Mediat sllovene kanë ngritur alarmin se ndeshja mes Sllovenisë dhe Shqipërisë mund të transformohet në një ndeshje “në shtëpi” për përfaqësuesen shqiptare. Konfirmimi vjen edhe nga ana e Federatës Sllovene, NHS, e cila ka bërë të ditur se janë shitur të gjithë biletat për sektorin e miqve, rreth 2400 të tilla në impiantin “Stozhice” të Lubjanës, që ka një kapacitet prej pak më shumë se 16 mijë vendesh.

“Biletat janë shitur mjaft mirë, ato që ishin caktuar për tifozët shqiptarë janë shitur të gjitha. Nëse ndeshja do të luhej tani, stadiumi do të kishte mbi 10 mijë spektatorë të pranishëm, ndoshta mund të luajmë në një impiant të mbushur”, konfirmoi për mediat sllovene zëdhënësi për shtyp i NHS, Matjazh Krajnik. Sipas sllovenëve, kjo do të thotë se në stadium do të jenë 2400 tifozë shqiptarë. Por, shifra e vërtetë, sipas tyre nuk është kjo, pasi rrezikohet që stadiumi të jetë i ndarë përgjysmë mes dy tifozerive, me shqiptarët që kanë siguruar bileta edhe për pjesë të tjera të stadiumit, jo vetëm për sektorin e miqve. Këtë fakt ua ka konfirmuar edhe Kliton Bozgo, transmeton Shqip, i cili ka bërë të ditur se vetëm ai personalisht ka marrë kërkesa për qindra bileta për këtë sfidë.

“Kërkesa për bileta mes shqiptarëve është jashtëzakonisht e madhe. Vetëm mua gjatë ditëve të fundit më kanë telefonuar rreth 300-400 bashkëkombës, duke më kërkuar bileta. Por nuk vijnë vetëm nga Shqipëria, ata do të vijnë nga e gjithë Europa: Belgjika, Franca, Austria, Italia… Është e vështirë të thuash se sa tifozë miq do të jenë në tribuna, por është e sigurt se do të jenë mbi 3 mijë”, ishin fjalët e ish-futbollistit të përfaqësueses shqiptare, që pjesën më të madhe të karrierës së tij e ka kaluar pikërisht në Slloveni. Fjalët e Bozgos kanë alarmuar sllovenët, pasi ish-sulmuesi u ka kujtuar se e njëjta gjë ka ndodhur në Oslo, ku Shqipëria fitoi 1-0 përballë Norvegjisë. “Kur Shqipëria luajti në Oslo, ishte një numër i madh tifozësh. Pas ndeshjes, trajneri i Norvegjisë, Egil Olsen, u ankua se ai nuk e dinte se ku po luante, në fushën e vet apo në Tiranë”, ishte thumbimi i Bozgos. Mediat sllovene kanë kujtuar se edhe në ndeshjen me Bosnjë-Hercegovinën, një situatë e tillë ishte përsëritur me tifozët miq, pasi në stadium ishin dëgjuar vetëm thirrjet nga tifozët e ekipit kundërshtar, të cilët kishin qenë më të shumtë në numër se ata vendas.