Presidenti Topi niset për të marrë pjesë në Samitin XIII Ekonomik Euro-Aziatik.

Publikuar: 4 Maj 2010

Luigj Shkodrani Lajme nga Shqipëria -4 maj 2010

Presidenti i Republikës, Prof. Dr. Bamir Topi, në krye të delegacionit zyrtar, u nis sot për në Turqi, ku do të marrë pjesë në Samitin XIII Ekonomik Euro-Aziatik që do të zhvillohet në datat 5-7 maj në Stamboll. Në këtë Samit të organizuar nga Fondacioni Marmara, do të jenë të pranishëm kryetarë shtetesh, ministra, akademikë dhe drejtues të dhomave të tregtisë dhe ekonomisë së vendeve nga Evropa Juglindore, nga rajoni i Detit të Zi dhe i Kaspikut, Kaukazi, etj.

Politikat euro-aziatike për zhvillimin dhe bashkëpunimin ekonomik, çështje të kapërcimit të krizës botërore ekonomike dhe financiare, politikat e zbatimit të projekteve të përbashkëta energjitike, rritja e prosperitetit për të gjithë vendet dhe e harmonisë mes popujve, janë disa nga temat kryesore që do të trajtohen nga pjesëmarrësit në këtë Samit. 

Gjatë punimeve të Samitit XIII Ekonomik Euro-Aziatik, Presidenti i Republikës do të mbajë fjalën në seancën plenare të hapjes në emër të personaliteteve të huaja së bashku me Presidentin maqedonas Ivanov. Po ashtu, Presidenti Topi pritet të zhvillojë një vizitë në Bashkinë e Shishlit, ku kryebashkiaku Mustafa Sarugyl do i dorëzojë Kryetarit të Shtetit shqiptar çelësin e qytetit, gjatë një ceremonie të posaçme.

 
Marre nga faqja e Presidentit.
 
Kryeministri Berisha takon delegacionin e rajonit të Friuli-Venecia-Guilias (FVG)

 

 –       Në kuadër të fuqizimit të partneriteteve për të koordinuar strategjitë rajonale në fushën e shëndetësisë dhe atë sociale ky rajon ofron mbështetje për Shqipërinë që zhvillimi t`i shërbejë mbi të gjitha integrimit europian.

 

Kryeministri Berisha priti sot një delegacion të rajonit të Friuli-Venecia-Guilias (FVG) të kryesuar nga drejtori i departamentit për shëndetësinë dhe politikat sociale. Zoti Vladimir Kosic,  e falënderoi Kryeministrin për takimin dhe i përcolli përgëzimet dhe një ftesë nga presidenti i rajonit z. Renzo Tondo.

 

Në kuadër të fuqizimit të partneriteteve për të koordinuar strategjitë rajonale në fushën e shëndetësisë dhe atë sociale ky rajon ofron mbështetje për Shqipërinë që zhvillimi t`i shërbejë mbi të gjitha integrimit evropian. Z. Kosic u shpreh se ndër prioritetet që ata kanë në politikat e tyre shëndetësore janë fusha e  onkologjisë, çështjet e personave me aftësi të kufizuar, kujdesi për nënën dhe fëmijën, teknologjia e avancuar biomjekësore, menaxhimi i sistemeve shëndetësore etj. Që prej vitit 1992 në spitalin  Burlo Garofolo janë trajtuar pacientë nga Shqipëria, por është i mirëpritur formalizimi i bashkëpunimeve në fusha të ndryshme me Ministrinë e Shëndetësisë.

 

Në përbërje të delegacionit ishte dhe zv/presidentja e Informest znj. Silvia Acerbi e cila informoi Kryeministrin për aktivitetin e agjencisë për zhvillim e bashkëpunim ndërkombëtar ekonomik dhe shprehu gatishmërinë për ta mbështetur Shqipërinë në projekte të ndryshme. Kryeministri shprehu mirënjohje në radhë të parë për ndihmesën në trajtimin e pacientëve shqiptarë si dhe theksoi se bashkëpunimi i tyre ofrohet në një moment shumë të rëndësishëm për shëndetësinë dhe reformën e saj.

 

Kryeministri u shpreh se vetëm pak ditë më parë kërkoi që të punohet për kalimin e shërbimit të  onkologjisë pranë QSUT-s në Institutin Onkologjik dhe se bashkëpunimi me qendrat më të mira të fushës në rajonin e FVG do t`i shërbejë jo vetëm diagnostifikimit e trajtimit më të mirë të sëmurëve por dhe përmirësimit të aktivitetit shkencor.

 

Duke vlerësuar përparësitë që ka ky rajon kryeministri Berisha u shpreh se çështja e personave me aftësi të kufizuar  është trajtuar me kujdes nga qeveria dhe për këtë kategori janë bërë investime të mëdha, megjithatë është shumë e mirëpritur ndihmesa e tyre.

 

Në fund të këtij takimi z. Kosic vlerësoi shumë ndjeshmërinë dhe kontributet konkrete të kryeministrit në fushën e shëndetësisë dhe reformat që po ndërmerren në Shqipëri dhe u shpreh se  ishte i impresionuar në gjetjen e gjuhës së përbashkët për problemet e nevojat e rrugëzgjidhjen e tyre. Kryeministri Berisha e siguroi z. Kosic se do të ndjekë me kujdes zbatimin e ecurinë e marrëveshjeve dhe projekteve me rajonin FVG.

Marre nga faqja e Kryeministrit.

Bulevardi “Dëshmorët e Kombit” pushtohet nga lodhja dhe ankthi


Një ditë mes grevistëve që i shtyjnë minutat me libra dhe domino

Eneida Jaçaj

Bulevardi “Dëshmorët e Kombit”, sheshi i dikurshëm i paradave dhe festave, orët e fundit ka nisur të pushtohet nga ankthi teksa brenda çadrave qëndrojnë të ngujuar 19 deputetët e PS-së dhe mbi 180 mbështetësit e tyre. Distanca me godinën përballë, ku punon kryeministri Berisha, është e “murosur” me forca policie që duken të rraskapitur nga orët e gjata të shërbimit dhe vapa përvëluese. Greva e urisë maratonë dje shënoi ditën e katërt të saj dhe në radhët e grevistëve që kanë filluar ta ndiejnë drobitjen në trup u shënua rasti i parë i urgjencës. Deputetja e PS-së, Klodiana Spahiu, u shtrua në spital. Por të ngujuarit nuk tërhiqen në kërkesën e tyre për të bërë transparencën e votës së lirë, betejë kjo e nisur të paktën 8 muaj më parë.

