Author: admin

A duhet të kalojë kaq lehtë një mashtrim i madh publik si ky?!

Published: 8 oktober 2018

Lulëzimi nuk guxon t’u thotë shqiptarëve që regjistrimi i Babales ishte i vërtetë. Ai thotë që kjo punë dihej dhe kush mendon ndryshe është naiv. Prokuroria dhe Rama e kanë fajin.

Por ai nuk thotë që do të luftojë deri në fund për të nxjerrë të vërtetën që mendohet se vazhdon të jetë në regjistrimin origjinal që vetë PD disponon dhe shpërndau. Nuk po thotë që ai e ka në dorë të vërtetën pavarësisht se çfarë thotë Rama e Prokuroria. Mund të shkojë ta bëje provën ku të dojë, por ai nuk po thotë ketë.

Ai po sulmon prokurorinë dhe kjo lojë duhet të marrë fund. Prokuroria duhet ta thërrasë dhe ta bejë që kur të dalë andej të fillojë të flasë me vete. Ndoshta do t’ja kursejë këto dalje nëpë media per të trembur frikën e vet.

Rama duhet të kërkojë që drejtësia t’i shkojë kërkimit të së vërtetës deri në fund dhe jo të bëjë atë që bëri me pallatin e vjerrit, duke i dhënë Bashës para në vend që ti jepte popullit drejtësi duke bërë që nje popull i tërë të paguajë hajdutë deti e toke publike.

Shumica e militantëve te Partisë Socialiste nuk do ta besonin dhe po të ishte e vërtetë kjo histori. Shumica e qytetarëve të ketij vendi e kanë kuptuar herët se çfarë ka ndodhur.

Dy pijanecë mund të gënjejnë njëri tjetrin në klub të fshatit. Apo dhe ca shokë mund të bëjnë shaka apo gënjejnë njëri tjetrin për qejf. Kjo nuk është vepër penale.

Por të mashtrosh një popull të tërë, me seri, me ditë të tëra dhe më së shumti ndjekësit e tu, ata që të besojne, që kanë shpresë te ty dhe ti motivosh për të bërë rrëmujë një vend duke provokuar incidente kjo është kriminale dhe për këtë nuk shpëton dot ligjërisht. Ky është një krim i rëndë.

Askush nuk i ka harruar protestat para Ministrisë së Brendshme. Askush nuk e ka harruar plagosjen e një gazetari gjoja në raportim e sipër jo me telefon por me ca rrjeta teli nëpër duar.  Askush nuk i ka harruar recitimet e të rinjve të PD dhe LSI pranë te dyert e Ministrisë së Brendshme.

Të gjitha këto të frymëzuara nga një mashtrim publik.

Drejtësia do të shkojë në vend kur ata që shpërndanë dhe e treguan këtë mashtrim të madh me shumë gjasa dhe që e hartuan të vihen përballe ligjit.

Dhe me sa duket Lulezim Basha po e merr vetë përsiper plotësisht ketë histori. Drejtësia e ka mundësinë ta falë Babalen. Edhe po e dënoi asgje nuk fiton shoqëria. Të dëshpëruar si ai ka plot. Ai mund të bëhet një i penduar dhe të japë të gjitha faktet e provat  që shantazhuesit, mashtruesit publike të mbajnë përgjegjësinë ligjore që meritojnë në mënyrë shëmbullore.

Por të dëshpëruar si Lulëzim Basha ka vetëm një. Ai është… kryetari i opozitës.

“Babalja”, 200 mijë euro; Përgjimet: Alizoti pranon se u shtir si Xhafaj

Published: 8 oktober 2018

Prokuroria zbulon përgjime të cilat tregojnë se si i ashtuquajturi “dëshmitari X”, komunikon në telefon me Fredi Alizotin, që në audio-përgjim shtirej si Agron Xhafa, raporton Top Channel.

Përgjimet janë pjesë e fashikullit hetimor dhe përkojnë me kohën kur “dëshmitari X”, Albert Veliu, kishte aplikuar për azil politik në Kosovë.

Në 6 qershor, zhurma politike po kryqëzonte ministrin e Brendshëm dhe kur Albert Veliu gjendej në Kosovë, ai flet me Fredi Alizotin për çështje lekësh dhe për likuidim të punës së bërë.

