Author: admin

Rexhep Qosja promovon vëllimin e tetë të ditarit “Dëshmitar në kohë historike”

Published: 6 juni 2019

Në ambientet e Institutit Albanologjik, akademik Rexhep Qosja promovoi vëllimin e tetë të ditarit “Dëshmitar në kohë historike”, botuar nga Shtëpia Botuese “Toena” me të cilën ka bashkëpunim të gjatë, shkruan KultPlus.

Irena Toçi nga botimet “Toena”, hapi ngjarjen duke treguar për bashkëpunimin më se 20-vjeçar me Qosjen.

“Jemi krenar që ai është pjesë e kolanës së botimeve të Shtëpisë sonë botuese. Është një nga emrat më përfaqësues të historiografisë e letërsisë, shkrimtar mjaft i njohur, politikan, eseist, publicist, politikan e mbi të gjitha studiues i letërsisë. Ky ditar që sot prezantojmë është projekt shumë i madh. Deri më tani janë botuar tetë vëllime të këtij ditari, që është dëshmi historike”, tha ajo në fjalën hyrëse.

Vëllimi i tetë i “Dëshmitar në kohë historike” përfshinë vitet 1999-2001, që janë vitet e protektoratit dhe dalja e Kosovës nga lufta. Shtëpia Botuese “Toena”, ditarët e Qosjes që ai i mban që nga viti i largët 1966, i konsideron si projekte shumë të rëndësishme të veprimtarisë botuese.

Gjatë promovimit të këtij libri, ishin pjesëmarrës figura të rëndësishme të jetës kulturoro-politike shqiptare si Ambasadori i Shqipërisë për Kosovën Qemal Minxhozi, politikania shqiptare Valentina Leskaj e shkrimtari Fatos Kongoli.

Historiani dhe politikani shqiptar Paskal Milo, që ishte pjesëmarrës në panel, tha se ndihet i nderuar për mundësinë që të flas për profesor Qosjen.

“Nuk flas me imponim. As që të kryej ndonjë detyrë, por e ndjej atë që kam thënë dhe që e them sot. Kam emocione sepse kam qenë dëshmitar i atyre ngjarjeve që profesori përshkruan në këtë vëllim. Kam qenë dëshmitar aktiv kur fatet tona u kryqëzuan, në mënyrë të pazgjidhshme dhe ku kontributet tona të përbashkëta sollën veprën historike të papërsëritshme, lirinë e Kosovës dhe Pavarësinë e saj”, tha ai mes tjerash, derisa potencoi se shqiptarët kanë me se të krenohen. Për librin e ri të Qosjes, Milo u shpreh: “Padyshim që libri është dëshmi e pashlyeshme e historisë jo vetëm të Kosovës, por fare mirë mund ta quajmë dëshmi edhe për Shqipërinë”.

Drejtori i Institutit Albanologjik të Kosovës Hysen Matoshi, bëri një rezyme për ditarët, ku përmendi ditarin e famshëm të Ana Frangut, derisa për vëllimin e tetë të profesor Qosjes pati fjalë të mira.

“Vëllimi i tetë i kësaj kolane kronologjike e ofron këtë qasje, kalimin e Kosovës nga një vend i robëruar, në një shtet. Vëllimi i ngjan një jetëshkrimi, ku bëhet dallimi i Qosjes si mendimtar dhe Qosjes si besimtar në institucione. Përsiatja racionale akademike, pragmatizmi politik funksionalizohet me një kontekst të vështirë qeverisjeje në të cilin shfaqen dilemat e tij të mëdha”, potencoi Matoshi, kurse shkrimtari dhe profesori i njohur Agim Vinca po ashtu pati fjalë të mira për Qosjen, të cilin e konsideroi figurë të rëndësishme për kulturën shqipe.

“Në letërsinë dhe kulturën shqiptare, për herë të parë në mos edhe të fundit lexuesi shqiptar ka një vepër në formë ditari me tetë vëllime, me mijëra faqe tekst. Po që se i marrim parasysh edhe veprat “Paqja e përgjakshme” kushtuar Konferencës së Rambujesë dhe “Tronditja e shekullit” për 78 ditët e bombardimeve, të shkruara në formë ditari, atëherë janë gjithsej 12 vëllime të veprës së gjerë të Akademik Rexhep Qosjes në formë ditari”, u shpreh Vinca.