Mjedisi
Dita dhe nata në bulevardin “Dëshmorët e Kombit” janë njësoj për rreth 200 të ngujuarit në çadrat përballë godinës së Kryeministrisë. Që me nisjen e grevës së urisë janë marrë të gjitha masat: janë shtruar rreth 200 krevate portative, të kompletuara me çarçafë e jastëkë. Gjithashtu janë marrë të gjitha masat edhe për një natë të ftohtë. Kështu, janë sjellë jorganë dhe mund të ndizen edhe sobat me gaz për ngrohje në rast se nata është shumë e ftohtë. Pranë çadrës së madhe, në pjesën e jashtme të saj, afër Piramidës, janë vendosur disa tualete portative për burra dhe gra, ndërsa një depozitë e madhe u lejon atyre të mos u mungojë uji për t’u larë. Grevistët meshkuj mbajnë të veshura bluza të kuqe me simbolin kombëtar, shqiponjën, ndërsa femrat kanë preferuar të mbajnë bluza të errëta. Që në nisje të grevës i është kushtuar vëmendje shërbimit mjekësor për grevistët. Pranë çadrave qëndron një autoambulancë me një ekip prej dy mjekësh dhe një infermiere, të cilët ndjekin vazhdimisht ecurinë shëndetësore të grevistëve. Ekipi mjekësor kujdeset në mënyrë periodike, ku çdo tri orë kryhen vizitat e nevojshme.

Koha
Përveç bisedave shkëmbyese që kanë të bëjnë me hapjen e kutive, lojërat me letra, me domino, libra etj., janë ato që ndihmojnë 19 grevistët, së bashku me rreth 200 mbështetësit, të kalojnë kohën pa e ndjerë. Stafi mbështetës i ndihmon deputetët që t’u sjellin gazetat e ditës, ku të mund të njihen me ato çka shkruajnë gazetat. Gjatë gjithë ditës ata konsumojnë vetëm ujë. Me dhjetëra e qindra qytetarë të thjeshtë, të afërm dhe familjarë të të ngujuarve, rrinë pranë vend-fushimit, duke ofruar kurajë për grevistët. Gjatë ditës ata vizitohen edhe nga kryetari i Partisë Socialiste, Edi Rama, i cili bisedon me ta dhe vihet në dijeni për gjendjen e tyre shëndetësore.

Shqetësimet
Tashmë greva e urisë ka hyrë në ditën e pestë të saj dhe është e kuptueshme se gjendja shëndetësore e tyre sa vjen dhe bëhet më e komplikuar. Shqetësimet e para kanë filluar që në ditën e dytë të grevës së urisë, të cilat shfaqen me simptoma të tilla si dhimbje koke dhe marrje mendsh. Por, gjendja shëndetësore ka qenë më e vështirë për 2-3 veta, të cilët kanë probleme shëndetësore. Mes grevistëve që shfaqi shenja dobësimi është edhe deputeti Blendi Klosi. Sipas deputetëve grevistë, krijohen më shumë çrregullime gjatë momenteve të drekës, kur dhe temperatura është më e lartë, ndërsa gjatë natës situata është më e qetë për shkak të freskisë. Gjatë ditës së tretë grevistët janë vizituar nga mjeku kardiolog Sabit Brokaj, me karrierë të gjatë në PS dhe së fundi në LSI, tashmë i tërhequr nga politika. Gjatë vizitës që u ka bërë, Brokaj ka konstatuar se janë vënë re çrregullime të diabetit, të ekuilibrit, dhimbje barku dhe disa probleme të tjera. “Natyrisht, mund të ketë edhe më shumë shqetësime nga ato që paraqesin, pasi në aspektin moral ata mbahen aq mirë, aq fort, saqë edhe e maskojnë ndonjë shqetësim”, – është shprehur Brokaj. Kardiologu i njohur mbahet mend për përkujdesjen e tij dhe gjatë grevës së 10 deputetëve të LSI-së dhe PDK-së në nëntor 2008 për votën e lirë dhe ndryshimet në Kodin Zgjedhor.

Deputetja
Është detyruar të largohet me urgjencë për në spital një prej deputetëve grevistë të Partisë Socialiste. Në orët e para të mëngjesit të djeshëm, deputetja e qarkut të Durrësit, Klodiana Spahiu, ka shfaqur simptoma të lodhjes, këputjes së trupit, marrje mendsh dhe të vjella. Grupi mjekësor, i cili ndjek hap pas hapi gjendjen e grevistëve, pasi i kanë dhënë asaj ndihmën e parë në çadrat e improvizuara para Kryeministrisë, kanë vendosur dërgimin me urgjencë drejt Spitalit Ushtarak të deputetes Spahiu. Mjekët thanë se deputetja kishte komplikime në stomak, ndaj dhe kërkuan dërgimin me urgjencë për në spital. Rreth orës 03:10 të mëngjesit të së hënës, autoambulanca që ndodhej në sheshin para Kryeministrisë, në bulevardin “Dëshmorët e Kombit” bëri të mundur transportimin e saj në spital. Të pranishëm në ato momente pranë deputetes kanë qenë dhe kryetari i PS-së, Edi Rama, si dhe deputetët Gramoz Ruçi, Namik Dokle, Pandeli Majko etj. Përgjatë gjithë natës kryesocialisti Rama ka takuar deputetët dhe qytetarët grevistë në çadrat e improvizuara përpara Kryeministrisë dhe është interesuar për gjendjen e tyre shëndetësore. Por, nga ana tjetër, Ministria e Shëndetësisë nuk po mbulon me mjekë grevistët e Partisë Socialiste, kjo pasi, sipas autoriteteve të Ministrisë, selia rozë nuk ka bërë një kërkesë zyrtare për këtë shërbim, duke preferuar mbikëqyrjen nëpërmjet mjekëve privatë. Dikasteri i bluzave të bardha ka mbuluar me shërbim mjekësor 200 grevistët e ngujuar në çadrat para Kryeministrisë vetëm gjatë 24 orëve të para të protestës.