Aktori tregon se kishte takuar person tjetër për të cilin Albert Veliu i thotë që t’i kërkojë pagesën.

Fredi Alizoti: E takova. Jo këtej, jo andej, jam keq, po dridhej.

Albert Veliu: Ore, thuaji, bëj likuidimin që kemi lënë thuaj, kaq asgjë në botë. O Fredi vëlla, se me atë s’kam lidhje fare kontakti. Besomë, se jam në azil. Për shpirt të plakës. Unë flas me anë të tjetrit me kosovarin. Thuaj, o vëlla më bëj likuidimin, si e lamë, thuaj.

Në të njëjtën ditë, Alizoti dhe “Babalja” flasin sërish, ku ky i fundit e vë në dijeni se e kishin mbajtur katër orë dhe e kishin pyetur. Por pjesa më e rëndësishme është biseda që Alizoti bën me numrin 974 në 12 qershor. Aty, Alizoti tregon se ka bërë rolin e Agron Xhafës.

Fredi Alizoti: Ai muhabeti jam unë. E kape filmin ti? Unë bëra sikur isha vëllai i atij, e ke parasysh? Dëgjon, bëra sikur isha vëllai i atij? Do merrnin nga një qindshe për njeri, dyqind përnjëherë. Ai më tha mua do marrim njëqindshe. Unë i thashë mirë një qindëshe, i thashë nëm një 20 tëshe, e kupton vëlla, asnjë 20 asgjë iku ky muhabet.

Gjatë muajit qershor, Alizoti shfaqet i shqetësuar dhe telefonon shpesh, jo vetëm sepse nuk po merrte shumën e premtuar për aktrimin, por edhe sepse madiat po shkruanin për arrestime.

Prokuroria e Krimeve të Rënda thotë se në 3 biseda, Alizoti pranon qartësisht, aktori i Geron Alizotit dhe se ai shprehet i zhgënjyer që Albert Veliu nuk i kishte dhënë paratë.

Nga analiza e tabulateve rezulton se përpara se të publikohej audio-përgjimi, fillimisht Albert Veliu ka kontaktuar me Ervin Salianjin në datën 20 tetor të vitit 2017 dhe më 21 tetor 2017, ai ka vendosur kontakt edhe me gazetarin Jetmir Olldashi.

Shqiptarët kanë drejtuar botën që nga mesjeta, Evropa i la qëllimisht mënjanë

Published: 8 oktober 2018

Dr. Aleksandre Lambert, historian, drejtor akademik i “School of International Training” në Gjenevë, është autor i disa librave dhe artikujve në fushën e relacioneve ndërkombëtare të filozofisë politike, të politikës së sigurisë dhe lidhjeve civile-ushtarake.

Lambert ka vizituar Shqipërinë dhe ka filluar të njoh çështjen shqiptare që në rini të tij me kërkimet e bëra në Arkivin e Lidhjes së Kombeve Gjenevë, kur njohu mirë edhe çështjen çame.







Dr. Aleksandre Lambert

Historiani zviceran Dr. Aleksandre Lambert këmbëngul se nuk është e rastit që shqiptarët në asnjë moment të historisë nuk njihen si komb që i kanë sulmuar kombet e tjerë dhe se shumë shqiptarë kanë shkëlqyer duke drejtuar qoftë perandori, qoftë shtete të tjera.

Po kështu, sipas tij, të tjerë shqiptarë kanë lënë emrin e tyre në fusha të ndryshme të shkencave në shtete të ndryshme të botës. Më tej historiani ndalet në zhvillimet pas Luftës së Dytë Botërore, duke shprehur bindjen se ajo që ndodhi me Shqipërinë, me lënien e saj në Bllokun e Lindjes ishte një llogari e bërë nga aleatët që fituan luftën. Në fund edhe disa këshilla se si duhet të veprojnë shqiptarët për t’u ngjitur pranë shumicës, aty ku ata tentojnë.

Ja ç’thotë ai për shqiptarët në kohën e Mesjetës:

Në Mesjetë shqiptarët i kanë dhënë udhëheqës botës, udhëheqës laikë ose fetarë dhe personalitete kulturore që i kalojnë kufijtë e Evropës. Disa Papë kanë qenë shqiptarë, për shembull, – Klementi XI më i dalluari prej tyre. Por shqiptarët kanë qenë në krye të feve me rëndësi botërore, si në krye të fesë ortodokse, ashtu edhe të asaj myslimane.