Akademik Qosja, pranoi edhe dhurata. Shkrimtari Mexhid Mehmeti, i cili tha se e ka adhuruar Qosjen qysh prej viteve 60, gjatë këtij promovimi shfrytëzoi rastin t’ia dhurojë disa libra të tij dhe një portret të Qosjes, i cili në fund i falënderoi të gjithë për pjesëmarrjen.

“Dua t’ju falënderoi të gjithëve sepse më keni nderuar me ardhjen e juaj në këtë promovim. Edhe unë ju kam nderuar e ju nderoj, kur them ju i drejtohem atij të cilit i takoj unë dhe ju bashkërisht, popullit”, përfundoi Qosja.

Pas përurimit, të pranishmit patën mundësinë ta takojnë autorin, të diskutojnë me të dhe të marrin nënshkrime nga ai.

/ B. Meholli / KultPlus.com

KOSOVA ËSHTË DJEPI I BARBARISË DHE I GJENOCIDIT SERB NDAJ SHQIPTARËVE

Published: 6 juni 2019

Bardhyl Mahmuti- Ofensiva e gjithanshme e ekstremizmit politik serb dhe e fundamentalizmit ortodoks të Serbisë për ta prezantuar Kosovën si “Djep të civilizimit serb dhe pjesë të Serbisë” ka marrë përmasa të mëdha si asnjë herë më parë.
Kësaj ofensive duhet t’i përgjigjemi me fakte dhe njëzëri:

Të gjithë atyre që janë lëshuar në këtë lloj propagande duhet t’u themi që, nëse kanë mundësi, t’i bëjnë një “analizë gjenetike” tokës së Kosovës dhe do të binden se është e stërmbushur me ADN nga gjaku dhe djersa e shqiptarëve. Kosova vërtetë është djepi i barbarisë dhe gjenocidit serb ndaj shqiptarëve! 

Zgjedhjet në Danimarkë leksion më vete, njihuni me kryeministren e re

Published: 6 juni 2019

Nëse në vende të tjera ka shqetësime për rritjen e partive ekstremistë të djathta, luftë verbale në zgjedhje dhe kryeministra që nuk e pranojnë humbjen, në Danimarkë ( si vendi me njerëzit më të lumtur në botë) ndodh krejt ndryshe.

Kryeministri Liberal i Danimarkës Lars Lokke Rasmusen, i ka dhënë dorën kryetares së social-demokratëve Mette Frederiksen e cila pas fitores në zgjedhje do të marrë pushtetin.

 “Ne patëm zgjedhje vërtetë të mira, por do të ketë një ndryshim të qeverisë”, u citua të thoshte kryeminstri aktual. Socialdemokratët fituan 91 nga 179 vende në parlament.

Ndërsa zonja Frederiksen, 41 vjeç bëhet kështu kryeministrja më e re në moshë që ka pasur Danimarka. Zgjedhjet e përgjithshme u dominuan nga mesazhe dhe apele mbi ndryshimet klimatike, emigracionin dhe mirëqenien.

Mette Frederiksen, leader of The Danish Social Democrats gives roses to voters in a last minute campaign in Aalborg, Denmark.

Partia Liberale e Rasmussen ka qenë në pushtet për 14 nga 18 vitet e fundit, por duket se danezët kanë dashur një ndryshim.

E ndërsa për partinë Popullore të ekstremit të djathtë, në këto zgjedhje doli e mbështetur me më pak se gjysma që nga zgjedhjet e fundit të vitit 2015. Kjo parti ka bërë shpesh apel për politika më të ashpra për emigracionin, por nuk arriti të ngrinte krye. Përballë partive të mëdha, duke përfshirë edhe socialdemokratët, vëzhguesit thonë se ka humbur fuqitë.

Ka dhe një risi në zgjedhjet e Danimarkës. Bëhet vendi i tretë nordik që do të ketë një qeveri të majtë, pas Suedisë dhe Finlandës.

Partitë kryesore të Danimarkës organizohen tradicionalisht në “bllokun e kuq” të krahut të majtë dhe në bllokun e krahut të djathtë njohur si “bllok blu”.