Trafiku
Por, me protestën dhe grevën e urisë së opozitës trafiku në Tiranë vazhdon të mbetet problem. Ditën e hënë nisi me probleme ndryshimi i itinerarit të lëvizjes nëpër akset kryesore të Tiranës. Devijimi i qarkullimit të automjeteve nga punimet në sheshin “Skënderbej” që prej disa javësh, por edhe bllokimi i bulevardit kryesor “Dëshmorët e Kombit”, kanë krijuar probleme më të mëdha. Një ditë më parë, drejtori i Policisë së Tiranës i ka kërkuar Edi Ramës, në postin e kryebashkiakut, që të lirojë bulevardin “Dëshmorët e Kombit” pasi bllokimi i tij sjell probleme në trafik.
Sot grevistët hyjnë në ditën e pestë të ngujimit dhe kur gjendja e tyre shëndetësore është gjithnjë e më e brishtë, askund nuk duken shenja të qarta të një afrimi politik mes palëve për t’u ulur në bisedime në lidhje me kërkesat dhe kauzën për të cilën janë futur në grevë urie deputetët dhe mbështetësit e PS-së.

Marre nga gazeta Albania

Replika deputetësh në Bruksel, PS-PD përplasen para eurodeputetëve

04/05/2010

Ylli Pata

Seanca e parë e Komitetit të Stabilizim-Asociimit. Situata e komplikuar, Mirel paralajmëron për pasoja

Në ditën e parë të punimeve të mbledhjes së Komitetit Parlamentar të Stabilizim-Asociimit ndërmjet BE-së dhe Shqipërisë është përcjellë në mënyrë direkte kërcënimi i Brukselit zyrtar se acarimi i krizës dhe moszgjidhja e saj do të ndikojë direkt në opinionin për statusin e vendit kandidat, që do të thotë shtyrje të mëtejshme të integrimit të vendit në BE. Deklaratat janë bërë në mënyrë të qartë nga kreu i delegacionit të Parlamentit Europian për Shqipërinë, Eduard Kukan, si dhe drejtori për Ballkanin Perëndimor në Komisionin Europian, Pierre Mirel. “Lajmet që vijnë nga Tiranë tregojnë se situata po bëhet gjithnjë e më shumë e komplikuar. Mendimi im është që zgjidhja duhet të bëhet në institucione demokratike, të cilat duhet të respektohen”, theksoi kreu i delegacionit, Eduard Kukan, i cili bëri të ditur se të gjitha apelet që kanë ardhur nga institucionet ndërkombëtare nuk po dëgjohen nga palët në vend. Ndërkaq, zyrtari i lartë i Brukselit, Pierre Mirel, deklaroi se “dua t’i bëj vetes një pyetje se në këtë fazë të procesit integrues të Shqipërisë, një grevë urie do të thotë të ecësh përpara në këtë fazë të procesit, kur ne po përgatisim opinionin për aplikimin tuaj në lidhje me anëtarësimin në Bashkimin Europian? Kjo nuk është një pyetje për analistët politikë, por në përputhje me kriteret politike që është funksionimi efikas i institucioneve demokratike. Si do t’i përgjigjeshim ne kësaj pike në opinionin tonë? Sigurisht që Parlamenti shqiptar nuk po funksionon prej tetë muajve dhe kjo do të reflektohet siç duhet në opinionin tonë”. Pas fjalimeve të drejtuesve të takimit ka nisur një përplasje deklaratash mes deputetëve të PS-së dhe PD-së në selinë e Parlamentit Europian, që është reflektuar më pas edhe nëpërmjet eurodeputetëve. Deputetja socialiste, Valentina Leskaj, deklaroi se greva e opozitës nuk është presion, pasi socialistët kanë dhënë prova që kërkojnë dhe duan një kompromis, ndaj kanë hyrë në Parlament dhe kanë njohur rezultatin legal të zgjedhjeve. Sipas Leskajt, ka qenë reagimi kryeneç i mazhorancës që e ka detyruar opozitën të hyjë në grevë urie. Pas Leskajt ka folur deputeti i PD-së, Jemin Gjana, i cili deklaroi se në “Shqipëri nuk ka krizë, por shah mat politik, ne jemi në ngërç që duhet ta zgjidhim sipas institucioneve. Nënkryetari i delegacionit të PE-së për Shqipërinë, Viktor Bostinaru, ka përkrahur protestën e opozitës dhe ka kërkuar që kriza politike të zgjidhet sa më shpejt, duke ulur në tryezë si mazhorancën ashtu edhe opozitën. Eurodeputeti rumun ka sjellë si shembull vitin 2001, kur zonja Doris Pack, atëherë kryetare e delegacionit, erdhi me mision special në Shqipëri për të gjetur konsensus mes mazhorancës dhe opozitës, që si rezultat solli zgjedhjen e Presidentit të Republikës dhe të Prokurorit të Përgjithshëm. Zonja Pack ka replikuar menjëherë, duke thënë se nuk ishin faktet ashtu siç tha parafolësi. Më pas ka nisur një përplasje mes deputetëve shqiptarë me tone të larta, duke sjellë klimën e seancave tona plenare. Në seancë janë zhvilluar replika në mes deputetëve të PD-së dhe PS-së. Por pjesa më e rëndësishme e takimit të Komitetit Parlamentar të Stabilizim-Asociimit do të zhvillohet ditën e sotme, ku do të diskutohet një draft-deklaratë e përbashkët, që do të miratohet në fund. Gjithashtu gjatë ditës së sotme do të ketë një deklaratë të posaçme edhe nga Komisioneri Europian për Zgjerimin, Stefan Fule, i cili do të mbajë një konferencë për shtyp. Në ditën e djeshme, është shpërndarë në mbledhjen e Komitetit edhe raporti i fundit i organizatës FRIDE. Deputeti socialist, Ditmir Bushati, ka deklaruar dje nga Brukseli për mediat se vihet re një rritje e temperaturës për atë që po ndodh në Shqipëri. Sipas Bushatit, disa eurodeputetë kanë deklaruar se ishte zoti Berisha shkaktari i situatës, pasi ai ishte edhe autori i zgjedhjeve problematike të vitit 1996.
 
Marre nga gazeta Shqip.
 
