🟥 KUVENDI MIRATON NË LEXIM TË DYTË NDRYSHIMET NË LIGJIN PËR SPECIALEN – 88 VOTA PRO

Kuvendi i Kosovës ka miratuar përfundimisht, në lexim të dytë, Projektligjin për ndryshimin dhe plotësimin e Ligjit për Dhomat e Specializuara dhe Zyrën e Prokurorit të Specializuar në Hagë.

Sipas njoftimit zyrtar të Kuvendit, projektligji mori 88 vota pro, asnjë kundër dhe asnjë abstenim. Vendimi u përcoll me duartrokitje nga deputetët e pranishëm.

Votimi u zhvillua në një seancë të jashtëzakonshme, pasi deputetët miratuan shmangien nga afatet e zakonshme procedurale, duke mundësuar shqyrtimin e përshpejtuar të projektligjit. Nisma ishte propozuar nga PDK-ja dhe në votimin përfundimtar mori mbështetje edhe nga deputetë të LVV-së, AAK-së dhe komuniteteve joserbe.

Një ditë më parë, ndryshimet kishin kaluar leximin e parë me 91 vota pro, por votimi përfundimtar ishte shtyrë. Jashtë Kuvendit ishin zhvilluar protesta me kërkesën që ndryshimet të miratoheshin edhe në lexim të dytë.

Pas miratimit të ligjit, Kuvendi vazhdoi me pikën tjetër të rendit të ditës – zgjedhjen e Presidentit të Republikës së Kosovës.

Burimi: Kuvendi i Republikës së Kosovës / Nacionale

#ZeriNews #Kosova #Kuvendi #Specialja #Haga #DhomatESpecializuara #UÇK #Lajme