Author: admin

Konfirmohen dy akuzat për lobimin, Ristani: Është procedurë e nxitur politikisht

Published: 18 juni 2019

Pastrim parash dhe falsifikim dokumentacioni, këto janë dy akuzat që rëndojnë ndaj Arben Ristanit, ish-Sekretar i Përgjithshëm i Partisë Demokratike, për çështjen e kontratave të lobimit. Në dalje të Prokurorisë së Tiranës, Ristani deklaroi se akuzat ndaj tij janë nxitur dhe organizuar politikisht.

“Së pari nuk u paraqita vullnetarisht, më kërkuan që të paraqitem. E dyta, ajo që mund të t’ju them është se prokuroria në këtë rast ka nisur një procedurë që unë e konfirmoj që është nxitur dhe e organizuar politikisht”, u shpreh ai.

Ish-deputeti i PD-së theksoi se nuk ekziston asnjë dokument që të konfirmojë se është përfshië në marrje apo dhënie financash.

“Unë nuk kam asnjë dokument që të ketë bëjë me marrje apo dhënie financash qoftë brenda vendit apo qoftë jashtë vendit. Nuk kam asnjë bisedë që të ketë bëjë me dhënie apo marrje pagesash. Dhe së treti nuk kam patur asnjë dijeni”, tha Ristani.

Sipas Ristanit, nuk ekziston asnjë provë sepse nuk ka asnjë dokument për përfshirjen e tij në këtë çështje.

Përfaqësuesi i PD lëshoi akuza edhe ndaj Qeverisë së Edi Ramës: “Fundi po i vjen kësaj Qeverie të lidhur me bandat dhe krimit.”

Prokuroria urdhëroi dje shoqërimin e detyruar për zyrtarët e PD-së, pas refuzimit të këtyre të fundit për t’u paraqitur vullnetarisht.

Çështja e pagesave për lobim të kryera nga ana e PD-së u hap në nëntorin e dy viteve të shkuara kur firma amerikane ‘Muzin Capitol Partners’,  plotësoi me informacione shtesë deklarimet e saj të detyruara me ligj për Departamentin e Drejtësisë. Sipas deklarimeve të kësaj kompanie, ajo kishte marrë tre pagesa, në një shumë prej 675 mijë dollarësh, për punën e saj në favor të Partisë Demokratike në vitin 2017.

Nga deklarimet e firmës Muzin, vetëm ajo prej 25 mijë dollarësh, është pranuar nga kryetari i PD-së, Lulzim Basha që është paguar nga PD-ja. Dy të tjerat mbetën të paqarta.

Informoi autorët nga brenda për grabitjen, gjykata e la në burg, agjenti i Rinasit: Nuk kam lidhje

Published: 18 juni 2019

Gjykata e Krimeve të Rënda ka caktuar sot masën e sigurisë arrest me burg për Hasan Kanaçin. Ai ka qëndruar i heshtur para gjykatës, ndërsa në momentin që gjyqtari i komunikoi masën e sigurisë, Kanaçi reagoi duke thënë ‘Nuk kam lidhje me ngjarjen’. Hasan Kanaçi, i cili mbante detyrën e agjentit të cargos, në aeroportin Nënë Tereza u arrestua të premten në mbrëmje, ndërsa akuzohet se ndihmoi autorët e grabitjes nga brenda në datë 9 prill, raporton gazetarja Xhensila Kodra.

Gjatë kontrollit të ushtruar në banesën e tij u gjetën rreth 100 mijë euro, të konvertuara në kartmonedha të ndryshme, për të cilat ka dyshime të forta se i përkasin shumës prej 4.6 milionë eurove të grabitura në Rinas më 9 Prill, të cilat do të transportoheshin me avion nga Shqipëria drejt Vjenës. Burime për Report TV bëjnë me dije se Kanaçi ishte agjenti që merrej me ngarkesën e vlerave monetare në aeroport dhe kishte dijeni për oraret fikse se kur vlerat monetare mbërrinin e futeshin në barkun e avionit.

Lidhur me këtë fakt, grupi hetimor ka dyshime të forta se 48-vjeçari ka njoftuar grupin kriminal për orarin e lëvizjet që do të bënin automjetet që po transportonin shumën e parave.  Kanaçi është personi i 7 që përfundoi në pranga lidhur me grabitjen e milionave euro në aeroportin e Rinasit.