Greva nuk e pengon ëndrrën e shqiptarëve

Topalli

Asnjë grevë urie nuk mund ta prishë ëndrrën e shqiptarëve për liberalizimin e vizave. Kjo ishte deklarata që bëri dje kryeparlamentarja Jozefina Topalli, duke iu përgjigjur interesit të mediave për grevën e urisë së deputetëve socialistë dhe simpatizantëve të tjerë të PS-së. “Unë besoj se 22 veta apo 220 veta nuk mund ta prishin kurrë ëndrrën e liberalizimit të vizave”, deklaroi Topalli. Nisur nga kjo, Kryetarja e Parlamentit shprehu mirënjohjen për 12 ministrat e Jashtëm të BE-së, të cilët më 30 prill u dërguan një letër autoriteteve më të larta që kanë në dorë vendimin për liberalizimin e vizave. “Ministrat e Jashtëm të Bashkimit Europian, autoritetet kryesore, shohin se shqiptarët janë të vendosur për të ecur përpara në proceset për liberalizimin e vizave dhe për këtë natyrisht është e rëndësishme që dialogu të bëhet në Parlament”, theksoi kryeparlamentarja. Sipas Topallit, kryetari i PS-së, Edi Rama, nuk ka interes për dialog dhe se kjo ishte e trishtueshme. Nga ana tjetër, Topalli theksoi se incidenti me djegien e flamurit të NATO-s, ishte i paprecedentë. Por, sipas saj, pavarësisht se ishin disa militantë të Edvin Ramës që e dogjën këtë flamur, kjo nuk ka lidhje me shqiptarët, që janë njerëzit më pro NATO dhe më pro europianë në të gjithë rajonin.
 
Nga Shqip.
 
 

Flora, ekonomistja në grevën para kryeministrisë: Vajza ime më jep kurajë

Shekulli Online
 
Ekonomistja tregon se zhgënjimi i 20 viteve e ka detyruar të ndërmarrë masën më ekstreme, atë të përfshirjes në grevën e urisë, bashke me deputetet dhe mbeshtetesit e socialisteve

TIRANË – Qëndron në cepin e çadrës së madhe, atu ku prej katër ditësh ndodhen 200 burra e gra. Që kur opozita vendosi të ndërmarrë hapin ekstrem të betejës politike, Flora ka zënë qoshëzën e çadrës, paçka se vetëm katër metra rrugë e ndajnë nga kryeministria. Pikërisht në këtë qoshëz, janë mbledhur të gjitha gratë që marrin pjesë në grevën e urisë. Në fillim ishin dhjetë, e tash e tutje do të jenë 9 për shkak të përkeqësimit të shëndetit të Klodiana Spahiut. Por, duket se ky fakt nuk ka pezmatuar asnjë prej grave që vijon në kushte të rënda grevën e tyre. I ka bërë më të forta, aq sa të gjitha urojnë që shëndeti mos t’i braktisë deri në ditën e fitores.

***
Vendosi të futet në grevë urie e bindur që prej aty do të dalë me fitore. Për kërkesat që ka parashtruar opozita, Flora është gati të vetëflijohet, pasi për të, këto 20 vite nuk kanë qenë vitet për t’i harruar të jetës së saj. Ndaj ka braktisur familjen, (ajo është personi i vetëm që kujdeset në një shtëpi prej 6 anëtarësh) e bindur se vetëflijimi është rruga e vetme për të ndryshuar këtë vend. “20 vitet më të bukura të jetës sime më kanë kaluar në mjerim, varfëri dhe pa asnjë shpresë për të nesërmen. Unë nuk dua që fëmijët e mi të kenë të njëjtin fat, ndaj dhe nuk e kam menduar dy herë kur krerët e partisë që unë besoj se do t’i ofrojnë një të ardhme më të mirë të këtij vendi vendosën të ndërmarrin këtë hap”, – thotë Flora Hasanaj. Gruaja 45 vjeç është nënë e dy fëmijëve dhe për këtë vendim ka miratimin e familjes së saj. Flora të tregon, tejet e kënaqur, mesazhet e së bijës. Ajo jo vetëm e përkëdhel dhe i jep kurajë, por i thotë me plotë gojën sa krenare ndihet për të. Nuk është vetëm ajo dhe 8 gra apo 110 burra që prej katër ditësh tashmë kanë nisur luftën e tyre, jo vetëm kundër urisë. Ata kanë përkrahjen e familjarëve të tyre, e qindra e qindra njerëzve që jo vetëm i bëjnë të ndihen më krenar, por edhe të vlerësuar për sakrificën e tyre. Ndaj duket se jo vetëm Flora Hasanaj, por edhe të gjithë pjesëmarrësit në këtë grevë urie, luten në zë që shëndeti mos t’i braktisë deri në ditën e fundit.

______________

Leka, shkodrani në grevë urie me deputetët e PS
Historia e Lekës, shkodranit grevist që gjendja e keqe ekonomike e ka renditur mes grevistëve të opozitës
Nuk i ka kaluar të 40-at dhe tek e sheh ashtu të mbushur me thinja, të parruar dhe në gramat e para të urisë përnjëmend beson se është 60 vjeç. Vitet e mbijetesës më shumë se sa ngujimi prej 24 orësh kanë lënë gjurmët e tyre mbi supet e shkodranit. Leka është një prej 200 burrave që mbrëmjen e së premtes vendosën të ngujohen në kërkim të votës së liri. Por duket se ky është emëruesi i përbashkët i të gjithëve, pasi ashtu si dhe Leka të gjithë kanë një barrën e tyre të halleve, çka i ka sjellë gjithsecilin prej tyre në shesh, që kur opozita nisi udhën e saj të protestave.
Leka nis të rrëfejë arsyet përse ka vendosur të jetë një prej grevistëve të urisë të ngujuar përballë kryeministrisë, në mesin e bulevardit “Dëshmorët e Kombit”. Në orët e vona të natës çadrat e grevistëve janë rrethuar nga të afërmit e tyre. Ata kujdesen për shëndetin, apo edhe sjellin ndërresat e trupit. Askush prej grevistëve nuk del përtej kangjellave që rrethojnë çadrat, që orëve të vona të natës janë e vetmja mburojë e tyre. Nga larg i përshëndesin dhe mundohen më shumë se sa veten të mbajnë me gajret njerëzit e afërm, në sytë e të cilëve lexohet frika e së nesërmes. Mjekët thonë që gjendja e grevistëve është relativisht e mirë, shqetësimi lexohet në sytë e familjarëve.

