Muslimanët të ofenduar nga Papa
Një deklaratë nga Kisha Katolike nuk ka mundur t'i ndalë kritikat ndaj Papës nga udhëheqës muslimanë që janë ofenduar nga deklarata të tij lidhur me konceptin e luftës së shenjtë.
Një deklaratë e Vatikanit tha se Papa nuk kishte pasur si qëllim të ofendonte muslimanët dhe se donte të kultivonte respekt midis feve.
Zëdhënësi zyrtar i Vatikanit, at Federico Lombardi, një prift jezuit që shoqëroi papën gjatë vizitës së tij në Gjermani, menjëherë u përpoq të kufizojë dëmin e shkaktuar në botën muslimane nga deklaratat e Papës.
Ai tha se nuk kishte qenë qëllimi i tij të hynte në një shqyrtim të thellë të Xhihadit Musliman apo Luftës së Shenjtë kur Papa citoi fjalë nga perandori i krishterë që sundoi perandorinë Bizantine gjashtë shekuj më parë.
Sipas një versioni të ngjarjeve, perandori i Bizantit që sundonte nga Konstandinopoja, Stambolli i sotëm, e ka përshkruar komandën e Profetit Muhamed për të përhapur besimin musliman nëpërmjet shpatës si "të keqe dhe jonjerëzore".
Reagimi musliman
Reagimi nga Turqia, ku Papa Benedikt pritet të shkojë në nëntor për vizitë - e para në një vend musliman - ishte siç pritej, armiqësore,
Kreu i organit fetar në Turqi -- Ali Bardakoglu -- i quajti deklaratat e papës si "jashtëzakonisht shqetësuese, për të adhur keq dhe fatkeqe" dhe tha se ishte shumë i ofenduar.
Kleriku i lartë turk tha se ishte Krishtërimi, dhe jo Islami, që kishte popullarizuar konvertimin fetar me forcë.
Komente të ngjashme u bënë në Egjipt e Arabi Saudite.
Vëllazëria Muslimane në Egjipt tha se Papa kishte përforcuar argumentin e atyre që thonë se Perëndimi është armiqësor ndaj çdo gjëje islamike.
Një studjues islamik në Pakistan Javed Ahmed Gamdi i quajti deklaratat e Papës të papërgjegjshme.
Por Vatikani këmbëngul se fjalët e Papës janë keqinterpretuar.
At Lombardi pretendon se Papa dëshiron të kultivojë një qëndrim respekti ndaj feve dhe kulturave të tjera dhe se ai kundërshton çdo motiv fetar për dhunën.
(BBC)