Më herët në pranga janë vënë Ragip Hajdini, Elton Pikli, Renaldo Sulaj, Oltjan Veseli, Saimir Cela dhe Alkond Bengasi. Dëshmia e këtij të fundit zbuloi grupit, duke pranuar të bashkëpunojë me drejtësinë. Ndërkohë që në kërkim vijojnë të jenë vëllezërit Klement e Eldi Çala, si dhe Talo Çela. Ditën e ngjarjes, gjatë shkëmbimit të zjarrit me policinë, mbeti i vrarë edhe organizatori Admir Murataj. Pas ngjarjeve në datë 20 prill policia mori kontrollin në sallën e kamerave duke nisur zbatimin e masave shtesë.

Akuzohet për korrupsion, arrestohet ish-presidenti i UEFA-s Michel Platini

Published: 18 juni 2019

Arrestohet Michel Platini ish-presidenti i UEFA-s për akuzën e korrupsionit në kuadër të hetimeve për organizimin e Botërorit “Katar 2022”. Bëhet me dije se Platini është transportuar në zyrën antikorrupsion në Paris ndërsa çështja për të cilën akuzohet daton që në vitin 2010 për të drejtën e organiuzimit të Kupës së Botës nga Katari dhe në atë kohë Platini ka qënë president i UEFA-s.
Vendimi përfundimtar për të drejtën e organizimit të Kupës së Botës iu dha Katarit nga Sep Blatter që në atë kohë  president i FIFA-s por më pas pati denoncime,hetime dhe arrestime gjë që çoi deri në ndryshimin e drejtuesve të FIFA-s e UEFA-s.

Në këtë skandal indirekt u përfshi edhe Platini me akuzën se ka marrë nga Blatter në vitet 1999-2002 pagesa jo të ligjshme dhe që më pas u skualifikua me 8 vite që zbritën në 4. Platini në atë kohë u detyrua të largohej nga drejtimi i UEFA-s dhe në 2015-tën u zëvendësua nga Ceferin. Hetimi për Botërorin 2022 u nis në vitin 2016 nga Prokuroria franceze me akuzën e korrupsionit aktiv e pasiv të personave që nuk ushtrojnë funksione publike. Në qënëdër të hetimeve është një drekë e organizuar disa ditë përpara se të shpallej fituesi për të organizuar Kupën e Botës.

Në atë drekë perveç Platinisë morrën pjesë edhe ish-presidenti francez Sarkozy,emiri i Katarit, sheiku Hamad bin Jassem në atë kohë Ministër i Jashtëm dhe i Sporteve  por edhe një këshilltare e Sarkozy dhe sekretari i përgjithshëm i Presidentit francez të cilët po ashtu janë thirrur për të dëshmuar.Platini kishte dëshmuar për llogari të këtij hetimi edhe në vitin 2017-të dhe ka thënë sesi kishte votuar për Katarin në 2010-tën por e dinte një gjë të tillë përpara se të organizohej dreka.

Fatime Fetai: Pa e ndriçuar rastin “Monstra” nuk shkoj askund

Published: 18 juni 2019

Prokurorja speciale Fatime Fetai është shprehur e bindur për ndriçimin e rastit Monstra. Ajo në një emision të 1tv, tha se këtë rast e ndjenë ngarkesë në vetvete dhe se pa e ndriçuar atë, nuk mendon për ndonjë drejtim tjetër.>

“Pa u përfunduar rasti Monstra të cilin personalisht e ndjej sikur ngarkesë dhe njëkohësisht kamë dëshirë dhe e kam pasur që kur kam hyrë në PPS për ta zgjidhur, jo vetëm nuk do të lëviz, por as nuk mendoj në drejtim tjetër”, deklaroi Fatime Fetai, Prokurore speciale.

Fetai foli edhe për bisedimet pushtet-opozitë, për arritjen e një marrëveshjeje për ligjin për Prokurorinë Publike. Ajo u shpreh e pakënaqur me njerëzit të cilët po i udhëheqin këto bisedime, pasi siç tha, disa prej tyre janë të dyshuar për vepra penale.