Edhe të afërmit e Lekës gjenden aty, paçka se shkodrani të thotë se kjo punë do t’i dalë për mirë. “Kam gjashtë vjet pa punë, dhe dy fëmijë me një rrogë të gruas. Unë e di si ia dal, ndërkohë që në bazë të ligjit kam me vendim gjykate të drejtën për tu rikthyer në punë apo edhe shpërblimin për shkarkim të padrejtë nga puna”, – thotë Leka.

Lekë Njebza është ekonomist, dhe pikërisht varfëria ekonomike e ka sjellë në protestë. Po për këtë qëllim edhe të vetësakrifikohet, duke u shprehur se nuk do të heqë dorë deri në plotësimin e kërkesave të opozitës. Më shumë se sa uria mbi shpatullat e 40-vjeçarit duket se rëndon varfëria. Skamja dhe pamundësia e punës është bërë e papërballueshme për shkodranin.
Ndaj dhe Leka nuk e ka menduar dy herë, kur strukturat drejtuese të Partisë Socialiste vendosëm të përshkallëzojnë protestën e tyre. Ai është radhitur ndër 180 simpatizantët e Partisë Socialiste përkrah 22 deputetëve, në opozitën më të pazakontë të ndërmarrë nga opozita. Leka është i bindur që aty nuk do të dalë deri në përmbushjen e kërkesave. Duket se ky është vendimi i gjithsecilit prej tyre, ku hallet e përditshmërisë janë mbledhur aq shumë sa për tu ngujuar shi përpara kryeministrisë, dhe presin që e nesërmja ardhtë e bardhë për të gjithë shqiptarët.

********
Deshton antimitingu qeveritar

Ashtu sic edhe pritej, kanë deshtuar pritshmëritë e organizatorëve, në koncertin e sotem festiv të thirrur nga qeveria e Tiranes si antimiting ndaj protestes se opozites qe eshte shkallezuar ne nje greve urie masive.
Shumica e pjesemarresve, kane ardhur, kane nenshkruar ne listat prane zyrtareve te PD-se qe monitoronin pjesemarrjen nga qendrat e punes dhe jane larguar, duke qene se edhe njoftimet e para ishin se nuk do te kishte pjesemarrje dhe fjalime te politikaneve te qeverise.
Kur ka nisur koncerti, ne momentin qe po kendohej nje kenge me tekst “Shqiperia po marshon” etj, ne shesh nuk kishte me shume se 4 mije vete dhe tendenca ishte per tu larguar drejt Kodrave te Liqenit prane Sheshit Nene Tereza.
Duke pare kete zhvillim, eshte vendosur qe shesh te vije J.Topalli e pak me pas edhe vete Berisha megjithe deklaraten zyrtare te PD se nuk do kishte fjalime dhe pjesemarrje politike ne tribune. Pas fjalimit te ketij te fundit, turma eshte shperndare thuajse e gjitha, megjithese koncerti duhej te vazhdonte.
 
 

Protesta e PS, 3 grevistë rëndë Rama: S’ndalemi para kauzës Patozi: S’hapim kutitë
grevisttet e re
TIRANE- Gjëndja shëndetësore e njëzet e një deputetëve grevistë dhe 180 mbështetësve të tyre sa vjen e përkeqësohet. Ata vazhdojnë të qëndrojnë në cadrat e vendosura para godinës së Kryeministrisë, në Bulevardin “Dëshmorët e Kombit” në kuadër të protestës të nisur në datën 30 prill në betejën për përmbushjen e kauzës për transparencën e votave. Rama: Nuk ndalemi , “greva nuk bëhen për pushtet, por për të garantuar transparence”. Zv kryeminsitri Meta fton opozitën për dialog. Patozi: Kushtetuta nuk lejon hapjen e kutive

ORA 14.30 GJIKNURI REPLIKON ME PATOZIN: ASNJE VENDIM NUK NDAL HAPJEN E KUTIVE
Deputeti Damian Gjiknuri duke replikuar me Astrit Patozi tha sot se “PD po përsërit të njëjtat argumente dhe për këtë ndjen trishtim” . Gjiknuri përsëriti se nuk ka asnjë vendim gjykate që ndalon hapjen e kutive, se PS me hapjen e kutive nuk kërkon përmbysje të rezultatit por hetim të zgjedhjeve

ORA 14:20 DY DEPUTETE TE TJERE RENDE
Dy grevsitë janë transportuar për në spital gjatë ditës së sotme për shkak të rëndimit të gjendjes së tyre shëndetësore. Rreth orës 14:20 Romeo Sina pësoi gjendje të fikti dhe shtabi mjekësor i protestës vendosi dërgimin e tij me urgjencë për në spital. Sina shfaqi shenja të rënies së tensionit, marrje mendsh e më pas gjendje të fikti.
Ndërkaq më herët 50 vjecari Ramazan Ceka nga qyteti i Elbasanit u transportua me urgjencë për në Spitalin Ushatarak për shkak të përkeqësimit të gjendjes së tij shëndetësore. Transportimi i grevistit për në spital është kryer në prani të kryetarit të Partisë Socialiste Edi Rama, i cili më herët ka takaur grevistët dhe është interesuar për gjendjen e tyre.
Në një prononcim për mediat, deputeti grevist i PS për qarkun e Elbasanit Agim Leka shprehet se ata janë të vendosur për t shkuar deri në fund sakrificës së tyre për votën e lirë.
“Sali Berisha të kuptojë që ne po bëjmë një sakrificë në emër të të drejtave të njeriut, në emër të një demokracie me standarde europiane. Dhe për të arritur këtë, gjëja me e thjeshtë që duhet të bëjë kryeministri i Shqipërisë është të hapë kutitë.” u shpreh Leka. 

ORA 14:00 PD, PATOZI: HAPJEN E KUTIVE E NDALON KUSHTETUTA
Kryetari i Grupit Parlamentar të PD-së deklaron se “hapja e kutive ndalohet nga Kushtetuta dhe kërkon të respektohet ndarja e pushteteve” . reagimi vjen menjëherë pas deklaratës së sotme kryetarit të PS-së i cili këmbëgul se greva nuk do ndalet pa bërë transparencë të plotë të zgjedhjeve nëpërmjet hapjes së kutive.