Blloku i kuq me pesë parti drejtohet nga Social-Demokratët e qendrës së majtë, të cilët kanë kaluar katër vitet e fundit në opozitë.

Gjatë fushatës, Social Demokratët u zotuan të rrisin shpenzimet publike, të rrisin taksat për bizneset dhe të pasurit dhe të rikthejnë reformat e pensioneve në mënyrë që njerëzit që kanë punuar për 40 vjet të dalin në pension më herët.

Tema kryesore e fushatës nga dy kahet ishte mirëqenia. Shumë votues shprehnin shqetësim për modelin që do të ndiqet në të mirë të tyre dhe të vendit.

Nis takimi Haradinaj-Merkel

Published: 6 juni 2019

Kryeministri i Kosovës,Ramush Haradinaj e kancelarja gjermane Angela Merkel kanë arritur në vendin ku do të mbahet edhe takimi i sotëm, raporton Gazeta Express.

Takimi pritet të fillojë për pak minuta, derisa kryeministri më parë u takua edhe me anëtarët e Grupit Parlamentar për Europën Juglindore të Bundestagut, Josip Juratovic, Nezahat Baradari nga SPD dhe Friedrich Ostendorff, Die Grünen.

Sic ka shkruar Haradinaj në Facebook, me deputetët gjermanë kanë biseduar për zhvillimet në vend dhe në rajon si dhe për dialogun Kosovë-Serbi.

GJENOCIDI DHE TERMI “ZHDUKJE”

Published: 6 juni 2019

Nga Bardhyl Mahmuti–Siç u përmend në shkrimet kushtuar përkufizimit të gjenocidit, që të kualifikohet si gjenocid, akti kriminal duhet të jetë kryer me qëllim që të shkatërrohet tërësisht ose pjesërisht një grup i caktuar nacional, etnik, racor ose fetar, si i tillë.

Në rastet kur do të kishim të bënim me shkatërrimin e tërësishëm të njërit nga grupet e lartpërmendura, debati për kualifikimin e krimit si gjenocid do të mbyllej shpejtë. Ndërsa, kur kemi të bëjmë me shkatërrimin e pjesshëm të një grupi të caktuar nacional, etnik, racor ose fetar, mospajtimet janë të mëdha, për arsye se në këtë përkufizim nuk përcaktohet asnjë numër dhe asnjë përqindje në bazë të së cilës shkatërrimi i pjesshëm i grupeve të lartpërmendura do të mund të konsiderohej si gjenocid.

Kur kemi të bëjmë me vrasjet e anëtarëve të grupeve që përcaktohen në definicionin e gjenocidit, e që përbën vetëm njërin nga aktet e gjenocidit [Konventa për Parandalimin dhe Dënimin e Krimit të Gjenocidit, Neni II, paragrafi (a)], në studimin e publikuar si dokument zyrtar i Kombeve të Bashkuara lidhur me çështjen e parandalimit dhe të dënimit të krimit të gjenocidit theksohet: 
“përkundër asaj që qëllimi i konventës është parandalimi dhe ndëshkimi i akteve të gjenocidit të drejtuara kundër një numri të madh personash, asgjë nuk e ndalon që këto dispozita të interpretohen dhe të aplikohen në rastin e vrasjeve individuale. Edhe në rastet kur rezultati është vrasja e një personi të vetëm, fakti se qëllimi i kriminelit është drejtuar kundër jetës së më shumë se një anëtari të grupit nuk paraqet asnjë pengesë që dispozitat e Konventës të aplikohen edhe në këtë rast (United Nations, Economic and Social Council, Nicodème Ruhashyankiko, Study of the question of the prevention and punishment of the crime of gjenocide, f.15).

Megjithatë, një numër i konsiderueshëm juristësh mendojnë se për ta cilësuar krimin si gjenocid, atëherë, një numër më i madh personash duhet të jenë goditur nga ky veprim. “Disa flasin për qindra persona të vrarë e të tjerë për mijëra viktima, si kusht që të kualifikohet krimi si gjenocid”. (Thomas Benages, La Convention pour la prévention et la répression du crime de génocide à l’épreuve du tribunal pénal international pour l’ex-Yougoslavie, f.143).