Në histori gjejmë udhëheqës të shquar shqiptarë në shumë vende të Evropës, madje edhe prej atyre që ngandonjëherë kanë përcaktuar fatin e shumë betejave historike (në vitin 1515 qe Merkur Bua me kalorësinë e lehtë të Venedikut, e përbërë e gjithë nga shqiptarë që përcaktoi fitoren e betejës së Marinjanit, që historia e emëroi beteja e gjigandëve dhe jo Françesku i I-rë i Francës, 19 vjeç, që ato dy ditë beteje mësoi se si luftohet).

Shqiptarët i kanë dhënë shumë kryeministra dhe gjeneralë të shquar Perandorisë Otomane (vetëm familja Qyprili i dha 5 kryeministra Perandorisë). Shqiptarët i kanë dhënë shumë heronj të pavarësisë greke, prej të cilëve po përmend Kundurjotis, Marco Boçari, Kanaris, Kolokotroni, Karaiskaqis, Bubulina. Që ishin në udhëheqje të revolucionit grek, prej të cilëve edhe disa kryeministra të shtetit të ri të pavarur grek.

Rumania gjithashtu ka pasur një familje princore me origjinë shqiptare(Aleksandër dhe Vladimir Gjika si dhe princesha Eleonora e njohur me emrin Dora Distria). Françesko Crispi, shok i Garibaldit, Kavurit e Macinit që ka qenë një kryeministër i madh Italisë, ishte me origjinë shqiptare.Piktorë si Carpaçi, Albani etj., humanisti Leonic Tome, profesori i Kopernikut dhe shumë personalitete shqiptare, janë nderuar nga historia e Italisë. Muhamet Aliu, reformatori i Egjiptit Modern, që historia franceze e ka quajtur “Napoleon i Lindjes së Afërt” qe shqiptari që themeloi dinastinë mbretërore të Egjiptit që mbretëroi gati 150 vjet.

Arkitekti i “Taxhmahallit” në Agra të Indisë, kryevepra e arkitekturës islamike, ishte vepër e një shqiptari ashtu sikurse edhe “Xhamia Blu” e shumë xhami të rëndësishme të Stambollit. Dhe më në fund Heroi Kombëtar i shqiptarëve, Gjergj Kastrioti Skënderbeu, një shembull gati universal i luftëtarit të lirisë, i nderuar në botën mbarë me përmendore jo vetëm në Tiranë, Prishtinë e Shkup, po gjithashtu në Romë, Bruksel, Gjenevë, Detroit, Buenos Aires.

Të tjera përmendore për Skënderbeun janë projektuar të ngrihen në Londër, Varshavë, Melburn, Manila etj. Kur shqiptarët kanë kontribuar kaq shumë për qytetërimin e njerëzimit, përse pak njerëz në botë janë të ndërgjegjshëm për këtë, përkundrazi shumë as nuk kanë dashur ta pranojnë këtë realitet?Duhet thënë se një gjë e tillë shpjegohet edhe nga izolimi relativ jo pa qëllim i shqiptarëve nga komuniteti ndërkombëtar, dhe në mënyrë të veçantë nga ai evropian, që nga Kongresi i Berlinit e këtej (1878). Në të vërtetë pas mundjes së turqve në luftën ruso-turke, shtypi ndërkombëtar filloi punën për të injoruar shqiptarët duke i ndërruar emrin gadishullit të dikurshëm të Ilirisë të banuar që nga kohët parahistorike dhe deri në ditët e sotme nga ilirianët, shqiptarët.

Atë e pagëzuan me emrin e ri që ka edhe sot, Gadishulli i Ballkanit, vetëm duke u nisur nga vargu i maleve Ballkan. Përse iu vërsulën shqiptarëve? Pjesa më e madhe e diplomacisë konservatore evropiane ka përdorur termin pexhoratif “turq” për t’i cilësuar si turq të gjitha komunitetet myslimane në Ballkan, edhe pse shumica prej tyre nuk janë aspak turq. Evropa ka mbështetur dhe ka zmadhuar tokat e Greqisë, të Serbisë dhe të Malit të Zi, në kurriz të shqiptarëve. Asnjëra nga fuqitë e mëdha evropiane nuk e ka mbështetur çështjen shqiptare, kur shqiptarët krijuan Lidhjen e Prizrenit për të mbrojtur çështjen e tyre të drejtë kundër vendimeve të Kongresit të Berlinit. Ata u lanë në baltë nga të gjithë.

