Një polic i plagosur rreth orës 2 të mëngjesit të sotëm dhe 6 fshatarë të arrestuar është bilanci i deritanishëm nga përplasjet dy ditore me armë mes policisë dhe kultivuesve të kanabisit nga Lazarati. Polici i plagosur aktualisht gjendet jashtë rrezikut për jetën. Përleshjet dhe situata e tensionuar po vijon edhe sot. Policia ka rritur në 800 numrin e pjesëtarëve të saj që po mbajnë nën rrethim

Lazaratin. Drejtori i Përgjithshëm i Policisë së Shqipërisë, Artan Didi u ka thënë mediave shqiptare se policia e ka ndërmend të vendosë ligjin edhe në këtë pjesë të Shqipërisë, andaj iu ka bërë apel kultivuesve të drogës të lënë armët dhe gjithçka të përfundojë pa viktima.

“Ky është një grupim vërtet i strukturuar dhe i dirigjuar duke parë dhe lojërat që janë bërë dje përmes komunikimit me medien nga një pjesë të elementeve kriminalë. Ju them dhe njëherë që të vihen në dispozicion të policisë, të përgjigjen për atë që kanë bërë të mos e rëndojnë më pozitën e tyre. Policia nuk ka ndërmend të tërhiqet, jemi të vendosur të vendosim ligjin në çdo centimetër të Shqipërisë”, deklaroi Artan Didi, Drejtori i Përgjithshëm i Policisë së Shqipërisë.

“Jam në Lazarat. Përjashta s’kam dalë të shikoj por dëgjoj që ka të shtëna armësh. Nuk dal dot. Të qetësohen gjërat sepse ka shumë të shtëna. Unë dorëzohem por s’dal dot jashtë në mes të plumbave”, tha Razip Mahmutaj, i dyshuar.

Ndërkohë kryetari i Komunës së Lazaratit, Dashamir Aliko ka bërë thirrje për ndërprerjen e luftës dhe kthimin e negociatave mes shtetit dhe banorëve të Lazaratit.

“Kjo situatë nuk mund të kalojë duke bërë luftë policia e shtetit me komunitetin e Lazaratit. Asnjë lloj fitimi nuk është i barabartë me një jetë njeriu. Kam biseduar me drejtorin e policisë për të ruajtur qetësinë policia”, tha Dashamir Aliko, Kryetar i Komunës së Lazaratit