“Hapja e kutive ndalohet nga neni 20 i Kushtetutës”- tha Patozi duke shtuar se -edhe vendimi i Gjyk.Apelit ndalon hapjen e kutive. Sipas tij vendimet janë nga dy nivelet supreme të Gjyqësorit

ORA 13:30-RAMA: NUK NDALEMI SE NUK PROTESTOJMË PËR INTERES

Para cadrave të grevistëve, Kryetari i Partisë Socialiste bëri të ditur në një komunikim me shtypin sot se protesta me grevë urie nuk do të ndalet pasi qëllimi është një kauzë e madhe dhe jo interesi.
Rama këmbënguli se opozita do ta vazhdojë protestën e saj pa u shkurajuar nga cinizmi i kujtdo qoftë. Kryetari i socialistëve theksoi se “greva nuk bëhen për pushtet, por për të garantuar transparence”.
“Ne nuk jemi në këtë protestë për interes, por për të ransformuan kauzën e madhe në reaitet. Pasi Kauza jonë është aspirate e popullit. Dhe kauza jonë është lufta e një sëmundje që ka përhapur metastazat e korrupsionit që po përmbyt përditë. Kjo është një kauzë e madhe sa aspirate jonë e madhe për shqipërinë e përbashkët, pa u luhatur nga presionet dhe nga cinizmi i kujtdoqoftë”.

Lideri i opozitës insistoi se nga ana e mirëqënies të gjitha vendet e rajonit janë më mirë se Shqipëria ndërsa kryeministri ynë flet për një vend që ka bërë zili edhe Kinën dhe Francën”.
“Ky është një pushtet i cili njësoj si në të shkuarën kur pushteti buronte nga dhuna e proletariatit i thotë popullit je i lumtur se je i pasur”, theksoi Rama. 

ORA 11:35 META OPOZITA TE REFLEKTOJE. ZGJIDHJE PERMES DIALOGUT
Zv kryeministri dhe njëkohësisht ministër i Jashtëm Ilir Meta ftoi sot drejtuesit e PS për më shumë përgjegjësi dhe për një zgjidhje demokratike për kapërcimin e kësaj situate përmes “dialogut”.
Meta tha se dhe shpresonte në reflektimin e drejtuesve të PS “për më shumë përgjegjësi” pasi “greva nuk ndihmon ecjen përpara të vendit,por krijon një barrikadë artificiale që nuk është në interesin e integrimit të vendit”-  tha sot  në një konferencë për shtyp në ambientet e ministrisë së Jashtme.
“Ky është momenti për dialog dhe zgjidhje që vijnë përmes dialogut dhe respektimit të institucioneve. Krijimi dhe konsolidimi i institucioneve është vepër dhe meritë e gjithë forcave politike, ashtu sikurse edhe magësitë e tyre”, tha Meta, duke u shprehur për rivendosjen e një dialogu të shpejtë për të kaluar këtë situatë. Duke e konsideruar këtë një moment të rëndësishëm për vendin, Meta kërkoi që të gjithë të investohen në mënyrë pozitive.”Vendosja e alternativave që janë bërë publike për të zgjedhur midis jetës apo vdekjes nuk i shërbejnë askujt, pasi në këtë vend të gjithë kanë zgjedhur alternativën e integrimit në Bashkimin Europian. Unë besoj se kjo është zgjedhje dhe e PS-së”, tha Meta.
Ai shprehu besimin se “ekzistojnë hapësira të mjaftueshme për një zgjidhje demokratike dhe transparente, por edhe në respekt të Kushtetutës dhe parimeve të shtetit të së drejtës”. Në këtë kontekst, Meta ftoi të gjithë palët që të marrin mbi vete shumë përgjegjësi, ndërsa konfirmoi vullnetin e qartë të qeverisë për dialog.

ORA 11.30: NJE QYTETAR GREVIST DERGOHET NE SPITAL. BROKAJ: DIABETIKET TE NDERPRESIN GREVEN
Në orën 11. 30 minuta një nga grevistët, qytetar nga Elbasan është dërguar me urgjencë në Spitlin Ushtarak. Mjeku Sabit Brokaj thotë se Ramazan Caka vuante nga diabeti dhe kishte rënie të glicemisë së sheqerit në gjak.
Duke përshkruar situatën e grevistëve, Brokaj tha se “gjëndja shëndetësore sot është më e rënduar dhe lidhet drejtëpërdrejtë me kohëzgjatjen e një greve jashtëzakonisht strikte”. Sipas tij momentet më kritike u manifestuan te deputetja Klodiana Spahiu, e cila një ditë më parë u shtrua në spital me komplikacione në stomak.
Brokaj tha se rekomandonte daljen nga greva të të gjithë diabetikëve, ndërsa në përgjithësi tek të gjithë grevistët vihen re shenja të uljes së tensionit. Vete kryetari i PS-se Edi Rama dhe emra të tjerë të njohur të PS vizitojnë grevistët.

ORA 10:58 GJONI: NUK LEVIZIM NGA BULEVARDI PA HAPUR KUTITE
Deputeti socialist Ilir Gjoni deklaroi për NEWS24 se opozita “nuk do të largohet nga sheshi pa arritur një zgjidhje” që ka të bëjë me transparencën e plotë të zgjedhjeve. “Jemi këtu për t’i dhënë mesazh qeverisë se jemi të vendosur për të kërkuar transparencë” tha deputeti socialist .
Gjoni tha se gjëndja e grevistëve është rënduar, sidomos të atyre që vuajnë nga diabeti. “Ekipi i mjekëve po monitorojnë situatën” – tha Gjoni duke shtuar se “është vendimi individual nëse ata duan të largohen nga greva apo të vazhdojnë” .
Deputeti socialist e cilësoi “cinike” kurajon e kryetares së Parlamentit për të vizituar mbrëmë në spitalin ushtarak deputeten socialiste Klodiana Spahiu e cila u detyrua të ndërpresë grevën për shkak të komplikacioneve në stomak.
“Topalli të heqë dorë nga truku dhe permanenti dhe të gjejë një zgjidhje“- bëri apel Gjoni

ORA 08:30-DADE: GJENDJA E GREVISTEVE PO RENDOHET, POR MORALI I LARTE
Deputetja Socialiste Arta Dade duke informuar për gjendjen shëndetësore të grevistëve sot në mëngjes tha se ata kanë pasur probleme me tensionin dhe dhimbjet e kokës. “Problem kanë shfaqur deputetët dhe personat të cilët vuajnë nga diabeti- sqaroi Dade në një prononcim për NEWS24- dhe shtoi se gjatë ditës së sotme do të vendoset nëse këta persona do ta vazhdojnë grevën.
“Jemi të impresionuar për moralin e lartë”- vazhdoi Dade dhe konfirmoi se grevistët do të asistohen gjatë 24 orëve.
Deputetja socialiste informoi se PS e cila është në kontakt me institucionet europiane për ti shpjeguar situatën aktuale në Shqipëri, po përballet me një makineri mashtruese.
Dade tha më tej se opozita është e vendosur ti shkojë deri në fund kauzës
“Ka hyrë 1/3 e grupit parlamentar, 2/3 e deputetëve janë jashtë. Ne të gjithë kemi shprehur gadishmërinë për të hyrë në grevë”