Viti 2018 është viti më i nxehtë nga 1800

Published: 8 oktober 2018

Viti 2018 (deri më 30 shtator) ishte viti më i nxehtë për Italinë që nga 1800, me një temperaturë më të lartë se 1.53 gradë në krahasim me mesataren.

Kjo është ajo që lexohet në një dosje Isac-Cnr lidhur me temperaturat e regjistruara në nëntë muajt e parë të vitit.

“Duhet theksuar, thotë klimatologu Michele Brunetti, duke shtuar se veçanërisht muaji prill shënoi rekordin si muaji më i nxehtë ndonjëherë.

“Është e qartë, shton Brunetti, se  të dhënat përditësohen nga muaji në muaj dhe për të thënë me siguri nëse 2018 ka qenë për Italinë viti më i nxehtë që prej vitit 1800, do të duhet të presim deri në fund të vitit”.

Dy djemë të ri nga Kosova rihen brutalisht në Serbi

Published: 8 oktober 2018

Një ngjarje e rëndë u ka ndodhur dy shqiptarëve nga Kosova, në natën e së dielës, në Serbi. Ata janë rrahur brutalisht, në një rrugë, në qytetin e Novi Sadit.

Njëri prej të lënduarve, sipas mediave të atjeshme, është në gjendje të rëndë dhe po lufton për jetë.

Gazeta Express ka mësuar se bëhet fjalë për Çlirim Malokun, i cili në qytetin serb ka shkuar vetëm pak kohë më parë, për të punuar.

Maloku është furrtar, nga Hasi i Kosovës, dhe është punësuar në një furrë buke nga një shqiptar, po ashtu nga Hasi, në Novi Sad.

Sipas Shoqatës së Shqiptarëve në Novi Sad, Maloku “është në rrezik për jetën, pasi ka të thyer eshtrat e kokës dhe ka gjakderdhje në tru”.

Shqiptari tjetër i rrahur në qytetin serb është po ashtu furrtar – dhe është i biri i pronarit të furrës së bukës, ku është punësuar Maloku.

Mediat serbe e kanë identifikuar atë me inicialet G.B. Familja e tij, sipas informatave të Gazetës Express, jeton në Novi Sad prej disa dekadash.

Që të dy shqiptarët e rrahur janë lindur në vitin 1999, ka bërë të ditur Policia serbe në Novi Sad.

Presidenti i Serbisë, Aleksandar Vuçiq, të hënën e ka dënuar ashpër sulmin ndaj dy të rinjve shqiptarë.

Vuçiq ka thënë se me të dëgjuar për lajmin, ka kërkuar nga Policia që urgjentisht ta zgjidhë rastin, të gjenden sa më parë autorët dhe ata të marrin dënimin e merituar.

Edhe prefekti i Novi Sadit, Milosh Vuçeviq, e ka dënuar këtë sulm


Propozim për ndryshimet Kushtetuese për ndërrimin e emrit të Maqedonisë në Kuvend

Published: 8 oktober 2018

Qeveria e Maqedonisë ka miratua dhe dorëzuar në Kuvend, propozimin për ndryshimet kushtetuese që kanë të bëjnë me ndryshimin e emrit.

Zëdhënësi qeveritar, Mile Boshnjakovski theksoi se i mbetet deputetëve që të hapin rrugën e integrimit të vendit drejt NATO dhe BE. Ai bëri të ditur edhe ndryshimet që do të bëhen dhe kjo nënkupton që emrit Maqedoni ti shtohet e Veriut, pra Maqedonia e Veriut.

Në preambulën e Kushtetutës do të përfshihen edhe dokumente konkrete të Kuvendit antifashist të Maqedonisë së çliruar popullore (ASNOM).

Në nenin 3 nënvizohen garancitë e kufijve territorial, ku theksohet se kufijtë janë të paprekshëm dhe se vendi nuk ka pretendime territorial ndaj fqinjëve.