“Unë nuk mund të di sa herë do të ulen, të merren vesh, të negociojnë dhe si do të merren vesh në fund, pro vetëm një gjë mund të apeloj. Nëse partitë politike mendojnë të sjellin ligj, në të cilin do të vendosin dispozita me të cilat do të pamundësohet që secili që ka shkelur ligjin, të përballet me drejtësinë, më mirë është që hiq mos ta sjellin atë ligj. Nuk na duhet neve ligji që vetëm të themi se i përmbushëm kushtet që të shkojmë përpara dhe ta hutojmë opinionin, ndërsa ligji të jetë përplot me pengesa në punën tonë të mëtutjeshme. Ajo do të nënkuptonte, se politikanët tanë, edhe pushteti edhe qeveria, duan që ta amnistojnë krimin”, theksoi Prokurorja speciale, Fatime Fetai.

Mandati për mbylljen e rasteve të PPS-së përfundon në shtator, dhe nëse ky mandat nuk vazhdohet, Fetai tha se do të shkaktohej në kaos me lëndët e hapura. Megjithatë ajo shtoi se në vendin tonë është traditë që marrëveshjet të arrihen në moment të fundit, andaj tha se edhe marrëveshja për ligjin për Prokurori publike do të arrihet, siç tha, në ora 12 pa 5.

18 vjet pa Naser Hanin, atdhetarin strugan

Published: 14 juni 2019

Nga Ylber Hasani>

Naser Hani lindi në Veleshtë të Strugës më 15 gusht 1958, në një familje me traditë patriotike. Qysh në moshë të re u angazhua në lëvizjen e rinisë shqiptare për të drejtat e tyre legjitime në ish-Jugosllavi. Si student ishte ndër pjesëmarrësit dhe organizatorët e rradhëve të para të demonstratëve të vitit 1981.

Qysh nga ajo filloi përndjekja e tij nga UDB-ja. Më vonë pason burgosja dhe izolimi i tij nga pushteti i atëhershëm jugosllav. Aty i përballoi torturat me dinjitet dhe qëndroi i papërkulur sikurse deri në momentet e fundit të jetës së tij.

Përkundër kësaj, ai vazhdoi aktivitetin e tij edhe më pas duke ndihmuar në shumë mënyra rezistencën e rinisë shqiptare në luftë për liri dhe pavarësi . Në momentet më të vështira, ai u gjend pranë aktivistëve të çështjes shqiptare duke i ndihmuar ata konkretisht dhe me ide nga të cilat çështja shqiptare përfitoi shumë.

Të panumërt janë veprimtarët të cilët e njohën birin trim të Veleshtës, këshillën e tij të saktë, fjalën e tij që bashkonte, dhe mbi të gjitha ndihmën e tij të pakursyeshme. Për shkak të aktivitetit të tij të çmueshëm patriotik për të drejtat e shqiptarve në Maqedoni në vitin 1993 detyrohet të emigrojë në Austri.

Kështu e njohem edhe ne Naser Hanin në Vjenë, ku vijoi studimet pasdiplomike në ekonomi. Edhe këtu si çdoherë dhe çdokund dëshmoi se njeriu mund të bëjë shumë për vendin e tij në çdo kohë dhe në çfardo situate.

Ai ishte rithemelues dhe drejtues i parë i Shoqërisë Studentore “Societas Albania“ e cila kishte ekzistuar më parë në vitet e 1920-ta në Austri. Dëshirë dhe qëllim i tijë ishte që nëpërmjet të kësaj shoqate përveç një organizimi më të mirë në interes të studentëve, të krijohej një organizim që në ato vite të vështira të poshtrimit të qenjesë shqiptare sadopak do të shtronte rrugën për arsimim nëpër universitetet e Evropës, mundësi kjo që deri në atë kohë ka qenë pak e njohur për shqiptarët.

Ai ishte njeri i dashur dhe optimist që studentëve iu gjend pranë me këshilla dhe ndihmë konkrete. Një kontribut të veçantë dha për unifikimin e

diasporës shqiptare në Austri. Ndihma e konsiderueshme e kësaj pjese të diasporës shqiptare dhënë luftës çlirimtare të UÇK-ës në Kosovë është në

rradhë të parë meritë e kontributit të tij të palodhshëm në kuadër të “Bashkësisë Shqiptare“ në Austri, njëri nga themeluesit dhe drejtuesit e së

cilës ishte Naser Hani. Fjala e tij u bë zëri më bindës për bashkim në përkrahje të luftës çlirimtare.