ORA 07:10 HYSI: BERISHA QENDRIM CINIK NDAJ GREVISTEVE
Deputetët e Partisë Socialiste dhe 180 mbëshetësit e saj kanë kaluar natën e katërt të grevës së urisë. Deputetja e PS, Vasilika Hysi në një intervistë për NEWS24 gjatë orëve të natës (4 maj) deklaroi se gjëndja shëndetësore e grevistëve është përkeqësuar. Ata kanë dhimbje koke, por janë të vendosur t’i shkojnë gjer në fund kësaj proteste.
Hysi tha se është “për të ardhur keq për qëndrimin cinik” që po mban kryeministri Berisha ndaj grevës së socialistëve.
“Më ka ardhur rëndë kur 201 persona janë në grevë urie, dhe kur kolegia jonë ishte shumë rëndë në spitalin ushtarak, qeveria dhe kryeministri diskutonin cështje që janë shumë të rëndësishme por nuk ishte momenti për të diskutuar sot. Ajo është cinizmi më i madh, tallja më e madhe që i është bërë popullit sot.”- tha deputetja PS

Ajo u shpreh se nuk ka asnjë vendim gjykate që pengon transparencën e zgjedhjeve dhe se “ajo që bëhet sot është të gënjesh të luash me ato terma që ndërkombëtarët i pëlqejnë sic është reskeptimi i Kushtetutës, respektimi i vendimeve të gjykatave”

3 MAJ ORA: 19:41- RAMA: ASNJE VENDIM GJYKATE NUK PENGON TRANSPARENCEN
Në ditën e katërt të grevës së urisë, kryetari i socialistëve Edi Rama shpreh, përpara mbështetësve të mbledhur pranë cadrave të ngritura në bulevard, vendosmërinë e opozitës për të mos e ndalur betejën deri në përmbushjen e kauzës për transparencën e votave.
Rama e nisi fjalimin e tij këtë pasdite me mirënjohjen për deputeten Klodiana Spahiu, e cila u nis mëngjesin e sotëm për në spital për shkak të komplikacionevene stomak të ardhura nga mungesa e ushqimit.

“Sot dita për ne nisi me një barrelë pa u gdhirë, kur la kampin e grevës për të shkuar në spital deputetja Klodiana Spahiu, e cila nuk deshi të na dëgjonte dhe u fut në grevë pavarësisht një problemi të vjetër në stomakun e saj. Unë i përulem me mirënjohje Klodit” u shpreh Rama.

Kryesocialisti komentoi reagimin e sotëm të kreut të qeverisë në lidhje me aksionin e opozitës duke i bërë thirrje Berishës ti tregojë popullit vendimin e gjykatës që ndalon transparencën, që sipas Ramës nuk ekziston.

“Berisha përsëriti gënjeshtrën se transprencën e pengon vendimi i gjykatës . Tregoja popullit vendimin e gjykatës që, po mandatin tënd e ke me vendim gjykate. Vendim gjykate që ndalon transparencën nuk ka” u shpreh Rama.

Kryetari i opozitës , duke folur në kuadër të ditës së shtypit, ka akuzuar qeverinë për kontrollin e Televizionit Publik Shqiptar duke paralajmëruar pezullimin e pagimit të taksës nga ana e popullit opozitar.

“Paralajmëroj sot publikisht tutorin e TVSH, se nëse shfaqja e ulët e TVSH nuk ndërpritet, atëherë do të ndalet kontributi i cdo votuesi opozitar për të”, shtoi Rama.
(s.g/BalkanWeb)
 
 

Greqi, 18 emigrantë në grevë urie: Të hapen kutitë, të ikë Berisha

Shekulli Online
 
ATHINË- Grevës së urisë së deputetëve të PS-së dhe mbështetësve të tyre në Tiranë i janë solidarizuar 18 emigrantë shqiptarë në Athinë.
Në një apartament të Athinës, 18 shqiptarë janë ngujuar në solidaritet të grevës së PS-së për transparancë.

Lajmin e ka njoftuar emigranti Skënder Hysa, që jeton prej 21 vitesh në Greqi. Ai ka deklaruar në linjë telefonike për “News 24”, se do të dijë se kush ka votuar në emër të tyre.

“Kemi dy kërkesa kryesore, të hapen kutitë brenda datës 10 dhe të largohet Sali Berisha nga drejtimi i qeverisë”- ka thënë ai.

Hysa ka sqaruar se nuk përfaqësojnë asnjë lëvizje socialiste, por janë solidarizuar pas protestës mbarëpopullore e madhështore të 30 prillit në Tiranë.

 
 