Neni 4 përfshin përkujdesje për diasporën maqedonase dhe qytetarët e tjerë të Republikës së Maqedonisë Veriore që jetojnë jashtë shtetit.

Propozimi është publikuar në faqen e Qeverisë, por vetëm në versionin maqedonisht dhe jo shqip e anglisht.
Lexo më shumë në: https://www.gazetaexpress.com/lajme/ja-cfare-permban-propozimi-per-ndryshimet-kushtetuese-per-nderrimin-e-emrit-te-maqedonise-583347/?utm_source=referral&utm_medium=web&utm_campaign=copyright

Të vdekurit dhe votuesit fiktivë e fundosën Maqedoninë

Published: 1 oktober 2018

Muhamer Pajaziti-Referendumi i fundit në Maqedoni dëshmon se ky vend nuk ka gjasa të ketë 1 milion e 800 mijë votues.

Kjo dëshmohet edhe me faktin se në disa qytete numri i popullsisë është gati i barabartë me numrin e votuesve. Ndërkaq, jo rrallë herë organizatat jo qeveritare kanë raportuar se në listat zgjedhore vazhdojnë të jenë të pranishëm rreth 200 mijë votues fiktivë dhe të vdekur. 

Tendencat e politikës dhe institucioneve maqedonase për ta ulur numrin e votuesve shqiptarë duke fryrë listat në zonat maqedonase ishte kurthi që ranë vet maqedonasit, duke dështuar në referendum dhe duke e futur shtetin në një ‘qorr sokak’.

Por, pse Maqedonia nuk e realizon regjistrimin e popullsisë? 

Deri në regjistrimin e ardhshëm, Maqedonia do ta shënoj një rekord të paparë botëror – ajo është vendi i vetëm në Evropë në të cilin nuk është realizuar regjistrimi i popullsisë afër dy dekadave, njofton agjencia e lajmeve INA.

Por sa banorë ka Maqedonia? Askush nuk e dinë e saktë. Sipas një vlerësimi të Entit Shtetëror të Statistika në Maqedonia 2.072.490 banorë, ndërsa dendësia e popullsisë është 80.6 banorë në kilometër katror.

Por, këto nuk janë statistika të sakta dhe zyrtare për faktin se tashmë 16 vite nuk është bërë regjistrimi i popullisë, edhe pse një gjë e tillë është kërkuar nga Bashkimi Evropianë.

Drejtori për bashkëpunim ndërkombëtar në Eurostat, Pjeter Everaers, ka thënë se regjistrim i popullsisë nuk është politikë, por një operacion statistikor i cili duhet të regjistroj personat që gjenden në territorin e caktuar dhe që nuk kanë munguar për më shumë se një vit. Sipas regjistrimit të vitit 2002 në Maqedoni jetojnë 2.022.547 banorë, prej të cilëve 65 % maqedonas, 25,17 % shqiptarë, 3,85 % turq, 2,66 % romë, 1,78 serb % dhe komunitete tjera pakicë.

Organizatat ndërkombëtare, por edhe ato vendore kërkojnë që të realizohet regjistrimi për të pasur një pasqyrë të saktë për popullsinë si dhe aspektet se sa komunitete jetojnë, si janë trendet ekonomike dhe sociale si dhe shumë çështje tjera.

Por problem në vend është edhe fakti se sa është numri i votuesve në Maqedoni, pasi që nga 2,1 milion banorë, rreth 1, 8 milion janë votues.

Kjo, siç raporton Ina, shifër është konsideruar tejet si joreale dhe ka nxitur debate të vazhdueshme.

Profesori universitar Abdulmenaf Bexheti, i cili në vitin 2011 dha dorëheqje nga detyra e nënkryetarit të Komisionit Shtetëror të Regjistrimit ka theksuar se qasja e institucioneve tregon se nuk ka gatishmëri për organizimin e regjistrimit si një operacion transparent.

Regjistrimi i popullsisë në Maqedoni do të realizohet në vitin 2020, nga 1 e deri më 21 prill.

Për këtë proces do të angazhohen pesë mijë regjistrues, kurse do të ketë një kombinim metodash, pra do të shfrytëzohen të dhënat në terren dhe ato në regjistër.

Vlerësohet se ky regjistrim do të kushtojë 8,5 milionë euro.