Gjatë gjithë jetës së tij për Moto pati mendimin „gjithçka për atdheun“. Me këtë ndjenjë dhe qëllim u kthye përfundimisht në Stugë në vitin 1998. Aty ishte një nga udhëheqësit e degës së PDSH -ës dhe drejtor Entit për Çështje Sociale.

Eliminimi i tij fizik (12.06.2001) nga Forcat e Sigurimit Maqedon tregon se edhe armiqtë e popullit shqiptar kanë evidencuar një kohë të gjatë vlerën dhe aftësitë e tij. Në luftën e drejtë të shqiptarëve për liri dhe barazi kombëtare në Maqedoni, vetë ekzistenca e një njeriu të tillë paraqiste rrezik. Ai ishte i bindur në realizimin e qëllimeve të drejta të popullit shqiptar çështje për të cilën vuri në funksion edhe jetën e tij. Si për të gjithë ata që e njohën edhe për ne, ai do të jetë njeriu më i paharruar, një nga

heronjtë e heshtur të dy dekadave të fundit të zhvillimit të çështjes shqiptare.

Naser Hani nuk u thye asnjëherë në jetë para asnjë presioni, atë nuk arritën ta kindapojnë, sepse një njeri i tillë mund të vritej, por jo të gjunjëzohej. Ai la tre fëmijë, të cilët do të rriten krenarë për babain e tyre, që pati shpirt të donte jo vetëm të ardhmen e tyre, por vuri jetën e tij në funksion të ardhmërisë së popullit shqiptar. Për ata që e njohën do të ngelë shembull se si duhet atdheu.

Shovenizmi maqedon nuk ka të ndalur,përjashtohet nga restorani fudbollisti Alioski sepse foli shqip

Published: 13 juni 2019

Dreka familjare e futbollistit Ezgjan Alioski në një restorant në Prilep u shndërrua në makth, vetëm se ai dhe të afërmit e tij flisnin në gjuhën shqipe.

Ezxhan Alioski, lojtar i kombëtares së Maqedonisë dhe një nga lojtarët më të mirë që luajti kundër Polonisë dhe Austrisë edhe pse i lënduar, sot përjetoi një moment jo të këndshëm në Prilep.

Alioski sqaroi për “Klan Macedonia Television” se deri sa ishte në restorant së bashku me familjen e tij, është lutur që të largohej nga restoranti për shkak se me të afërmit e tij ka biseduar në gjuhën shqipe.

“Jam vërtet i irrituar me atë që ndodhi në Prilep. Shikoni, unë luaj për ekipin e kombëtares së Maqedonisë. Vij nga Anglia për të luajtur me gëzim për këtë ekip dhe ja çka përjetoj këtu. Derisa unë me të afërmit e mi kemi biseduar në gjuhën amtare, përndryshe unë nuk fsheh që jam shqiptar, një njeri erdhi dhe më tha të largohesha nga restoranti vetëm sepse dëgjoi gjuhën që komunikoja me familjen time. Unë me të vërtetë nuk kam koment, uroj që kjo mos t’i ndodh askujt”, tha Alioski.

Lidhur me këtë që ka ndodh, ka reaguar edhe Federata e Futbollit të Maqedonisë.

Reagimi I FFM-së:

Federata e futbollit të Maqedonisë gjykon ashpër gjuhën e urrejtjes viktimë e së cilës së fundmi ishte reprezentuesi dhe ambasadori ynë, Ezgjan Alioski.

Ne si federatë dhe institucion me përgjegjësi sociale dhe që angazhohemi për zhvillimin e vlerave pozitive në shoqëri, gjithmonë do të mbajmë anën e trajtimit të duhur dhe respektit për të gjithë, pa marrë parasyshë përkatësinë fetare, nacionale apo racore!

Të gjithë reprezentuesit të cilët me krenari mbajnë fanellën e ekipit përfaqësues janë ambasadorët tanë më të mëdhenj dhe meritojnë respekt maksimal!