Fule: Situata politike ne Shqiperi eshte perkeqesuar
 
Fule: Situata politike ne Shqiperi eshte perkeqesuarBRUKSEL- 

ORA 11:50-FULE: SHQIPERIA NEVOJE PER REFORMA KOKRETE
Komisioneri për Zgjerim në Bruksel, Stefan Fule këshilloi sot se Shqipërisë i nevojiten reforma konkrete, ndërsa komentoi si jo pozitive situatën politike në vendin tonë.
“Situata nuk ka ndryshuar, është përkeqësuar dhe derisa një zgjidhje të mos gjendet të gjithë partitë politike mbajnë përgjegjësi. Kjo nuk do të krijonte një atmosferë pozitive, teksa ne po finalizojmë opinionin tonë për Shqipërinë”.- deklaroi Fule.
Në vazhdim të marrëveshjes së stabilizim-asociimit, në vendin tuaj nevojiten reforma konkrete, masa të reja. Duke i mëshuar mesazhit se Shqipëria duhet të punojë fort për reformat, Fule solli si shembull pikërisht implementimin e strategjisë antikorrupsion.
“Shqipërisë i duhet të implementojë rigorozisht legjislacionin dhe strategjinë antikorrupsion, si dhe një kuadër ligjor në lidhje me luftën e krimit të organizuar dhe të sigurojë kapacitete të mjaftueshme. Në të dyja fushat duhen arritur rezultate konkrete dhe të arritshme.”- vazhdoi Fule ne  Komitetin Parlamentar të Stabilizim- Asociimit Shqipëri- BE.
“Shqipëria duhet të krijojë dhe të zbatojë një strategji për reformat në sistemin e drejtësisë pasi më shumë përpjekje duhet të bëjen për të siguruar një system të drejtësisë eficent dhe në respect të principeve të rëndësishme, transparenca, pavarësia dhe përgjegjshmëria. KJo është pjesë e kërkesave kyce dhe cështjeve të cilat duhet të ndërmerren në këtë fazë të procesit.”.- nënvizoi Komisioneri Europian per Zgjerimin.
Fule përshëndeti hapat e ndërmarrë nga Shqipëria për të informuar qytetarët mbi liberalizimin e vizave. “Do të doja të nënvizoja rëndësinë e kësaj me qëllim mos përsëritjen e situatës që ndodhi kohët e fundit me vendet e tjera të Ballkanit.” Fule i referohet periudhës pas liberalizimit të vizave për Maqedoninë, Malin eZi dhe Serbinë, dhjetor 2009, kur mijëra qytetarë mësyn shtetet europiane për të kërkuar azil. Kjo situatë u pa me shqetësim nga Bashkimi Europian dhe u urdhërua riatdhesimi i të gjithë azilkërkuesve.

Pas fjalës së Komisionerit për Zgjerim, Fule dhe Ministrja e Integrimit Majlinda Bregu iu përgjigj se Shqipëria po punon rreth reformave dhe ka plotësur në një kohë të shkurtër shumë prej tyre.

Ora 07:00-“KRIZA”, NE BRUKSEL DELEGACIONI SHQIPTAR TAKON SOT FULE

Delegacioni shqiptar i cili ndodhet në Bruksel do të vazhdoj sot takimet në Komitetin Parlamentar të Stabilizim- Asociimit.
Gjatë ditës së sotme delegacioni shqiptar do të takohet dhe me komisionerin për Zgjerimin e BE-së Stefan Fule, i cili do të përcjellë mesazhin për zgjidhjen e krizës politike.

Gjatë takimit që u zhvillua dje i komitetit parlamentar të Stabilizim Asocimit BE-Shqipëri, në Bruksel, nënkryetari i PE-së Eduard Kukan i bëri thirrje maxhorancës dhe opozitës të zgjidhin konfliktet dhe problemet e tyre politike.

“Konfliktet dhe problemet politike duhen zgjidhur në sferën e institucioneve demokratike, vendimet e së cilave duhen respektuar” tha Kukan
“Po takohemi në kohë të vështira, le të mos e fshehim. Më lejoni tu bëj thirrje të gjithëve ju që të shfrytëzoni këtë mundësi të dialogut tonë si një kontribut ndaj përpjekjes për të gjetur zgjidhje në të mirë të popullit shqiptar” theksoi Kukan.

Në Bruksel nga pala shqiptare të pranishëm, nga PD: Fatos Beja, Viktor Gumi, Albana Vokshi, Florian Mima, Jemin Gjana, Mesila Doda, Aldo Bumci. Arenca Trashani , kryetare e delegacionit për Shqipërinë në PE.
Ndërsa nga PS: Valentina Leskaj, Ermelinda Meksi, Arben Malaj, Ditmir Bushati, Taulant Balla, Sajmir Tahiri dhe Ilir Beqja.
(s.g/Balkanweb)

 

Meta, tjetër ftesë për dialog PS-së: Greva e urisë, barrikadë artificiale

Shekulli Online
 
UPDATE- Numri dy i qeverisë dhe ministri i Jashtëm, Ilir Meta i është rikthyer sërish sot grevës së urisë së deputetëve të PS-së dhe mbështetësve të tyre, duke bërë tjetër apel për dialog.
Ai nuk ka ngurruar ta quajë këtë grevë, një barrikadë artificiale, ndërkohë që ka shtuar se drejtuesit e PS-së duhet të dëshmojnë se kanë më shumë përgjegjësi.

“Ftoj grevistët e urisë për një zgjidhje demokratike. Është momenti për dialog”- ka thënë Meta.

Kjo eshte deklarata e dute e Metes per greven dhe vjen pas asaj te dhene gjate kongresit te rinisë së LSI-së, ku tha se të gjitha forcat politike në vend duhet të angazhohen në mënyrë pozitive për integrimin e vendit.
Ndërsa për grevën e kolegëve të tij socialist ai tha se shpreh keqardhje për grevën në bulevard. “Natyrisht që është e drejta e tyre të zgjedhin edhe këtë formë ekstreme të sakrificës për pretendimet që kanë. Kjo nuk më ndalon dot mua që t’i ftoj të bashkëpunojmë, t’i ftoj për dialog me mazhorancën dhe qeverinë për të realizuar pretendimet e tyre”, u shpreh kreu i LSI-së.
Ndërsa shtoi se “midis qytetarë shqiptarë është bërë një kontartë që është Kushtetuta dhe që duhet të respektohet nga të gjithë”.

Ndersa disa ore me pare per greven e socialisteve eshte shprehur edhe Kryetarja e KuvenditJozefina Topalli. Ajo e quajti grevën si mungesë dialogu të liderit Edi Rama. Në një deklaratë për mediat, ajo ka thënë prerë se grevistët nuk do të prishin të ardhmen e vendit në BE dhe as liberalizimin e vizave.

“Askush, as 122 vetë nuk mund ta prishin ëndrrën e shqiptarëve për liberalizimin e vizave. Dua t’i them ministrave të Jashtëm të Bashkimit Europian se shqiptarët janë të vendosur për të cuar përpara procesin e liberalizimit të vizave”, tha Topalli. Sipas saj, ashtu si kanë thënë edhe ndërkombëtarët, dialogu i vërtetë duhet të bëhet në sallën e kuvendit.

Lajme të ngjajshme:

Lufta në Lindjen e Mesme, reagimet pas vrasjes së udhëheqësit të Hesbullaut Hassan Nasrallah

A duhet të kalojë kaq lehtë një mashtrim i madh publik si ky?!

Loti S-do Te Pushojë

Dhëndëri mes dy nusesh, i shkon ish e dashura në ditën e dasmës