Nga Organizata për Bashkëpunim Rajonal dhe Integrime Evropiane thonë për agjencinë e lajmeve INA se nëse vazhdon trendi i largimit të të rinjve, deri në vitin 2020, Maqedonia do të ketë numër më të vogël të banorëve se sa në vitin 2002.

Nga OBRIE theksojnë se rreth 200 mijë të rinjë maqedonas kanë pasaporta bullgare, duke mos dashur të identifikohen me shtetin që nuk u ka dhënë asnjë përspektive.

Sipas OBRIE-s, edhe të rinjtë shqiptarë e kanë braktisur vendin për vite me rradhë por vazhdojnë të investojnë në vendlindjet e tyre. Një pjesë e tyre nuk kanë ardhur me vite, dhe sipas kritereve akoma nuk dihet nëse do tu lejohet të regjistrohen. 

Sipas rregullva të Eurostatit normalisht, regjistrim i popullatës dhe shtëpive kryhet në çdo dhjetë vjet. 

Eurostat ka rregulla të standardizuara për zbatimin e regjistrimit dhe se nuk do të lejoj që regjistrimi të zbatohet sipas dëshirave politike. (INA)

‘Telekom Albania’ del në shitje, i afrohet ‘Telekom Serbia’

Published: 28 september 2018

Sipas Tv Klan, ‘Telekom Albania’ është në shitje. Operatori i dytë më i madh në treg i telekomunikacionit do t’i shitet kompanisë ‘Telekom Serbia’.

Në garë me Telekom Serbia janë edhe dy kompani bullgare, Vivacom, në pronësi të biznesmenit Spas Rusev dhe Globul Telenor, një tjetër operator në fushën e telekomunikacionit në Bullgari. Propozim për blerjen e aksioneve të Telekom në Shqipëri ka bërë edhe manjati grek Vardi Vardinogiannis, pronar i firmave Motor Oil Hellas dhe Vegas Oil and Gas.

Kompania ende nuk ka shpallur një lëvizje të tillë në pronësinë e kapitaleve të saj, por burime konfidenciale për televizionin Klan thonë se ofertat e dorëzuara nga të gjitha shoqëritë janë hapur, dhe më e larta ka rezultuar ajo grupit serb.

Mesazhi i shefes së CIA-s, politikanëve shqiptarë po ju vjen fundi, SHBA përgatit goditjen e madhe

Published: 28 september 2018

CIA shpall bosët e drogës dhe politikanët e lidhur me ta armikun numër një për SHBA, droga ka vrarë më shumë amerikanë se të gjitha organizatat terroriste, plan për goditje të pamëshirshme të kapove të drogës dhe politikanëve të lidhur me trafiqet dhe në Shqipëri

CIA amerikane, tashmë nën drejtimin Gina Haspel, do të nisë një aksion të ri, afatgjatë, të gjithanshëm dhe të pamëshirshëm në të gjithë botën, kundër kultivimit dhe trafikimit të të gjitha llojeve të drogës. Lufta e CIA-s do të përqendrohet edhe në Evropë, duke goditur bosët e trafiqeve dhe politikanët që i mbështesin.

Vendimi për aksionin e ri është marrë pas një analize të hollësishme, ku ka rezultuar se droga ka vrarë më shumë amerikanë se sa të gjitha organizatat terroriste në botë së bashku. Ky studim i bën bosët e drogës në të gjithë vendet, bashkë me politikanët dhe qeveritë e lidhura më ta, armikun numër një për Shtetet e Bashkuara të Amerikës.

Duke folur për strategjinë, Gina Haspel, është shprehur: “Asnjë sfidë e huaj nuk ka patur një ndikim më të drejtpërdrejtë mbi familjet dhe komunitetet amerikane sesa rrjedha e opioideve dhe ilaçeve të tjera në vendin tonë. Kjo është arsyeja pse CIA do të investojë më shumë në përpjekjet tona kundër narkotikëve jashtë vendit për të luftuar këtë kërcënim të tmerrshëm, një që ka vrarë më shumë amerikanë se çdo terrorist ndonjëherë”.