Duke gjykuar ashpër ngjarjen e sotme në Prilep, apelojmë se “Urrejtja nuk luan në terrenin tonë”! Ta largojmë atë edhe nga rrethi ynë!

FFM bën thirrje publike deri te institucionet përkatëse të reagojnë në mënyrën e duhur për ngjarje të këtilla të pahijshme, me qëllim që të njejtat asnjëherë mos të përsëriten.

Sulmuesi shqiptar i Maqedonisë ka bërë 47 paraqitje për Leeds United në Championship sezonin që lamë pas, duke shënuar 7 gola dhe ka dhuruar edhe 5 asiste.

Modric nuk e jep numrin 10 Hazardit

Published: 13 juni 2019

Numri 10-të s’do të jetë për Hazardin. Belgu ndoshta do ta veshë fanellën me numrin 7, aktualisht e mban Mariano – por raportohet se ai do të largohet nga Los Blancos.

Eden Hazard ka bërë të ditur në konferencën e parë si lojtar i Real Madridit se tashmë ia ka kërkuar numrin 10 Luka Modricit, por fituesi i “Topit të Artë” është përgjigjur me ‘JO’.

Hazard tha se këtë e ka bërë përmes Mateo Kovacic, i cili sezonin që lamë pas ishte i huazuar te Chelsea nga Real Madridi.

“Kam pasur fatin të bisedojë me Modricin përmes Kovacicit. Me shaka e kam pyetur nëse mund të ma dhurojë numrin 10, me ka thënë që jo. Kështu që më duhet të kërkoj për një tjetër numër. Tani për tani, numri nuk është aspak me rëndësi”, u shpreh Hazard.

50 mijë tifozë ishin në Santiago Bernabeu për t’i dhuruar Hazardit mirëseardhje në Real Madridi

Juncker: Zgjedhjet të mbahen, për prespektivën europiane të Shqipërisë

Published: 11 juni 2019

Ashtu edhe si ishte paralajmëruar, këtë të martë kryeministri i Shqipërisë Edi Rama ishte në Bruksel, ku ka zhvilluar një sërë takimesh me drejtues të lartë të Bashkimit Europian.

Ndër të tjera, Rama ka takuar dhe ka zhvilluar një konferencë të përbashkët për shtyp me presidentin e Komisionit Europian, Jean-Claude Juncker.

Gjatë kësaj konference, Juncker ka folur dhe për vendimin e shtyrjeve të zgjedhje lokale në Shqipëri. Juncker nënvizoi se populli nuk mund të ndalohet të votojë dhe se zgjedhjet duhet të zhvillohen më 30 qershor.

Ai gjithashtu theksoi se moszhvillimi i zgjedhjeve do të ndikonte në perspektivën e integrimit të Shqipërisë në BE.

“Për Komisionin Europian Shqipëria është gati për hapin e radhës, prandaj i kemi kërkuar Këshillit të BE-së hapjen e negociatave. Nëse i kërkojmë një vendi plotëso këtë apo atë dhe kur një vend i plotëson ne nuk kemi pse t’i themi jo hapjes së negociatave. Shqipëria ka plotësuar kërkesat, por nuk është sekret që disa vende kanë dyshime. Puna nuk ndalon në qershor, pavarësisht vendimit të Këshillit të BE-së, Shqipëria do të vijojë me reformat. Progresi i bërë për sa i përket luftës kundër kanabisit është një shembull ku shihet rëndësia e unitetit politik, të gjitha partitë politike në vend duhet të angazhohen.

Zgjedhjet janë parashikuar për në fund të qershorit. Jam aq i interesuar sa Shqipëria që të ketë progress; njerëzit nuk duhet të ndalohen të kryejnë këtë të drejtë demokratike. Mendoj se këto zgjedhje duhet të mbahen, nëse jo do të shtynin prespektivën europiane të Shqipërisë. Jam në favor të hapjes së negociatave për Shqipërinë sa më shpejt”, tha Juncker.

Ja dokumenti që Rama i dërgon ambasadorëve për shkarkimin e Presidentit Meta

Published: 11 juni 2019

Atë që e ka deklaruar publikisht, është kujdesuar t’ua dërgojë edhe përmes një letre. Kryeministri Edi Rama u ka dërguar një dokument ambasadorëve perëndimorë të akredituar në Tiranë, ku rendit qëndrimet për shkarkimin e Presidentit Meta.