Fatkeqësisht kur bëhet fjalë për gjenocidin e Serbisë në Kosovë, në diskursin publik bëhet një ndërlidhje ndërmjet termit “zhdukje” dhe gjenocidit. Kjo qasje është shumë e gabueshme, sepse lë të nënkuptohet se gjoja gjenocidi nuk është kryer në Kosovë, meqenëse nuk na paskan “zhdukur”! Dhe në përputhje me këtë logjikë, jo rrallë përdoret edhe shprehja “tentim për gjenocid”, që ngërthen në vete, në një masë të konsiderueshme, shfajësimin e Serbisë, për gjenocidin e kryer.

Kur kemi të bëjmë me përmasat e vrasjeve në kuadër të krimit të gjenocidit, një gabim i madh bëhet kur krahasohet numri i të vrarëve në Kosovë me numrin e të vrarëve në gjenocidin nazist kundër hebrenjve apo atij të Hutuve kundër grupit etnik Tuci në Ruandë.

Përmasat e vrasjeve të hebrenjve dhe të Tucive paraqesin raste ekstreme të gjenocidit dhe nuk mund të merren si kritere për ta kualifikuar një krim si krim të gjenocidit.

Manipulimi me statistika, ku njerëzit shtohen dhe zbriten në operacione matematike me qëllim që të banalizohet “shtimi i krimeve” dhe “zbritja e jetëve të njerëzve të pafajshëm” është neveritëse.

Cilësimi i krimeve në Kosovë si gjenocid nuk ka për qëllim t’i banalizojë gjenocidet e aplikuara kundër popujve tjerë në periudha të ndryshme kohore. Përkundrazi, manipulimi me numrin e vrasjeve dhe heshtja e qëllimit për të shkatërruar shqiptarët e Kosovës, paraqet një formë të banalizimit të krimeve me qëllim të mohimit të këtij gjenocidit.

Sipas Konventës për Parandalimin dhe Dënimin e Krimit të Gjenocidit dhe Statutit të Gjykatës Penale Ndërkombëtare, nuk duhet “të zhduket” një grup kombëtar, etnik, racor ose fetar apo të ketë miliona të vrarë për ta cilësuar krimin si gjenocid. Duhet të dëshmohet qëllimi se aktet e dhunës janë në funksion të shkatërrimit të tërësishëm ose të pjesshëm të grupeve të mbrojtura me konventën e lartpërmendur.

Nga cilido këndvështrim juridik që të trajtohet numri i të vrarëve gjatë luftës në Kosovë, vrasjet e 1392 fëmijëve shqiptarë, vrasjet e 1739 grave shqiptare, vrasjet e mbi 10.000 civilëve të tjerë shqiptarë të të gjitha moshave dëshmojnë se forcat serbe aplikuan gjenocidin në Kosovë, sepse kishin për qëllim shkatërrimin e tërësishëm ose të pjesshëm të shqiptarëve të Kosovës si grup kombëtar, etnik apo fetar i ndryshëm nga serbët.

Kur t’i marrim parasysh të gjitha kriteret e përkufizimit të gjenocidit dhe kur numrit të shqiptarëve të vrarë ia shtojmë numrin e të plagosurve, të zhdukurve, të dhunuarave seksualisht, të dëbuarve me dhunë gjatë politikës së spastrimit etnik dhe aktet tjera që cilësohen si akte të gjenocidit, atëherë, do të dalin në dritë përmasat jashtëzakonisht të mëdha të gjenocidit të Serbisë në Kosovë.

Partitë e ekstremit të djathtë,pësojnë humbje të thellë në Danimarkë

Published: 6 juni 2019

Nga Ixhet Lutfiu-Në zgjedhjet e djeshme parlamentare në Danimarkë, blloku i kuq fitoi bindshëm me gjithësejt 95 mandat kundrejt bllokut të kaltërt me 75 mandat. Humbësi më i madh në këto zgjedhje ishte partia djathtiste DF (Partia Popullore Daneze). Nga 37 mandatet e fituar gjatë zgjedhjeve të kaluara, tani kanë ngelur vetëm me 16.