Po pse strategjia e re e CIA-s do të përvëlojë politikanët shqiptarë dhe bosët e drogës nën hijen e tyre? Në të gjitha raportet e viteve të fundit të Departamentit Amerikan në Shtetit, Shqipëria është futur në rreth të kuq si vendi kryesor, përmes të cilit furnizohen me drogë të gjitha linjat e trafikut nëpër Evropë, por edhe linja drejt Shteteve të Bashkuara të Amerikës. Në raportin e fundit, DASH thotë: “Shqipëria mbetet një ndër vend burimet kryesore të marijuanës, por edhe rrugë tranziti për kokainën dhe heroinën, e destinuar për në vendet e Bashkimit Evropian”. Raporti e cilëson Shqipërinë si portën kryesore të shpërndarjes së heroinës në të gjithë Evropën. “Shqipëria prodhon dhe eksporton sasi të konsiderueshme të marijuanës duke qenë një vend burimi për të dhe një vend tranziti për kokainën dhe heroinën afgane”, thuhet në raport.

Në një tjetër raport të vitit 2018, Departamenti Amerikan i Shtetit, sigurisht bazuar edhe në informacionet e CIA-s, thotë se Shqipëria është vendi kryesor për pastrimin e parave të drogës dhe korrupsionit. Në raport thuhet: “Shqipëria ka një ekonomi të madhe cash dhe informale, me flukse domethënëse parash që hyjnë nga jashtë në formën e remitancave. Burimet kryesore të parasë kriminale vijnë nga trafiku i drogës, evazioni fiskal, kontrabanda dhe trafiku i qenieve njerëzore. Institucionet financiare kryejnë transaksione, të cilat përfshijnë shuma domethënëse parash që burojnë nga trafiku i drogës. Ndërtimi, veçanërisht në zonat bregdetare, projektet e biznesit dhe kumari janë metodat më popullore të pastrimit të parave në Shqipëri”.

Pra, për SHBA tashmë është e qartë se kush është vendi kryesor në Evropë për marijuanën dhe trafikun e drogërave të forta, për pastrimin e parave të pista dhe për politikanët e lidhur me drogën. CIA ka informacione të detajuara se si krerët e politikës shqiptare kanë përdorur pushtetin dhe institucionet shtetërore për të krijuar ‘Republikën e kanabisit” në Lazarat. CIA ka të dhëna të hollësishme se kush janë politikanët më të lartë shqiptarë që lejuan kanalizimin e të gjithë Shqipërisë dhe më pas pastrimin e parave të drogës. CIA dhe FBI kanë dosjet e plota për politikanët e lidhur ngushtë me bosët e drogës, për politikanë dhe pushtetarët që po u pastrojnë kapove të drogës paratë e pista, përmes tenderave dhe kontratave publike.

Shembulli më i qartë i kapjes së krerëve të shtetit nga bosët e drogës dhe trafiqeve, është edhe Eskobari i Ballkanit, Klemend Balili, i lidhur ngushtë me dy kokat e krimit dhe korrupsionit në Shqipëri, Ilir Metën dhe Monika Kryemadhin. Të gjitha ata që kanë ende dyshime, të shikojnë videot kur Ilir Meta mban një fjalim special gjatë inaugurimit të hotelit të Balilit në Sarandë, i ndërtuar me paratë e drogës, të shohin dokumentet se kush e emëroi Balilin drejtor dhe cili ministër i LSI i dha mbi 90 hektarë tokë bujqësore. Një tjetër shembull është deklarata publike e Sali Berishës që krijimi i Republikës së Drogës në Lazarat ka një vendim politik i tij. Një tjetër shembull është lidhje e Edi Ramës me kapot kryesorë të drogës dhe krimit në Shqipëri, të cilët i futi edhe në parlament dhe i vuri në krye të bashkive. Një tjetër shembull, është heshtja mafioze e Lulzim Bashës për sasinë rekord të kokainës së kapur në Durrës, ku pas operacionit kanë ndodhur disa vrasje mafioze.

SHBA, përmes ish-ambasadorit amerikan në Tiranë, Donald Lu, u ka dhënë disa mesazhe të forta krerëve të politikës shqiptare. Për mos kapjen e Balilit, Lu ka deklaruar: “Balili është një bos i fuqishëm i krimit të organizuar me lidhje politike. Për dy vjet, qeveria, policia dhe prokurorët nuk kanë pasur aftësinë ose vullnetin që ta arrestojnë”. Të mos kesh vullnet për ta arrestuar, do të thotë se mbron Balilin, je peng i tij apo ke lidhje të forta me të. Tashmë, pas disa vitesh paralajmërimesh përmes raporteve dhe deklaratave publike, si dhe shumë dokumenteve dhe letrave kofidenciale, CIA do të hidhet në veprim.

