në ambientet e televizionit ALB, gjoja për të bërë kontrolle. Të pyetur se përse ishte e nevojshme shoqërimi i policisë, ata thanë për aspekte sigurie, sikur në televizionin ALB të punonin kriminelë e jo gazetarë. Për katër orë të plota në televizionin ALB qëndruan inspektorë të shumtë nga organet e shtetit: Drejtoria e te ardhurave publike, Inspektorati i Punës dhe disa institucione të tjera, gjoja për të shqyrtuar funksionimin e televizionit dhe respektimin e ligjeve të ndryshme. Edhe pse Televizioni ALB funksionon vetëm një muaj me program të rregullt, inspektime te shumta si një guerile financiare ndërhynë në mënyrë spektakolare të shoqëruar me forca policore, sikur ne të punësuarit në TV ALB të kemi bërë vepra kriminale.