Vlen të theksohet se kjo parti ka dominuar politikbërjen daneze në 20 vitet e fundit. Sidomos mbahet mend për tonin e ashpër ndaj imigrantëve dhe refugjatëve.

rtvzeri.com

Eden Hazard me 11 qershor prezentohet në Real Madrid

Published: 30 maj 2019

Eden Hazard do të jetë lojtar i Real Madridit nga sezoni i ardhshëm. Tani çdo dyshim është hequr nga vetë lojtari dhe nga trajneri i Chelseat Maurizio Sarri, por belgu nuk do të prezantohet para 11 qershorit.

Hazard e bëri të qartë pasi e fitoi Ligën e Evropës me Chelsean të mërkurën se ka vendosur të largohet nga klubi londinez në kërkim të një sfide të re, transmeton Gazeta Express.

Koha e tij në Stamford Bridge ka mbaruar dhe ai ka zgjedhur të jetë lojtar i Real Madridit tash e tutje.

ASH: Të ndriçohet afera “Magjar Telekom”

Published: 30 maj 2019

Aleanca për Shqiptarët theksoi sot se Rasti i Maxhar Telekom, ku akuzohen për korrupsion lideri I BDI Ali Ahmeti dhe funksionarë i lartë I BDI Musa Xhaferi duhet ndriçuar plotësisht dhe ky rast nuk mund ti ikë drejtësisë dhe forcës së Ligjit.>

“Vendimi i sotëm i Këshillit të Apelit, I cili hodhi poshtë padinë penale të dyshuarve Ali Ahmeti dhe Musa Xhaferit ndaj ish drejtorit të Zbulimit dhe Kundër zbulimit Slobodan Bogoevkit për shpifje dhe fyerje, për rastin Magjar Telekom, i cili kishte dëshmuar në Gjyqin Amerikan, se Ahmeti dhe Xhaferi janë të përfshirë në korrupsion është një dëshmi e re se Bogoevski nuk paska shpifur dhe akuzat ndaj Ali Ahmetit dhe Musa Xhaferit janë të vërteta?”, nënvizon ASH.

Sipas kësaj partie, ky skandal I pazbardhur, paraqet dyshime për nivel më të lartë të korrupsionit, andaj si I tillë duhet të zbardhet sa më parë më një epilog të drejt dhe të pavarur gjyqësor, aq më tepër kur është pjesë edhe e pjesë e hetimit të Gjykatës së Nju Jorkut, të SHBA-ve.

“Komisioni Evropian një ditë më parë gjithashtu ka kërkuar që në kuadër të reformave në Gjyqësi të rritet transparenca ndaj dyshimeve që janë hapur nga Prokuroria Publike Speciale duke kërkuar vazhdim të hetimit dhe dënim për rastet e korrupsionit të nivelit të Lartë ku bën pjesë edhe afera Magjar Telekom. Është koha tani kur po presim hapjen e Negociatave me BE , pikërisht tani kur po proklamojmë se i përmbushim reformat në Drejtësi dhe Gjyqësi, që të veproj shteti I së drejtës, dhe opinion të informohet
saktë për rastin Magjar Telekom? Dhe në fund e pyesim liderin e BDI, nëse është I gatshëm ti nënshtrohet Vetingut të cilin e paralajmëroi ditë më parë?”, thekson ASH-ja. 

Refuzohen paditë e Ali Ahmetit dhe Musa Xhaferit për shpifje në lidhje me “Magjar Telekom”

Published: 30 maj 2019

Gjykata e Apelit edhe për herë të dytë i ka refuzuar paditë e liderit të BDI-së, Ali Ahmeti dhe bashkëpartiakut të tij, Musa Xhaferi për shpifje kundër ish agjentit, Sllobodan Bogoevski, i cili përpara Gjykatës së Amerikës ka dëshmuar se ata të dy kanë marrë ryshfet nga dy e gjysmë milionë euro çdonjëri prej tyre, që të anulohet ardhja e operatorit të tretë mobil në tregun e Maqedonisë, njofton Portalb.mk.>

Në vendimin që sot është publikuar nga Gjykata e Apelit, thuhet se paditësit Ahmeti dhe Xhaferi nuk kanë të drejtë as për dëmshpërblim material. Ky këshill anonim prej gjykatësve, të cilët kanë refuzuar t’i tregojnë emrat e tyre, kanë vendosur për herë të dytë, edhe atë pas ankesës të të paditurit, Bogoevski.