Në Dokumentin prej 7 faqesh kryeministri Rama sqaron fillimisht se sipas procedurave që përcakton Kushtetuta dhe Kodi Zgjedhor, pas konsultimeve edhe me partitë politike, presidenti i Republikës dekretoi datën 30 qershor si ditën e mbajtjes së zgjedhjeve të pushtetit vendor.

Pas këtij vendimi nisi punën Komisioni Qendror i Zgjedhjeve dhe në 31 maj hapet fushata elektorale vazhdon sqarimi në dokumentin dorëzuar përfaqësuesve të selive diplomatike në vend.

Normaliteti i procesit zgjedhor merr fund me firmosjen e dekretit që shfuqizoi datën e zgjedhjeve dhe këtë kryetari i qeverisë e konsideron një akt arbitrar në kundërshtim me kushtetutën.

“Presidenti po i tejkalon kompetencat e tij siç parashihet me kushtetutë. Sipas nenit 94, Presidenti i Republikës nuk mund të ushtrojë kompetenca të tjera përveç atyre që i njihen shprehimisht me Kushtetutë dhe që i jepen me ligje të nxjerra në pajtim me të”.

Njëra pas tjetrës i rendit kryeministri Rama ato i konsideron si shkelje të rënda të presidentit me lëshimin e dekretit të ri.

-“Shkel kushtetutën, duke zgjatur mandatin e autoriteteve vendore;

-Shkel seriozisht simbolin e unitetit të njerëzve, sepse ai ka vepruar në mënyrë të njëanshme pa u konsultuar me palët politike;

-Shkel seriozisht të drejtën e qytetarëve për të zgjedhur dhe për tu zgjedhur;

-Ndërhyn në kompetencat e trupave ligjorë dhe kushtetues, sepse nëpërmjet shpalljes të një dekreti të ri duke ndryshuar datën dhe periudhën e zgjedhjeve, i ndalon kolegjit zgjedhor dhe KQZ-së të ushtrojnë pushtetin e tyre ligjor dhe kushtetues”, thuhet në dokumentin siguruar nga ABC News.

Duke risjellë si shembull një praktikë të njëjtë që ka ndjekur Gjykata Kushtetuese për shqyrtimin e një dekreti presidencial, kryeministri sqaron se në cilën gjykatë do të përfundojë ankimi i Partisë Socialiste.

“Nuk është subjekt për rishikim nga ana e Gjykatës Kushtetuese. Në varësi të natyrës së pretendimit apo të thelbit të debatit, mund të jetë nën juridiksionin e gjykatës administrative ose nën juridiksionin e kolegjit elektoral”.

Kryeministri i bën të ditur ambasadorëve në vendin tonë se do të ndjekë të gjithë hapat e nevojshme për të zbardhur ligjshmërinë e dekretit të presidentit për anulimin e zgjedhjeve vendore të 30 qershorit.

Jo si “paramilitarë”! Ivica Daçiq është përfaqësues i denjët i shtetit që kreu gjenocid në Kosovë

Published: 11 juni 2019

Bardhyl Mahmuti-Pas mbledhjes së djeshme të Këshillit të Sigurimit, Ministri i Punëve të Jashtme të Serbisë Ivica Daçiq shkaktoi skandal të rëndë diplomatik kur fyeu rëndë diplomatët e shteteve perëndimore dhe ambasadoren e Kosovës.

Arroganca e Ivica Daçiqit ka mundur të befasojë ndonjë nga diplomatët e shteteve perëndimore që nuk e kanë ditur rrugëtimin politik të këtij “diplomati”. Kjo sjellje nuk paraqet asnjë befasi për ata që e dinë se Ivica Daçiq është kuadër politik i formuar dhe edukuar në frymën e njëjtë si të Sllobodan Millosheviqit; ai ishte person i privilegjuar i Sllobodan Millosheviqit, të cilit Kasapi i Ballkanit i kishte besuar funksionin e Zëdhënësit të Partisë së tij.

