Pas deklaratës së diskutueshme të ministres së Brendshme austriake Maria Fekter, se Arigona Zogaj mund të qëndrojë në Austri vetëm nëse ajo martohet me ndokënd, në skenë është paraqitur artisti i njohur austriak Alfons Haider, i cili i ofron Arigonës publikisht martesë. “Po ta dija se do t’i ndihmoj, unë do ta martoja Arigonën dhe kjo nuk do të ishte martesë për ta rregulluar lejen e qëndrimit, por do të ishte një bashkëshortësi e vërtetë nga zemra dhe me plot bindje”, ka deklaruar artisti dhe aktori i njohur austriak Alfons Haider në një emision të  realizuar nga Televizioni austriak shtetëror. Një këndvështrim krejtësisht tjetër ka pasur kryetari i Partisë Aleanca për ardhmërinë e Austrisë (BZÖ) Gerald Grosz, i cili vlerëson se rasti i Arigona Zogaj ka dëshmuar një keqtrajtim të azilkërkuesve. Nga ana tjetër, përkujdesësi shumëvjeçar i familjes Zogaj, nga Organizata joqeveritare ”Volkshilfe Oberösterreich” Christian Schörkhuber, ka shprehur keqardhje për vendimin e Gjykatës kushtetuese për të dëbuar Arigonën. Përndryshe, kthimi vullnetar i azilkërkuesve në Kosovë, starton me një ndihmë prej 370 eurosh për të rritur dhe 200 euro për persona të moshës nën dymbëdhjetëvjeçare, e cila nga “Caritasi” austriak shihet si absolutisht joadekuate.