Vjen ekspertiza e “audio-përgjimit të Babales”, laboratori anglez: Materiali nuk është origjinal

Published: 26 september 2018

Laboratori anglez që kishte marrë përsipër ekspertizën e audiopërgjimit të publikuar nga Partia Demokratike për vëllanë e Ministrit të Brendshëm Fatmir Xhafaj, ka mbërritur në Prokurorinë e Përgjithshme, në Tiranë.

Në materialin që është në fazën e përkthimit për t’ju dorëzuar Krimeve të Rënda, ekspertët anglezë thonë se nuk mund të shprehen me siguri të plotë lidhur me vërtetësinë e bisedës dhe personat e përfshirë në të.

Kjo pasi sipas tyre, materiali i dërguar për ekspertim nuk ka qenë origjinal, por një kopje e regjistrimit i cili duket se ka pasur ndërhyrje.

Burime për Ora News kanë bërë me dije se sipas përgjigjes së mbërritur në Prokurorinë e Përgjithshme, materiali i dërguar nuk është origjinali që pretendohet se është regjistruar në Vlorë, madje dhe regjistrimi nuk është i plotë.

Për këtë arsye ekspertët në konkluzion rezervohen për të folur me 100 për qind në lidhje me origjinalitetin e regjistrimit.

Burime nga hetimi thanë se ekspertët e huaj kanë konstatuar se në bisedën e transmetuar ka shkëputje dhe ndërhyrje të zërave.

Gjithashtu ekspertët janë shprehur me përqindje edhe mbi kërkesën për përputhshmërinë mes zërit të Agron Xhafajt dhe atij që është në përgjim.

Përgjigja e ekspertizës ndodhet ende në Prokurorinë e Përgjithshme, ndërsa ende nuk ka mbërritur në Prokurorinë e Krimeve të Rënda pasi gjithë materiali është ende duke u përkthyer nga gjuha angleze.

Burime zyrtare të Prokurorisë së Përgjithshme dy ditët e fundit, nuk e mohuan mbërritjen e konkluzionit të ekspertizës nga Anglia, por as nuk e pohuan këtë fakt, shkruan Oranews.

Krahas përgjigjes së mbërritur nga ekspertët e huaj organi i akuzës ka marrë edhe rezultatet e qelizave telefonike te personave të përfshirë përgjim, vendet ku janë ndodhur në momentet kur janë bërë bisedat dhe më pas hetuesit kanë bërë edhe kryqëzimin e këtyre të dhënave.

Pas një analize të të gjitha fakteve pritet që Prokuroria e Krimeve të Rënda të marrë vendimin për ecurinë e çështjes.

Madje mësohet se për këtë dosje mund të ketë dhe të ndaluar pas shqyrtimit të plotë të saj.

Audiopërgjimi i cili tronditi politikën u publikua nga Partia Demokratike disa muaj më parë.

Sipas PD-së,  rasti ishte një investigim i gazetarit Jetmir Olldashi i cili kishte hetuar trafikun e drogës duke përdorur si bashkëpunëtor Albert Veliun, i njohur ndryshe në Vlorë edhe me emrin Babale.

Sipas Olldashit, ai kishte degjiuar se vëllai i Ministrit të Brendshëm kishte lidhje me trafikun e drogës dhe për të provuar këtë kishte infiltruar Albert Veliun, i cili kishte patur më parë njohje me Agron (Geron) Xhafën.

Ai ka pretenduar se biseda është bërë në lokalin e Agron Xhafajt në Vlorë, ku ky i fundit kishte pranuar të ndihmonte Babalen për një ngarkesë kanabisi drejt Italisë.

E gjithe biseda është kundërshtuar menjeherë nga vëllai i Ministrit të Brendshëm, i cili ka mohuar të ketë qenë ai në bisedë.

Agron Xhafaj bëri një kallzim në Prokurorinë e Tiranës, ndërkohë që menjëherë u vetëdorëzua në Itali për të vuajtur dënimin e dhënë atje ndaj tij.