Ndryshe, rasti ka të bëjë me dhënien e ryshfetit ndaj zyrtarëve të lartë, Prokuroria Publike kah mesi i vitit 2015-të hapi hetim pasi u publikua dëshmia e ish drejtorit të DSK-së, Slobodan Bogoevski para Gjykatës së Qarkut në Nju Jork, ku ai pohon se ish drejtorët e “Magjar Telekom” i kanë dhënë 2,5 milionë euro ish kryeministrit Vllado Buçkovski dhe zyrtarëve të BDI-së, Ali Ahmeti dhe Musa Xhaferi, që mos të hyjë ndonjë operator tjerë i telekomunikimit në Maqedoni.

PSP ka hapur parahetim për Ahmetin, Buçkovskin dhe Xhaferin dhe fati i lëndës do të dihet pasi që të zgjidhet statusi i PSP-së.

Raport të pakushtëzuar për Maqedoninë e Veriut

Published: 29 maj 2019

Maqedonia e Veriut është shembull i mirë i ndërtimit të marrëdhënieve të mira ndërfqinjësore dhe përmbushjen e të gjitha kushteve të vendosura më herët vlerësoi Komisioni Evropian. Në raportin e progresit të publikuar nga eurokomesari Johanes Han, rekomandohet çelja e negociatave me Maqedoninë e Veriut dhe Shqipërinë, sa më shpejtë që është e mundur.

Të dyja vendet kanë përparuar në sferën e reformave të rekomanduara nga Këshilli Evropian në qershor të 2018. Në këtë drejtim, Komisioni i rekomandon Këshillit të hapë tani negociatat me Maqedoninë e Veriut dhe Shqipërinë”-tha Johanes Hahn, eurokomisioner.

Maqedonia e Veriut dhe Shqipëria kanë shënuar progres të caktuar në zbatimin e reformave. Marrëveshja e Prespës që i dha fund ngërçit me emrin dhe i hapi rrugën fqinjësisë së mirë, ashtu siç u veprua edhe me Bullgarinë, është diçka që për neve paraqet vlerë historike në ndryshimin e lojës, jo vetëm për vendim por edhe për rajonin”-pohoi Federika Mogherini, shefe e diplomacisë së BE-së.

Raportuesi për Maqedoninë e Veriut në Parlamentin Evropian, eurodeputeti Ivo Vajgëll, kujtoi institucionet e BE-së se është koha që vendi të shpërblehet.

Ne u angazhuam dhe i premtuam qytetarëve dhe elitës politike ne Maqedoninë e Veriut që nëse ata hapin politika të reja dhe marrëdhënie me fqinjët, nëse ata arrijnë një marrëveshje si ajo e Prespës, ata do të shpërblehen. Unë them që neve duhet ta mbajmë këtë premtim”-theksoi Ivo Vajgëll, eurodeputete.

Në raportin e progresit për vendin thuhet që janë adresuar reformat urgjente të Pribesë për gjyqësorin, është krijuar situatë e qetë ndëretnike mes komuniteteve, është siguruar mbikqyrje në institucionet e reja të sigurisë, është bërë progres i dukshëm në luftën kundër korrupsionit dhe krimit të organizuar dhe hapa të rëndësishëm në reformën në administratën publike. Gjatë vitit që vijon, Komisioni Evropian pret nga Shkupi zyrtar të zbatojë ligjet e miratuara në kuadër të reformave, të vazhdojë luftën e nisur kundër krimit dhe korrupsionit, të konsolidojë hetimet e nisura nga materialet e përgjuara, të adaptojë një reformë në Këshillin e Prokurorëve Publik dhe Këshillin gjyqësor dhe pozitat kyçe në administratën publike të merren në bazë të meritave. Këshilli Evropian theksoi se ka qenë e arsyeshme që Maqedonia e Veriut dhe Shqipëria të valorizohen në paketë por është në duart e vendeve anëtare nëse procesi i anëtarësimit do të shkojë paralel për të dyja vendet. Shqipëria po ashtu mori rekomandim të pakushtëzuar por ju kërkua të vazhdojë reformat në sundimin e ligjit, luftën kundër krimit dhe korrupsionit dhe gjetjen e konsensusit të brendshëm politik për të bërë prioritet eurointegrimin.

Fatlume Dervishi