Në të gjitha funksionet që ka ushtruar, gjatë luftës dhe pas përfundimit të saj, Ivica Daçiq ka prezantuar në mënyrë më të denjët politikën e shtetit serb, sidomos është dëshmuar si zëdhënës i politikës së fshehjes së gjurmëve të gjenocidit kundër shqiptarëve në Kosovë.

Fatkeqësisht një gazetar, i cili nuk i posedon njohuritë e nevojshme teorike për implikimin e termit “paramilitar”, publikoi shkrimin e titulluar “Daçiq sillet si paramilitar kundër shqiptarëve në OKB…”. Këtë shkrim e kopjua tekstualisht edhe disa portale tjera në Kosovë. Në këtë mënyrë, në mënyrë të pavetëdijshme, shfajësojnë shtetin serb për skandalin që shkaktoi në Kombet e Bashkuara ministri i saj i punëve të jashtme!

Po e përsëris atë që kam shkruar disa herë rreth përdorimit të gabueshëm të termit “paramilitar”.

Nocioni “paramilitar”, qoftë kur i atribuohet një individi, qoftë kur i drejtohet një  grupi, prezanton individin ose struktura jashtë forcave të armatosur të një shteti. Ky nocion është shndërruar në instrument të manipulimit me opinionin publik në funksion të fshehjes së përgjegjësisë së strukturave politike dhe ushtarake të një shteti në kryerjen e krimeve të caktuara, dhe pikërisht për këtë arsye propaganda serbe e futi në përdorim termin “paramilitar”.

Fshehja e krimit të gjenocidit të kryer në Kosovë nga forcat e armatosura serbe dhe drejtimi i gishtit te “grupet paramilitare” është pjesë e strategjisë së Serbisë për t’i ikur përgjegjësisë si shtet.

Si rezultat i propagandës së vazhdueshme të Beogradit për t’ua veshur krimin strukturave që gjoja nuk kanë qenë në kontrollin e shtetit serb, këtë mendim e kanë përqafuar si të vërtetë një numër i konsiderueshëm politikanësh në shtetet perëndimore (komunistë, socialistë, social-demokratë, të së djathtës të vjetër e të re, neonazistë e neofashistë) si dhe historianë e politologë, filozofë e sociologë, gazetarë e publicistë, të orientimit të djathtë e të majtë. 

Fatkeqësisht edhe në diskursin tonë politik dhe mediatik nocioni “grupe paramilitare” ka zënë një vend të rëndësishëm, pa menduar për pasojat e mëdha që sjell përdorimi i këtij termi në shfajësimin e shtetit serb për krimin e gjenocidit.

Gjatë luftës në Kosovë nuk ka pasur “paramilitarë”. Çdo gjë ka qenë e kontrolluar në detaje. Gjenocidin në Kosovë e kreu Serbia përmes forcave të saja të armatosura me një zinxhir të qartë komandues nga institucionet politike, ushtarake dhe policore të shtetit serb.

Është e kuptueshme që pushteti i Serbisë, qoftë i kohës së Millosheviqit, i Tadiqit apo i  Vuçiqit dhe Daçiqit, aplikon strategjinë e mohimit të krimit të gjenocidit të kryer në Kosovë. Gjithashtu është e kuptueshme përpjekja e tyre për të zhvendosur fajësinë nga shteti serb te “grupet paramilitare të pakontrolluara nga shteti serb”. Por, nuk është e drejtë që politikanë dhe gazetarë shqiptarë, në mënyrë të pavetëdijshme për pasojat që ka përdorimi i këtij termi, të përdorin nocionin “paramilitar”. 

Fatkeqësia është edhe më e madhe kur nga padituria e asaj çka fshihet prapa përdorimit të këtij termi, duke përdorur cilësimin “paramilitarë” për ata që kanë qenë të përfshirë në krime dhe në fshehje të krimeve, politikanë dhe gazetarë mendojnë se i paraqesin edhe më të këqij.

Realisht është e kundërta. Në mënyrë të pavetëdijshme bëhet shfajësimi i shtetit që përpiloi, zbatoi dhe u përpoq të fshehë krimin e gjenocidit.

P.S.

Më gjerësisht për këtë çështje kam shkruar në shkrimin e titulluar  “Nocioni ‘paramilitar’ si instrument i mohimit të gjenocidit”, të cilit i kanë dhënë një hapësirë të konsiderueshme e mediave në Kosovë.